ၵူၼ်းၼုမ်ႇမူႇၸေႊ ၼႄၵၢင်ၸႂ် ၼႂ်းၵၢတ်ႇ တႃႇဝႄႈၽေးပလိၵ်ႈမၢၼ်ႈႁၢမ်ႈႁႄႉယႃႉၵဝ်း၊ တေဢဝ်ၵူႈလွၵ်းလၢႆးသေၼႄၵၢင်ၸႂ်လူၺ်ႈလၢႆးၵတ်းယဵၼ်ၵႂႃႇ ဝႃႈၼႆ။
မိူဝ်ႈၼႆႉ ဝၼ်းတီႈ 15/3/2021 ယၢမ်းၵၢင်ၼႂ် ၵူၼ်းမိူင်း/ၵူၼ်းၼုမ်ႇ ႁူမ်ႈၵၼ် ဢွၵ်ႇၼႄၵၢင်ၸႂ် ပႆတၢင်းၼႂ်းၵၢတ်ႇလူင် ၸႄႈဝဵင်း မူႇၸေႊ ၸိုင်ႈတႆး ပွတ်းႁွင်ႇ ။
ၵူၼ်းၼုမ်ႇ ၽူႈၶဝ်ႈႁူမ်ႈ ၼႄၵၢင်ၸႂ် ၵေႃႉၼိုင်ႈ လၢတ်ႈဝႃႈ – “မိူဝ်ႈဝႃးတင်း မိူဝ်ႈၼႆႉ ႁဝ်းၶႃႈ ဢွၼ်ၵၼ်ၼႄၵၢင်ၸႂ် ၼႂ်း ၵၢတ်ႇမူႇၸေႊၶႃႈဢေႃႈ။ ၼင်ႇႁိုဝ် ပေႃးတေ လွတ်ႈၽေး ပလိၵ်ႈသိုၵ်းမၢၼ်ႈလမ်းတီႉၼၼ်ႉ။ ပေႃး ၶဝ်မႃးတီႉ ႁဝ်းၶႃႈ ႁဵတ်းမိူၼ်ၾၢင်ႁၢင်ႈ ၵူၼ်းၸၢႆႇၵၢတ်ႇသေယဝ်ႉၶႃႈဢေႃႈ။ ၸႂ်ႉၵူႈလၢႆး ယဝ်ႉၶႃႈ လူၺ်ႈလၢႆးၵတ်းယဵၼ်ၼၼ်ႉ ၼင်ႇႁိုဝ် ပၢင်တိုၵ်းပေႃးတေဢွင်ႇ။ ႁဝ်းၶႃႈ ဢမ်ႇၸႂ်ႉလၢႆးႁုၵ်ႉႁၢႆႉၶႃႈ ”- ဝႃႈၼႆ။
ဝၢႆးလင်ၺႃးပလိၵ်ႈလိုပ်ႈလမ်းတီႉၺွပ်းၵူၼ်းၼႄၵၢင်ၸႂ် 10 ပၢႆသေ ၼင်ႇႁိုဝ် ပလိၵ်ႈလႄႈသိုၵ်းတေဢမ်ႇၸွမ်းႁွႆးတီႉၺွပ်း ၵူၼ်းမိူင်းလႆႈထႅင်ႈၼၼ်ႉ ၵူၼ်းၼုမ်ႇမူႇၸေႊၸႂ်ႉလၢႆလၢႆလၢႆးမိူၼ်ၼင်ႇ တွႆႇတိင်ႇ ႁွင်ႉၽဵင်းသေၼႄၵၢင်ၸႂ်၊ မၢင်ပွၵ်ႈ ၶီႇရူတ်ႉၶိူင်း သေၼႄ၊ တႅမ်ႈလိၵ်ႈသၢၼ်ၶတ်း သဵပ်ႇပၢႆမႆႉသေ ပၵ်းသႂ်ႇၼႂ်းတဝ်ႈၼမ်ႉ ၵႂႃႇတမ်းဝႆႉတီႈႁိမ်ၽၵ်းတူ လႅၼ်လိၼ် မၢၼ်ႈ-ၶႄႇ သေ ၼႄၵၢင်ၸႂ်တေႃႇတင်းသွင်မိူင်းၵေႃႈယၢမ်ႈမီးမႃး။ ပလိၵ်ႈဢမ်ႇတွၼ်ႉလမ်းၶိုၼ်းပၢႆးဝူၼ်ႉၵူၼ်းၼုမ်ႇသေပွၵ်ႈ – ၵူၼ်းမူႇၸေႊ လၢတ်ႈၼင်ႇၼႆ။
“တီႈမူႇၸေႊႁဝ်းၶႃႈၼႆႉ သင်ယႄးသိုၵ်းမႃးလိုပ်ႈ ႁဝ်းၶႃႈ ၵႂႃႇတႄႇပၢင်ထႅင်ႈ တီႈၼိုင်ႈ။ ယဝ်ႉၵေႃႈ ဢမ်ႇၶွၼ်ႈတီႈလဵဝ်ၵၼ် ႁဵတ်းပဵၼ်လၢႆလၢႆၸုမ်းသေၼႄ။ ၼင်ႇႁိုဝ် ၶဝ်ပေႃးတေဢမ်ႇတီႉလႆႈၼၼ်ႉ ၸႂ်ႉၵူႈလၢႆးသေ ၼႄၶႃႈဢေႃႈ။ ၵမ်ႉၼင်ႈသေ ၼႄ ပႆသေၼႄ ႁွင်ႉၵႂၢမ်းၼႄၵၢင်ၸႂ်ၸႃႉၵႂႃႇၸိူဝ်းၼႆႉၶႃႈ”- ၵူၼ်းၼုမ်ႇ မူႇၸေႊ သိုပ်ႇလၢတ်ႈ ၼႄၼင်ႇၼႆ။
ၼွၵ်ႈလိူဝ်ၼၼ်ႉ တၢင်ႇၸႄႈဝဵင်း ၸႄႈမိူင်းလႄႈ တိူင်းၵေႃႈ ၵူၼ်းမိူင်း/ ၵူၼ်းၼုမ်ႇ ႁူမ်ႈၵၼ် ဢွၵ်ႇၼႄၵၢင်ၸႂ် သၢၼ်ၶတ်း တေႃႇသိုၵ်းမၢၼ်ႈ ၸႂ်ႉလၢႆးၵတ်းယဵၼ် ၸႂ်ႉလွၵ်းလၢႆးၵူႈမဵဝ်း ၵူႈပိူင်သေ ၼႄၵၢင်ၸႂ်ၵႂႃႇ ၼင်ႇႁိုဝ် တေဢမ်ႇတူၵ်းလွၵ်း ၼႂ်း မိုဝ်းပလိၵ်ႈ/ သိုၵ်းမၢၼ်ႈ ။
တင်ႈဢဝ်ၶၢဝ်းတၢင်းသိုၵ်းမၢၼ်ႈယိုတ်းဢႃႇၼႃႇမႃးတေႃႇထိုင်ယၢမ်းလဵဝ် ပလိၵ်ႈတီႉၺွပ်းၵူၼ်းမိူင်းၸိူဝ်းၼႄၵၢင်ၸႂ်ၵႂႃႇ 2000 ပၢႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ