ၸုမ်းသိုၵ်းယိုတ်းဢႃႇၼႃႇ ဢၼ်ၵႂႃႇတူင်ႉၼိုင်ၼႂ်းၸႄႈဝဵင်းလႃႈသဵဝ်ႈ တၢင်းထုင်ႉမိူင်းယေႃၼၼ်ႉ ယိုဝ်းၵူၼ်းဝၢၼ်ႈ ထဝ်ႈၸၢႆး ၵေႃႉၼိုင်ႈ လူႉတၢႆ – သေပၼ်ငိုၼ်း 5 သႅၼ်သေ တဵင်ၵႂၢမ်းၼၵ်းဝႆႉ။
Image: CJ/ မၢၵ်ႇၵွင်ႈ ဢၼ်ယိုဝ်းၵူၼ်းမိူင်းတၢႆ တီႈဝၢၼ်ႈၼမ်ႉႁႅင်ႈ 
Image: CJ/ လုင်းသွႆႈ ၵူၼ်းဝၢၼ်ႈၼမ်ႉႁႅၵ်ႈ ဢိူင်ႇမိူင်းႁႅတ်ႈ လႃႈသဵဝ်ႈ ဢၼ်ၺႃးယိုဝ်းတၢႆ
မိူဝ်ႈဝၼ်းတီႈ 11/3/2021 ယၢမ်းၵၢင်ဝၼ်း လုင်းသွႆႈ/ ပေႃႈထဝ်ႈသွႆႈ ၵူၼ်းဝၢၼ်ႈၼမ်ႉႁႅင်ႈ ဢိူင်ႇမိူင်းႁႅတ်ႈ ထုင်ႉမိူင်းယေႃ ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ ထုၵ်ႇသိုၵ်းမၢၼ်ႈ ၶလယ 78 ၊ တႂ်ႈ တပ်ႉၸုမ်းလူင် တပ်ႉမ 88 – ဢၼ်ၵႂႃႇမႃးတူင်ႉၼိုင် ထုင်ႉၾၢႆႇဢွၵ်ႇ ဝဵင်းလႃႈသဵဝ်ႈ။
ၵူၼ်းယူႇမိူင်းယေႃ ဢမ်ႇၶႂ်ႈဢွၵ်ႇၸိုဝ်ႈ ၵေႃႉၼိုင်ႈ လၢတ်ႈဝႃႈ – “ၸႂ်ႈတႄႉၶႃႈဢေႃႈ ပဵၼ်ၵူၼ်းထဝ်ႈဢေႃႈ ၺႃးယိုဝ်းတၢႆ ၼၼ်ႉ။ ၸုမ်းသိုၵ်းဢၼ်ယိုဝ်းတႄႉ ပဵၼ်တပ်ႉ ၶလယ 78 ပႃႈတႂ်ႈ တပ်ႉမ 88 ၼႆဢေႃ”- ဝႃႈၼႆ။
တီႈသိုဝ်ႇၶၢဝ်ႇ သူၺ်ႇၽီႇမျေႇတႄႉ ဢွၵ်ႇဝႆႉဝႃႈ သိုၵ်းမၢၼ်ႈ မႃးႁွင်ႉဢဝ်လုင်းသွႆႈ မိူဝ်ႈၽွင်းၼင်ႈၵိၼ် ၶဝ်ႈယူႇ။ လုင်းသွႆႈ သမ်ႉ ဢမ်ႇမေႃလၢတ်ႈၵႂၢမ်းမၢၼ်ႈ။ လုင်းသွႆႈသမ်ႉယိပ်းမိတ်ႈဝႆႉ သိုၵ်းမၢၼ်ႈသမ်ႉဝႃႈ တေႁဵတ်းတီႈၶဝ်ၼႆသေ ယိုဝ်းသႂ်ႇလုင်းသွႆႈ ဢမ်ႇယွမ်း 20 ၵမ်း လူမ်ႉတၢႆထင်တီႈ – ဝႃႈၼႆ။
“လုင်းသွႆႈသမ်ႉပဵၼ်ၵူၼ်း လိူတ်ႈလူမ်းဢမ်ႇပေႃးလီ ၵေႃႉၼိုင်ႈ၊ သိုၵ်းမၢၼ်ႈ ယိုဝ်းတၢႆ ယဝ်ႉ ပၼ်ငိုၼ်း 5 သႅၼ်သေ တဵင်ၵႂၢမ်းၼၵ်း ႁႂ်ႈယဝ်ႉယႃႇၵၼ် ၼႆသေ ထွၼ်ဢွၵ်ႇဝၢၼ်ႈၵႂႃႇ” – ၼႆ ၵူၼ်းမိူင်းႁႅတ်ႈ ၵေႃႉၼိုင်ႈလၢတ်ႈၼႄ ၼင်ႇၼႆ။
ဢိူင်ႇမိူင်းႁႅတ်ႈၼႆႉ မီးၾၢႆႇဢွၵ်ႇဝဵင်းလႃႈသဵဝ်ႈ မွၵ်ႈ 20 လၵ်း၊ ယူႇၼႂ်းၵႄႈ မိူင်းယေႃ လႃႈသဵဝ်ႈ။ ႁၢင်ႇတၢင်းမိူင်းယေႃမွၵ်ႈ 9 လၵ်း။ လႃႈသဵဝ်ႈ – မိူင်းႁႅတ်ႈ – မိူင်းယေႃ ၼႆႉ ပဵၼ်သဵၼ်ႈတၢင်းသၢႆၼိုင်ႈ၊ လႃႈသဵဝ်ႈ – မိူင်းတဵမ် – မိူင်းယၢင်း – မိူင်းယေႃ သမ်ႉ ပဵၼ်သဵၼ်ႈတၢင်းထႅင်ႈသၢႆၼိုင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ