သိုၵ်းမၢၼ်ႈလိူၵ်ႈၽူႈၵွၼ်းပွၵ်ႉတီႈဝဵင်းလႃႈသဵဝ်ႈ လူၺ်ႈဢမ်ႇပႃးၵၢင်ၸႂ်ၵူၼ်းမိူင်းလႄႈမီး ၵူၼ်းမိူင်းၼႄၵၢင်ၸႂ်သၢၼ်ၶတ်း၊ ပလိၵ်ႈသိုၵ်းမၢၼ်ႈ တီႉၺွပ်းၵႂႃႇ 3 ၵေႃႉ ။
ဝၼ်းတီႈ 10/3/2021 ပလိၵ်ႈသိုၵ်းမၢၼ်ႈ လိူၵ်ႈၽူႈၵွၼ်းပွၵ်ႉ 11 တီႈၼမ်ႉပႃၶီး ၸႄႈဝဵင်းလႃႈသဵဝ်ႈ။ ၵူၼ်းၼုမ်ႇဢမ်ႇလႆႈၸႂ်သေ ဢွၵ်ႇၼႄၵၢင်ၸႂ်သၢၼ်ၶတ်း ။ ထုၵ်ႇပလိၵ်ႈသိုၵ်းမၢၼ်ႈတီႉၺွပ်း ၵုမ်းတူဝ်ၵႂႃႇ 2 ၵေႃႉ။
ၵူၼ်းၼုမ်ႇ လႃႈသဵဝ်ႈ ၵေႃႉၼိုင်ႈ လၢတ်ႈဝႃႈ – “ ၶဝ်တီႉၵူၼ်းၼုမ်ႇ 2 ၵေႃႉၵႂႃႇ၊ ပဵၼ်မွင်ႇၸေႃႇၺီႇၺီႇသူၺ်ႇ တင်း မွင်ႇလွၼ်းတၢႆႇ။ ၵမ်းၼႆႉပႃႈၼၢင်းမျႃႉထူၺ်း ၵေႃႉပဵၼ်မႄႈ ၸေႃႇၺီႇၺီႇသူၺ်ႇ သမ်ႉ ၵူဝ်ပိူၼ်ႈႁႅမ်လုၵ်ႈမၼ်းၼႆသေ ပေႃးသူၺွပ်းလုၵ်ႈၵဝ်ၵေႃႈ ၵဝ်တေၵႂႃႇၸွမ်းၼႆလႄႈ တင်းမူတ်းပဵၼ်ၵႂႃႇ 3 ၵေႃႉၶႃႈဢေႃႈဢၼ်ပႃးၵႂႃႇၸွမ်းပလိၵ်ႈ”- ဝႃႈၼႆ။
တီႈၸႄႈဝဵင်းလႃႈသဵဝ်ႈၼႆႉ ၵူၼ်းမိူင်း/ ၵူၼ်းၼုမ်ႇ ဢွၵ်ႇၼႄၵၢင်ၸႂ် သၢၼ်ၶတ်းတေႃႇသိုၵ်း မၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး ဢမ်ႇၵိုတ်း ဢမ်ႇလိုဝ်ႈ မီးၶၢဝ်းတၢင်း လိူၼ်ပၢႆယဝ်ႉ ။ ပလိၵ်ႈလႄႈသိုၵ်းၵေႃႈ ဢဝ်ဢဵၼ်ႁႅင်းၶဝ်ႈပေႃႉထုပ်ႉလမ်းလိုပ်ႈၵူႈဝၼ်း။
“မိူဝ်ႈၼႆႉၵေႃႈပလိၵ်ႈသိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉသေ ယႃႉၾုင်ၵူၼ်းၼႄၵၢင်ၸႂ် ၵူၼ်းၼုမ်ႇႁဝ်းၶႃႈဢေႃႈ။ ၶဝ်တိုၼ်းဢမ်ႇ ပၼ်ႁဝ်းၶႃႈ ၶွၼ်ႈတုမ်ၵၼ်သေဢိတ်း။ ၵမ်ႉဢဝ်မၢၵ်ႇၵႅတ်ႉသ်ပွႆႇ ယိုဝ်းၵွင်ႈသႂ်ႇ ႁဵတ်းၸိူင်ႉၼႆမႃး။ ၵူၺ်းၵႃႈ ၵူၼ်း ၼုမ်ႇႁဝ်းၶႃႈ ပဵၼ်ႇလၢႆးမၼ်းၶႃႈဢေႃႈ ဢမ်ႇၵႂႃႇၶွၼ်ႈၵၼ်တီႈလဵဝ် ပႆတၢင်းယဝ်ႉ။ ၽႄၵၼ် ပဵၼ်လၢႆမူႇ လၢႆၸုမ်းသေ ၵႂႃႇ ၼႄၵၢင်ၸႂ် တီႈၼိုင်ႈယဝ်ႉ တီႈၼိုင်ႈ ႁဵတ်းၼၼ်ၶႃႈ။ ႁဝ်းၶႃႈ ၶွၼ်ႈတုမ်တီႈလဵဝ်ၵၼ်ၼႆႉဢမ်ႇလႆႈ ၵမ်ႉၺႃးၵိၼ်တူၵ်း လွၵ်ႈၶဝ်ၶႃႈဢေႃႈ၊ ပၢင်ၼႄၵၢင်ၸႂ်တႄႉ ႁဝ်းၶႃႈ ဢမ်ႇၵိုတ်းၶႃႈ ဢွၵ်ႇၼႄၵူႈဝၼ်းၶႃႈဢေႃႈ”- ၵူၼ်းၼုမ်ႇ လႃႈသဵဝ်ႈ ၵေႃႉ ၼိုင်ႈ လၢတ်ႈၼႄၼင်ႇၼႆ။
ၵဵဝ်ႇလူၺ်ႈလွင်ႈပၢင်ၼႄၵၢင်ၸႂ် တီႈဝဵင်းလႃႈသဵဝ်ႈၼႆႉသေ ၵူၼ်းမိူင်း/ ၵူၼ်းၼုမ်ႇ ထုၵ်ႇပလိၵ်ႈသိုၵ်းမၢၼ်ႈ တီႉၺွပ်းၵႂႃႇ တင်းမူတ်းမီး 37 ၵေႃႉယဝ်ႉ ဝႃႈၼႆ။
မိူဝ်ႈဝၼ်းတီႈ 8/3/2021 ၼၼ်ႉၵေႃႈ ၵူၼ်းၼုမ်ႇလႃႈသဵဝ်ႈ ထုၵ်ႇပလိၵ်ႈသိုၵ်းမၢၼ်ႈ တီႉၵႂႃႇ 7 ၵေႃႉ ထိုင်မႃးဝၼ်းတီႈ 9 သမ်ႉ ၶိုၼ်းပွႆႇတူဝ်ဢွၵ်ႇမႃး 5 ၵေႃႉ ဝႃႈၼႆ။
