ပလိၵ်ႈ/ သိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉ ပွႆႇမၢၵ်ႇၵႅတ်ႉသ် ယိုဝ်းၵွင်ႈသႂ်ႇ ၼႂ်းၽုင်ၼႄၵၢင်ၸႂ် တီႈဝဵင်းၽႃၵၢၼ်ႉ ၼၼ်ႉ မီးၵူၼ်းတၢႆ ၵေႃႉၼိုင်ႈ မၢတ်ႇၸဵပ်း 10 ပၢႆ သေတႃႉ ၵူၼ်းမိူင်းတိုၵ်ႉသိုပ်ႇၼႄၵၢင်ၸႂ်ၵူႈဝၼ်း။
သိုၵ်းမၢၼ်ႈ ယိုတ်းဢႃႇၼႃႇ ယဝ်ႉ ဢမ်ႇလၢႆဝၼ်း ဝဵင်းယႂ်ႇဝဵင်းလူင်ၼႄၵၢင်ၸႂ်၊ ၸိူင်ႉၼၼ် ၼင်ႇၵဝ်ႇ တီႈဝဵင်းၽႃၵၢၼ်ႉၵေႃႈ မီးၵူၼ်းဢွၵ်ႇၼႄၵၢင်ၸႂ်ၵူႈဝၼ်း တေႃႇထိုင် ဝၼ်းမိူဝ်ႈၼႆႉ။ မိူဝ်ႈဝၼ်းတီႈ 13 ပူၼ်ႉမႃးၼႆႉ သိုၵ်းမၢၼ်ႈ တပ်ႉပလိၵ်ႈမၢၼ်ႈ ယိုဝ်းၵွင်ႈသႂ်ႇ ၽုင်ၵူၼ်းၼႄ ၵၢင်ၸႂ် ၊ ၼုမ်ႇၸၢႆးတႆးလႅင် ၸိုဝ်ႈ ၸၢႆးၸေႃႇလိၼ်းထၢႆႉ ဢႃယု 32 လႆႈတၢႆ ၽွင်းၼႄၵၢင်ၸႂ်သေတႃႉ ၵူၼ်းမိူင်းတိုၵ်ႉသိုၵ်ႇၼႄ ၵၢင်ၸႂ်ၵူႈဝၼ်း။
ၵူၼ်းၼုမ်ႇ ၼႄၵၢင်ၸႂ် တီႈၽႃၵၢၼ်ႉ ၵေႃႉၼိုင်ႈ လၢတ်ႈဝႃႈ – “တီႈၽႃၵၢၼ်ႉႁဝ်းၶႃႈၼႆႉ ဢၼ်လႆႈႁပ်ႉႁူႉဝႆႉ ၵူၼ်းမိူင်း/ ၵူၼ်းၼုမ်ႇႁဝ်းၶႃႈ ထုၵ်ႇသိုၵ်းမၢၼ်ႈတီႉၺွပ်းၵႂႃႇ 14 ၵေႃႉ။ ပွႆႇပၼ်ၶိုၼ်း 2 ၵေႃႉ။ ၵိုတ်း 12 ၵေႃႉ ပႆႇပွႆႇ။ လိူဝ်ၼၼ်ႉ မၢတ်ႇ ၸဵပ်း ဢမ်ႇယွမ်း 10 ။ ပူၼ်ႉမႃးလၢႆဝၼ်းၼႆႉ ၵူၼ်းၼုမ်ႇႁဝ်းၶႃႈ ၸၢႆးတႆးလႅင် ၸိုဝ်ႈ ၸၢႆးၸေႃႇလိၼ်းထၢႆႉ ၼၼ်ႉ လႆႈလူႉတၢႆၵႂႃႇဢေႃႈ။ ႁဝ်းၶႃႈတႄႉ ဢမ်ႇၽွမ်ႉၶႃႈ တေၼႄၵၢင်ၸႂ် တေႃႇပေႃးဢွင်ႇပေႉဢေႃႈ”- ဝႃႈၼႆ။
ၸၢႆးၸေႃႇလိၼ်းထၢႆႉ ၸႃႇတီႉတီၵိူတ်ႇ ဝၢၼ်ႈဢူဝ်းတၢၼ်း မိူင်းၵွင် ၊ ၶၢႆႉမႃးယူႇ ပွၵ်ႉသီႇ ဝၢၼ်ႈသိူၵ်ႈမူ ဝဵင်းၽႃၵၢၼ်ႉ၊ ဢွၵ်ႇၼႄၵၢင်ၸႂ် ၸွမ်းပိူၼ်ႈသေ ၺႃးယိုဝ်းတၢႆ။
ၶၢဝ်းတၢင်း 40 ဝၼ်းပၢႆ ဢၼ်သိုၵ်းမၢၼ်ႈ ယိုတ်းမိူင်းၼႆႉ – ယိုဝ်းၵူၼ်းတၢႆ 200 ပၢႆ ၊ တီႉၵူၼ်းၼပ်ႉႁဵင်သေ တႃႉ ၵူၼ်းမိူင်း ဢမ်ႇၵၢၼ်ႉဢမ်ႇထွႆ ။ ၼႄၵၢင်ၸႂ်ၵူႈလၢႆးလၢႆး ၼႄၵၢင်ၸႂ်လၢႆးဢမ်ႇမီးၵူၼ်း၊ ၼႄၵၢင်ၸႂ် ယွမ်ၽႂ်ပွၵ်ႉမၼ်း၊ တႆႈတဵၼ်း ယွၼ်းသူး ဝၢၼ်ႈၽႂ် မူႇမၼ်း ၸဵမ်ၸိူဝ်းၼႆႉ။ တီႈဝဵင်းၽႃၵၢၼ်ႉၵေႃႈ ဢဝ်လၢႆး ၼႆႉသေ ၼႄၵၢင်ၸႂ်မႃးတေႃႇထိုင်ဝၼ်းမိူဝ်ႈၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ