ၶႃႈႁၢပ်ႇၵၢၼ်လူင်ပွင်ၸိုင်ႈ တီႈဝဵင်းတူၼ်ႈတီးဢၼ်သၢၼ်ၶတ်းဢႃႇၼႃႇ ၶွင်ႇသီႇသိုၵ်းသေ ၶဝ်ႈႁူမ်ႈ CDM ဢမ်ႇလူင်းၵၢၼ်ၼၼ်ႉ ၾၢႆႇၶွင်ႇသီႇသိုၵ်း ဢွၵ်ႇလိၵ်ႈပိုၼ်ၽၢဝ်ႇ ႁႂ်ႈၶၢႆႉဢွၵ်ႈႁွင်ႈႁိူၼ်း ဢၼ် လူင်ပွင်ၸိုင်ႈပၼ်ယူႇဝႆႉၼၼ်ႉ ဝႃႈၼႆ။
မိူဝ်ႈၼႆႉ ဝၼ်းတီႈ 14/3/2021 ၶွင်ႇသီႇသိုၵ်းပိုၼ်ၽၢဝ်ႇဝႃႈ ၶႃႈႁၢပ်ႇၵၢၼ်လူင်ပွင်ၸိုင်ႈ ၸိူဝ်းဢၼ်ယူႇသၢဝ်း ႁိူၼ်းတႃႇၶႃႈႁၢပ်ႇၵၢၼ်ၶုၼ် ဢၼ်မီးႁိမ်း ႁူင်းယႃၼၢင်းယိင်းလႄႈ လုၵ်ႈဢွၼ်ႇ ပွၵ်ႉတိတ်ႉတေႃးဝဵင်း တူၼ်ႈတီးၼၼ်ႉ မိူဝ်ႈၽုၵ်ႈ ဝၼ်းတီႈ 15/3/2021ၼႆႉ သင်ဝႃႈတေဢမ်ႇမႃးႁၢပ်ႇၵၢၼ်သေ တေႁဵတ်း CDM ထႅင်ႈယူႇၸိုင် မိူဝ်ႈၼႆႉႁႂ်ႈတေႃႉၶူဝ်းဢွၵ်ႇႁႂ်ႈယဝ်ႉတူဝ်ႈဝႃႈၼႆ။
ၵဵဝ်ႇၵပ်းလွင်ႈၼႆႉ ၶႃႈႁၢပ်ႇၵၢၼ်ၶုၼ်လၢတ်ႈဝႃႈ ယွၼ်ႉပိူဝ်ႈၶဝ်ပိုၼ်ၽၢဝ်ႇမႃးၶိုၵ်ႉၶၵ်ႉလႄႈ ဢမ်ႇတၼ်းလႆႈတင်ႈတူဝ်ႁၢင်ႈႁႅၼ်းသင်။ ၵႃႈၼင်ႇတေႃႉလႆႈတႄႉ တေႃႉဢွၵ်ႇယူႇတိၵ်းတိၵ်း။ ဢၼ်ၶၢႆႉဢွၵ်ႇၵေႃႈ မီးတင်းၼမ် ဝႃႈၼႆ။
လိူဝ်ၼၼ်ႉ ၶႃႈႁၢပ်ႇၵၢၼ်ၼႂ်းႁူင်းယႃပွတ်ႇ(အဆုတ်ဆေးရုံ) ၵေႃႈ ၺႃးလိုပ်ႈၶၢႆႉမိူၼ်ၵၼ်။ ၸုမ်းၸွႆႈထႅမ် ပရႁိတတူင်ႇဝူင်းၵူၼ်း မႃးၸွႆႈတေႃႉၶူဝ်းၶၢႆႉဢွၵ်ႇယူႇ ဝႃႈၼႆ။ ဝဵင်းတူၼ်ႈတီးၼႆႉ ၶႃႈႁၢပ်ႇၵၢၼ်ၶုၼ် ဢၼ်ႁဵတ်း CDM ၼႂ်းႁူင်းယႃ ၼၢင်းယိင်ႈလႄႈ လုၵ်ႈဢွၼ်ႇမီး 180 ပၢႆ ။ ဢၼ်ႁဵတ်း CDM ၵေႃႈမီးၵူႈႁွင်ႈၵၢၼ် ၼႆၶႃႈဢေႃႈ။