ပလိၵ်ႈ/ သိုၵ်းမၢၼ်ႈ ယႃႉၾုင်ၵူၼ်းၼႄၵၢင်ၸႂ် တီႈသီႇပေႃႉ ႁၢဝ်ႈႁႅင်း မႃးထပ်းၵၼ် 3 ဝၼ်းပႃးမိူဝ်ႈၼႆႉ။
မိူဝ်ႈၼႆႉ ဝၼ်းတီႈ 12/3/2021 ယၢမ်းၵၢင်ၼႂ် မွၵ်ႈ 9 မူင်းၶိုင်ႈ ပလိၵ်ႈ/ သိုၵ်းမၢၼ်ႈ ၸႂ်ႉလၢႆးႁုၵ်းႁၢႆႉ၊ ဢဝ်မၢၵ်ႇၵႅတ်ႉသ်ၼမ်ႉ တႃ ပွႆႇသႂ်ႇတီႈၾုင်ၵူၼ်းမိူင်း/ ၵူၼ်းၼုမ်ႇ ၼႄၵၢင်ၸႂ် တီႈပွၵ်ႉပူႇတႃႇ တင်း ပွၵ်ႈၸၢင်ႈၶမ်းႁွင်ႇ ႁိမ်းၵၢတ်ႇ ၼႂ်းၸႄႈဝဵင်း သီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၼႆယဝ်ႉ။
ၵူၼ်းၼုမ်ႇ ၽူႈၶဝ်ႈႁူမ်ႈ တူင်ႉၼိုင် ၼႂ်းပၢင်ၼႄၵၢင်ၸႂ် တီႈသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ပလိၵ်ႈသိုၵ်းမၢၼ်ႈ ပွႆႇမၢၵ်ႇ ၵႅတ်ႉသ်ၼမ်ႉတႃ သႂ်ႇတီႈၵူၼ်းမိူင်းၼႄၵၢင်ၸႂ် ႁၢဝ်ႈႁႅင်းၼႃႇ ။ မိူဝ်ႈၵူႈဝၼ်းပူၼ်ႉမႃး ၶဝ်ႁၢမ်ႈႁႄႉယူႇ၊ တီႉၵူၼ်းယူႇ ၊ ၵူၺ်းၶဝ်ဢမ်ႇပွႆႇမၢၵ်ႇၵႅတ်ႉသ်ၼမ်ႉတႃၼမ်ထၢၼ်ႇၼႆႉ။ မိူဝ်ႈၼႆႉတႄႉ ပွႆႇၼမ်ၶႃႈဢေႃႈ”- ဝႃႈၼႆ။
ပၢင်ၼႄၵၢင်ၸႂ် တီႈသီႇပေႃႉ မိူဝ်ႈၼႆႉ တီႈပွၵ်ႉပူႇတႃႇၼၼ်ႉ ထုၵ်ႇပလိၵ်ႈ/ သိုၵ်းမၢၼ်ႈ ပွႆႇမၢၵ်ႇၵႅတ်ႉသ်ၼမ်ႉတႃသႂ်ႇ 6-7 လုၵ်ႈ၊ တီႈႁိမ်းၵၢတ်ႇ ပွၵ်ႉၸၢင်ႈၶမ်းႁွင်ႇသမ်ႉ 4-5 လုၵ်ႈ ၼႆယဝ်ႉ။
“လႆႈငိၼ်းဝႃႈ တီႈသီႇပေႃႉႁဝ်းၶႃႈၼႆႉ လႆႈငိၼ်းဝႃႈၶဝ်ပိုၼ်ၽၢဝ်ႇဝႆႉ တေတီႉၵူၼ်းမိူင်း ၵူၼ်းၼုမ်ႇ ဢွၵ်ႇၼႄၵၢင်ၸႂ် တႃႇ 20 ၵေႃႉၼႆဝႃႇ။ ၵူၺ်းၵႃႈ တေႃႇထိုင် မိူဝ်ႈလဵဝ်ၼႆႉ ပႆႇႁၼ်ၶဝ်တီႉသေၵေႃႉၶႃႈ”- ၵူၼ်းၼုမ်ႇ သီႇပေႃႉ လၢတ်ႈၼႄၼင်ႇၼႆ။
တေႃႇထိုင်ၶၢဝ်းယၢမ်းၵၢင်ဝၼ်းၸၢႆႉ ၵူၼ်းမိူင်းသီႇပေႃႉတိုၵ်ႉၼႄၵၢင်ၸႂ်ႁၢဝ်ႈႁႅင်းသေ ၾၢႆႇသိုၵ်းလႄႈပလိၵ်ႈၵေႃႈယင်းပႆႇထွႆထွၼ်ဝႃႈၼႆ။
ပၢင်ၼႄၵၢင်ၸႂ် သၢၼ်ၶတ်းတေႃႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း တီႈသီႇပေႃႉၼႆႉ တႄႇဢဝ် ဝၼ်းဢၼ်သိုၵ်းမၢၼ်ႈ ယိုတ်း ဢႃႇၼႃႇမႃးၼၼ်ႉမႃးသေ တေႃႇထိုင်ယၢမ်းလဵဝ် ၵူၼ်းမိူင်း ၵူၼ်းၼုမ်ႇ ဢွၼ်ၵၼ်ဢွၵ်ႇၵၢင်ၸႂ်သၢၼ်ၶတ်းမႃး ၶိူဝ်းယႂ်း ယဝ်ႉ။ ၼႂ်းၶၢဝ်းတၢင်း သွင်သၢမ်ဝၼ်းမႃးၼႆႉ ပလိၵ်ႈသိုၵ်းမၢၼ်ႈ ၸွမ်းႁႄႉ ၸွမ်းယႃႉၾုင်ၼႄၵၢင် တီႈၼိုင်ႈယဝ်ႉတီႈၼိုင်ႈ မႃးႁၢဝ်ႈႁႅင်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ