ၵူၼ်းမိူင်း/ ၵူၼ်းၼုမ်ႇ ဢွၵ်ႇၼႄၵၢင်ၸႂ် သၢၼ်ၶတ်းတေႃႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း တီႈဝဵင်းဢွင်ႇပၢၼ်း ထုၵ်ႇ ပလိၵ်ႈ/ သိုၵ်းမၢၼ်ႈ ယိုဝ်းမၢၵ်ႇၵွင်ႈတႄႉသႂ်ႇ လူႉတၢႆ 1 မၢတ်ႇ 2 ဝႃႈၼႆ။
Photo CJ-ပလိၵ်ႈလႄႈသိုၵ်း ဢဝ်မၢၵ်ႇၵွင်ႈတႄႉယိုဝ်းသႂ်လႄႈႇၵူၼ်းၼႄ ၵၢင်ၸႂ် မၢတ်ႇၸဵပ်း တီႈဢွင်ႇပၢၼ်းမိူဝ်ႈဝၼ်းတီႈ 15/3/2021 
Photo CJ-ပလိၵ်ႈလႄႈသိုၵ်း ဢဝ်မၢၵ်ႇၵွင်ႈတႄႉယိုဝ်းသႂ်ႇၵူၼ်းၼႄၵၢင်ၸႂ် တီႈဢွင်ႇပၢၼ်းမိူဝ်ႈဝၼ်းတီႈ 15/3/2021
မိူဝ်ႈဝႃး ဝၼ်းတီႈ 15/3/2021 ယၢမ်းၵၢင်ၼႂ် မွၵ်ႈ 10 မူင်း ပလိၵ်ႈသိုၵ်းမၢၼ်ႈ ႁႄႉႁၢမ်ႈ ၸွမ်းယႃႉ ပၢင်ၼႄၵၢင်ၸႂ် ၵူၼ်းမိူင်း/ ၵူၼ်းၼုမ်ႇ တီႈပွၵ်ႉဢွင်ႇမင်ႇၵလႃႇ ဝဵင်းဢွင်ႇပၢၼ်း ၸိုင်ႈတႆး ပွတ်းၸၢၼ်းသေ ၸႂ်ႉလၢႆးႁုၵ်ႉႁၢႆႉ ဢဝ်မၢၵ်ႇၵႅတ်ႉသ်ၼမ်ႉတႃပွႆႇသႂ်ႇ ယိုဝ်းမၢၵ်ႇၵွင်ႈတႄႉ သႂ်ႇထႅင်ႈ တိူဝ်ႉၺႃးၵူၼ်းမိူင်းၼႄၵၢင်ၸႂ် လူႉတၢႆ 1 ၵေႃႉ မၢတ်ႇ 2 ၵေႃႉ ၼႆယဝ်ႉ။
ၽူႈလူင်ႉလႅၼ်ႇၾၢႆႇပၢႆးမၢႆမီႈ/ ၵူၼ်းၼုမ်ႇ ၽူႈၶဝ်ႈတူင်ႉၼိုင် ၼႂ်းပၢင်ၼႄၵၢင်ၸႂ် ပွတ်းၸၢၼ်း ဢၼ်လႆႈၵဵပ်းသဵၼ်ႈမၢႆ ၵူၼ်း မိူင်းတႆး ၸိူဝ်းၺႃးတီႉၼၼ်ႉ လၢတ်ႈ တီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၽူႈၸၢႆးၵေႃႉၼိုင်ႈ ၺႃးယိုဝ်းတၢႆ တီႈဢွင်ႇ ပၢၼ်း ပဵၼ်ၵူၼ်းၼုမ်ႇ ဢႃယု မွၵ်ႈ 20 ပၢႆၼႆႉၶႃႈ”- ဝႃႈၼႆ။
ဢၼ်တိူဝ်ႉၺႃးမၢၵ်ႇၵွင်ႈသေ လႆႈမၢတ်ႇၸဵပ်း 2 ၵေႃႉၼၼ်ႉသမ်ႉ ပဵၼ်ၽူႈၸၢႆး ၵူၼ်းၼုမ်ႇ တင်းသွင် ၵေႃႉၼိုင်ႈ တိူဝ်ႉၺႃးတီႈၶႃ၊ ထႅင်ႈၵေႃႉၼိုင်ႈသမ်ႉ တိူဝ်ႉၺႃး တီႈၵုမ်ႇၵူၼ်ႈ။ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉ တီႈႁူင်း ယႃၵၢတ်ႇလေႃႉ (ၵလေႃး)ၼႆယဝ်ႉ။
မိူဝ်ႈဝၼ်းတီႈ 13 ၼၼ်ႉၵေႃႈ ပၢင်ၼႄၵၢင်ၸႂ် တီႈဝဵင်းဢွင်ႇပၢၼ်း ထုၵ်ႇပလိၵ်ႈသိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉသေ ပွႆႇမၢၵ်ႇၵႅတ်ႉသ်ၼမ်ႉတႃသႂ်ႇ ယဝ်ႉယိုဝ်းၵွင်ႈသႂ်ႇထႅင်ႈသေ လမ်းတီႉၵူၼ်းမိူင်းၵႂႃႇ 11 ၵေႃႉ ။
ထႅင်ႈၾၢႆႇၼိုင်ႈၵေႃႈ မိူဝ်ႈဝႃး ဝၼ်းတီႈ 15 ၼႆႉ ၼႂ်းမိူင်းတႆး ပတ်းပိုၼ်ႉ ထုၵ်ႇပိၵ်ႉဢိုတ်း လႅင်းဢိၼ်ႊထိူဝ်ႊၼႅတ်ႊ ဢၼ်ဢဝ်ၾူၼ်ႊ မိုဝ်းထိုဝ် Mobile Phone Data သေၸႂ်ႉၵမ်းသိုဝ်ႈၼၼ်ႉလႄႈ ငဝ်းလၢႆး ပိူင်ပဵၼ်လွင်ႈၼႄၵၢင်ၸႂ်မိူဝ်ႈဝႃး ဢၼ်ပဵၼ်ယူႇၼႂ်းပိုၼ်ႉတီႈၼၼ်ႉ ဢမ်ႇၸၢင်ႈလႆႈႁူႉၸွမ်း ၶိုတ်း တၼ်း ။
“မိူဝ်ႈဝႃးၼႆႉ ၼႂ်းမိူင်းတႆး ထုၵ်ႇပိၵ်ႉဢိုတ်းပႅတ်ႈ ဢိၼ်ႊထိူဝ်ႊၼႅတ်ႊၼႆႉ ႁဝ်းၶႃႈ ဢမ်ႇလႆႈႁပ်ႉၶေႃႈမုလ်းၶိုတ်းတၼ်းဝႃႈ တီႈၼႂ်းပၢင်ၼႄၵၢင်ၸႂ်ၼၼ်ႉ ထုၵ်ႇပလိၵ်ႈသိုၵ်းမၢၼ်ႈၶဝ် တီႉၵႂႃႇလၢႆၵေႃႉ ၸိူဝ်းၼႆႉ။ ယွၼ်ႉၼႅင်ႈသၢၼ်ႁဝ်းၶႃႈ ၶၢတ်ႇ ၵၼ်သေ တေႃႇထိုင်ယၢမ်းလဵဝ် ပႆႇႁၼ်သူင်ႇၶေႃႈမုလ်းၸူးၵၼ်ၶႃႈ” – ၽူႈလူင်ႉလႅၼ်ႇ ၾၢႆႇပၢႆးမၢႆမီႈ သိုပ်ႇလၢတ်ႈၼႄၼင်ႇ ၼႆ။
ပၢင်ၼႄၵၢင်ၸႂ် တီႈတူၼ်ႈတီး မိူဝ်ႈဝႃး ဝၼ်းတီႈ 15 ၼၼ်ႉ ၵူၼ်းၼုမ်ႇ ထုၵ်ႈပလိၵ်ႈ သိုၵ်းမၢၼ်ႈ တီႉၺွပ်းၵႂႃႇ ၵူၺ်းၵႃႈ တီႉၵႂႃႇလၢႆၵေႃႉတႄႉ ပႆႇႁူႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ