ၸုမ်း Team Black X ဝဵင်းတူၼ်ႈတီး ပိုၼ်ၽၢဝ်ႇပူၵ်းတုင်းသီလမ် ဢၼ်မီးတီႈပွင်ႇဝႃႈ တႃႇၵႅတ်ႇၶႄတူဝ်ၵဝ်ႇလႄႈ တူင်ႇဝူင်းဝၢၼ်ႈဢိူင်ႇၸဝ်ႈၵဝ်ႇ ၽွင်းၺႃးၸုမ်းယိပ်းၵွင်ႈသေ ပိုတ်းယိုဝ်း ႁဵတ်းႁၢႆႉတေႃႇၵူၼ်းမိူင်း မႃးၵူႈဝၼ်း ဝႃႈၼႆ။
မိူဝ်ႈဝႃး ဝၼ်းတီႈ 14/3/2021 ၼႆႉ ၵူၼ်းမိူင်းတူၼ်ႈတီး ၶီႇရူတ်ႉၶိူင်ႈ ဢွၵ်ႇၼႄၵၢင်ၸႂ် ၺႃးပလိၵ်ႈ/ သိုၵ်းမၢၼ်ႈ ၸွမ်းဢဝ်ၵႃးလမ်းၽႃႇ ရူတ်ႉၶိူင်ႈ ၊ ယိုဝ်းၵွင်ႈမၢၵ်ႇယၢင်သႂ်ႇသေတီႉၵူၼ်းၼုမ်ႇၵႂႃႇ 7 ၵေႃႉ ။
ၸုမ်း Team Black X လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈဝႃးၼႆႉ ၵႃးပလိၵ်ႈသိုၵ်းမၢၼ်ႈ လမ်းတမ်ၽႃႇသႂ်ႇ ရူတ်ႉၶိူင်ႈ ၵူၼ်း ၼုမ်ႇ ၼႄၵၢင်ၸႂ် မွၵ်ႈ 5 လမ်းၼႆႉ။ ယဝ်ႉၵေႃႈ ယိုဝ်းၵွင်ႈမၢၵ်ႇယၢင်ႇသႂ်ႇ ၵူၼ်းၼုမ်ႇ လႆႈမၢတ်ႇၸဵပ်း 4 ၵေႃႉ၊ လိူဝ်ၼၼ်ႉ တီႉၵူၼ်းၼုမ်ႇၵႂႃႇထႅင်ႈ 7 ၵေႃႉ။ ရူတ်ႉၶိူင်ႈၵူၼ်းၼုမ်ႇၵေႃႈ ၶဝ်ဢဝ်တၢင်ႇရူတ်ႉၵႃးၵႂႃႇ” – ဝႃႈၼႆ။
ပလိၵ်ႈသိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉ ႁဵတ်းလၢႆးမိူၵ်ႇလိူင်းတေႃႇၵူၼ်းမိူင်း မႃးႁၢဝ်ႈႁႅင်း ၼႃႇယဝ်ႉလႄႈ ၵူၼ်းမိူင်းတူၼ်ႈတီးၸင်ႇလႆႈၸႂ်ၵၼ် ပူၵ်းတုင်းသီလမ် တႃႇၵႅတ်ႇၶႄ တူဝ်ၵဝ်ႇၵႂႃႇယဝ်ႉ ဝႃႈၼႆ။
ၾၢႆႇၼိုင်ႈ ၶွမ်ႊမတီႊၽူႈတႅၼ်းသၽႃးႁူမ်ႈတုမ် CRPH ၵေႃႈ ပိုၼ်ၽၢဝ်ႇ ဢွၵ်ႇမႃး မိူဝ်ႈၼႆႉ ဝၼ်းတီႈ 15 သုၼ်ႇလႆႈ ၵူၼ်းမိူင်းၵႅတ်ႇၶႄတူဝ်ၵဝ်ႇ။ မီးယိူင်းဢၢၼ်း 4 ၶေႃႈလႄႈ ၶၵ်ႉၵၢၼ်လူင် 5 ၶေႃႈ။ယွၼ်ႉပိူဝ်ႈၸုမ်းယိပ်းၵွင်ႈၵၢင်ႇသေ ၵေႃႇၵၢၼ်ႁၢႆႉ ယိုဝ်းၵူၼ်းမိူင်းၼႂ်းဝဵင်းတၢႆ ႁၢဝ်ႈႁႅင်းမႃးတိၵ်းတိၵ်းလႄႈ တႃႇႁႂ်ႈၵူၼ်းမိူင်းတေၸၢင်ႈၵႅတ်ႇၶႄတူဝ်ၵဝ်ႇဢိၵ်ႇပႃးတင်း ၵူၼ်းႁိမ်းႁွမ်းလႄႈတူင်ႇဝူင်းဝၢၼ်ႈဢိူင်ႇၸဝ်ႈၵဝ်ႇၼၼ်ႉ ယူႇတီႈ CRPH သေပိုၼ်ၽၢဝ်ႇဢၼုယၢတ်ႈသုၼ်ႇလႆၵႅတ်ႇၶႄတူဝ်- ဝႃႈၼႆ။
ၵွပ်ႈၼႆလႄႈၵူၼ်းမိူင်းလၢႆလၢႆၸႄႈဝဵင်း ၸင်ႇလႆႈပူၵ်းတုင်းလမ် ၼႄဝႃႈတေ ၽွင်းထုၵ်ႇပူၼ်ႉပႅၼ်ႁဵတ်းႁၢႆႉၼၼ်ႉ ၵူၼ်းမိူင်းတေၶိုၼ်းတွပ်ႇတႅၼ်းႁႄႉၵင်ႈတူဝ်ၵဝ်ႇၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ