ၵူၼ်းမိူင်း ၼမ်ႉၶမ်း ၼႄၵၢင်ၸႂ် လၢႆးမႂ်ႇ သၢၼ်ၶတ်း သိုၵ်းမၢၼ်ႈ ယိုတ်းမိူင်း၊ ႁဵတ်းၶုမ်ၵူၼ်းတၢႆ ႁိမ်းၾင်ႇၼမ်ႉမၢဝ်း တႅမ်ႈၸိုဝ်ႈ ၽူႈၼမ်းၸိၵ်းၸွမ်သိုၵ်းမၢၼ်ႈလႄႈၵူၼ်းၸိူဝ်းႁူမ်ႈမိုဝ်း/ၵမ်ႉထႅမ်သိုၵ်းမၢၼ်ႈ တိတ်းပႃႉသႂ်ႇ တီႈၶုမ် ။
ဝၼ်းတီႈ 14/3/2021 ၵူၼ်းမိူင်း/ ၵူၼ်းၼုမ်ႇ ၼမ်ႉၶမ်း ႁဵတ်းၶုမ်ၵူၼ်းတၢႆႁိမ်းၾင်ႇၼမ်ႉမၢဝ်း တႅမ်ႈၸိုဝ်ႈၽူႈၼမ်း ၸိၵ်းၸွမ်သိုၵ်းမၢၼ်ႈလၢႆလၢႆၵေႃႉလႄႈ ၵူၼ်းၸိူဝ်းႁူမ်ႈမိုဝ်းၵမ်ႉထႅမ်သိုၵ်းမၢၼ်ႈ တိတ်းပႃႉသဵပ်ႇသႂ်ႇၶုမ်ဝႆႉပႃး။
ၵူၼ်းၼုမ်ႇ ၼမ်ႉၶမ်း ၵေႃႉၼိုင်ႈ လၢတ်ႈဝႃႈ – “မိူဝ်ႈဝႃးၼႆႉ ၵူၼ်းမိူင်း ၵူၼ်းၼုမ်ႇ ဢွၼ်ၵၼ်ၵႂႃႇႁဵတ်းၶုမ်ၵူၼ်းတၢႆ တီႈႁိမ်း ၾင်ႇၼမ်ႉမၢဝ်း။ ၵႂႃႇၸဵမ်ၵၢင်ၼႂ်ၸဝ်ႉသေၶုတ်းၶုမ်။ ပဵၼ်လၢႆးၼႄၵၢင်ၸႂ်လၢႆးမႂ်ႇ။ ႁဝ်းၶႃႈ လွမ်လႅမ်ၵႂႃႇႁဵတ်း ဢမ်ႇတၼ်းပၼ်ပိူၼ်ႈႁူႉ။ ယဝ်ႉၵေႃႈ ပေႃႉၶႅပ်းႁၢင်ႈ၊ ပေႃႉ VDO သေ ပွၵ်ႈၶိုၼ်းၵမ်းလဵဝ်ၶႃႈ ။ တိုၼ်းႁဵတ်းႁႂ်ႈ ၽူႈၼမ်းသိုၵ်းမၢၼ်ႈ ယိုတ်းဢႃႇၼႃႇၼၼ်ႉ တူၵ်းသုမ်း ၼၼ်ႉၶႃႈယဝ်ႉ”- ဝႃႈၼႆ။
မိူဝ်ႈဝၼ်းတီႈ 12/3/2021 ယူႇတီႈႁွင်ႈၵၢၼ်ၾၢႆႇလိူမ်ႈလႆႇ ၸႄႈဝဵင်းၼမ်ႉၶမ်း ပၼ်ၾၢင်ႉသတိ ထိုင်ၵူၼ်းမိူင်း ၵူၼ်းၼုမ်ႇ ယႃႇပေဢဝ်သီသိတ်ႇ တႅမ်ႈၸိုဝ်ႈ တႅမ်ႈႁၢင်ႈ ဢမ်ႇၼၼ် တႅမ်ႈလိၵ်ႈ တိတ်းၸွမ်းၶၢင်ႈတၢင်း၊ သဵၼ်ႈတၢင်း၊ တၢင်းပႆ ၸိူဝ်းၼႆႉ ဝႃႈၼႆ။
“ၸႂ်ႈၶႃႈဢေႃႈ ႁဝ်းၶႃႈ ၵူၼ်းၼုမ်ႇၼမ်ႉၶမ်း ၺႃးပၼ်ၾၢင်ႉၶႃႈ ပဵၼ်ၾၢႆႇလိူမ်ႈလႆႇ ၶဝ်မႃးပၼ်ၾၢင်ႉၶႃႈ ယွၼ်ႉမၼ်းတုမ်ႉ တိူဝ်ႉ မတ်ႉတႃ ၾၢႆႇသီႇပိၼ်ႇၶဝ်ၼႆဝႃႇ။ သင်ဝႃႈ ဢမ်ႇထွမ်ႇၸိုင် တေၸွႆးတြႃးၼႆၶႃႈဝႃႇ”- ၵူၼ်းၼုမ်ႇ ၼမ်ႉၶမ်း သိုပ်ႇ လၢတ်ႈ ၼႄၼင်ႇၼႆ။
ပၢင်ၼႄၵၢင်ၸႂ် တီႈၸႄႈဝဵင်းၼမ်ႉၶမ်း ၸိုင်ႈတႆး ပွတ်းႁွင်ႇၼႆႉ ၸဵမ်ၵူၼ်းမိူင်း ၵူၼ်းၼုမ်ႇ ႁူမ်ႈၵၼ် ဢွၵ်ႇၼႄၵၢင်ၸႂ် သၢၼ်ၶတ်းတေႃႇသိုၵ်းမၢၼ်ႈ တင်ႈတႄႇ ဝၼ်းတီႈ 8/2/2021 မႃး တေႃႇထိုင်ယၢမ်းလဵဝ် ဢမ်ႇလႆႈ ၸတ်းပၢင်ယႂ်ႇၵေႃႈ ၸတ်းလဵၵ်ႉ ၸႂ်ႉလၢႆးၵူႈမဵဝ်းၵူႈပိူင်သေ ၸတ်းႁဵတ်းမႃး ဢမ်ႇၵိုတ်း ဢမ်ႇလိုဝ်ႈ ။
လိူဝ်ၼၼ်ႉ လွင်ႈၵူၼ်းမိူင်း ၵူၼ်းၼုမ်ႇ ထုၵ်ႇပလိၵ်ႈသိုၵ်းမၢၼ်ႈ တီႉၺွပ်းတႄႉ ပႆႇမီး။ ၵူၺ်းၵႃႈ ထုၵ်ႇၶဝ် မႃးလွၵ်ႇငိုတ်ႈ တေႃႇၵူၼ်းမိူင်းၵူၼ်းၼုမ်ႇ ဢွၵ်ႇၼႄၵၢင်ၸႂ် ၸိူဝ်းၼႆႉတႄႉ မီးတင်းၼမ်ယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ