မိူဝ်ႈၼႆႉ ဝၼ်းတီႈ 17/3/2021 ယၢမ်းၵၢင်ၼႂ် မွၵ်ႈ 9:20 မူင်း ၾႆးမႆႈႁိူၼ်း ၵူၼ်း ဝၢၼ်ႈ ပွၵ်ႉ 1 သေးတၢၼ်း သွင်လင် ၼႂ်းၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇ ။
ၸုမ်းၸွႆႈထႅမ် တူင်ႇဝူင်းၵူၼ်း ဢၼ်လႆႈၵႂႃႇၸွႆႈၶႄၾႆးၼၼ်ႉ လၢတ်ႈဝႃႈ – “ၸႂ်ႈၶႃႈ ဢေႃႈ မိူဝ်ႈလဵဝ် တိုၵ်ႉၸွႆႈၶႄၵၼ်ယူႇၶႃႈ။ လၢမ်းမႆႈတင်းသွင်လင်ၶႃႈဢေႃႈ။ လွင်ႈ ၵူၼ်းမၢတ်ႇၸဵပ်း လူႉတၢႆတႄႉ ဢမ်ႇမီးၶႃႈ။ ၶူဝ်းႁိူၼ်းယေးတႄႉ မႆႈၵႂႃႇတင်းၼမ် ၶႃႈယဝ်ႉ။ ယွၼ်ႉသင်လႄႈမႆႈ ဢၼ်ဝႃႈၼၼ်ႉ ပႆႇႁူႉလွင်ႈတၢင်းမၼ်းၶႃႈ”- ဝႃႈၼႆ။
ၵမ်ႈၽွင်ႈတႄႉလၢတ်ႈဝႃႈပဵၼ် မေႃႈၵႅတ်ႉသ်တႅၵ်ႇၼႆသေတႃႉ ၽူႈတွႆႇႁွၵ်ႈသမ်ႉပႆႇလႆႈၶေႃႈယိုၼ်ယၼ်။ မီးၵူၼ်းၼႂ်းပွၵ်ႉယွမ်ႇလႄႈတူင်ႇဝူင်းၵူၼ်းမႃးၸွႆႈၶႄလႄႈ ၾႆးမွတ်ႇၵႂႃႇလီငၢမ်းယဝ်ႉၼင်ႇၵဝ်ႇ။
ၶၢဝ်းမႆႈပီၼႆႉသမ်ႉ ၵၢၼ်မိူင်းသုၵ်ႉယုင်ႈ၊ ၵူၼ်းမိူင်းဢွၼ်ၵၼ်ၶိုၼ်ႈၼိူဝ်တၢင်းသၢၼ်ၶတ်းသိုၵ်းမၢၼ်ႈယိုတ်းမိူင်းလႄႈ ယိင်ႈၶႅၼ်းလီၾၢင်ႉၽေးၽိုၼ်းၽေးၾႆးလိူဝ်ၵူႈပီ ထဝ်ႈဝၢၼ်ႈထဝ်ႈၼႃးၵူၼ်းသႅၼ်ဝီလၢတ်ႈၼင်ႇၼႆ။
