ပၢင်ၼႄၵၢင်ၸႂ် တီႈဝဵင်းတူၼ်ႈတီးမိူဝ်ႈၼႆႉ ၵူၼ်းၼုမ်ႇ ထုၵ်ႇပလိၵ်ႈ သိုၵ်းမၢၼ်ႈတီႉၺွပ်းၵႂႃႇထႅင်ႈ 2 ၵေႃႉ တိူဝ်ႉၺႃးမၢၵ်ႇၵွင်ႈယၢင် မၢတ်ႇၸဵပ်း 1 ၵေႃႉ ။
မိူဝ်ႈၼႆႉ ဝၼ်းတီႈ 10/3/2021 ယၢမ်းၵၢင်ၼႂ် 9 မူင်း ၵူၼ်းၼုမ်ႇဝဵင်းတူၼ်ႈတီး ဢဝ်လၢႆးၵတ်းယဵၼ် ၼႄၵၢင်ၸႂ်သၢၼ်ၶတ်း သိုၵ်းယိုတ်းဢႃႇၼႃႇ လၢႆလၢႆတီႈ။ မိူဝ်ႈၼႆႉၵေႃႈၺႃးပလိၵ်ႈလႄႈ သိုၵ်းဢဝ်မၢၵ်ႇၵႂၼ်းၵႅတ်ႉသ်လႄႈၵွင်ႈမၢၵ်ႇယၢင် ယိုဝ်းသႂ်ႇၵူၼ်းၼႄၵၢင်ၸႂ်။ မီးလွင်ႈမၢတ်ႇၸဵပ်းၽွင်ႈ။ တီႉၺွပ်းလႆႈၵႂႃႇ 2 ၵေႃႉ ။
ၵူၼ်းၼုမ်ႇ ၽူႈၶဝ်ႈႁူမ်ႈတူင်ႉၼိုင် ၼႄၵၢင်ၸႂ် တီႈပွၵ်ႉသူၺ်ႇတထေးၵူင်း တူၼ်ႈတီး လၢတ်ႈဝႃႈ – “ပလိၵ်ႈ တင်း သိုၵ်းမၢၼ်ႈ ဢဝ်မၢၵ်ႇၵႅတ်ႉၼမ်ႉတႃ ပွႆႇသႂ်ႇ ၼႂ်းၾုင်ၵူၼ်းၼႄၵၢင်ၸႂ် ယဝ်ႉၵေႃႈ ယိုဝ်းၵွင်ႈမၢၵ်ႇယၢင်ထႅင်ႈ။”- ဝႃႈၼႆ။
ပၢင်ၼႄၵၢင်ၸႂ် တီႈဝဵင်းတူၼ်ႈတီး မိူဝ်ႈၼႆႉ ယူႇတီႈၵူၼ်းၼုမ်ႇၶဝ်သေ ဢွၼ်ၵၼ် ၸတ်းႁဵတ်းၵႂႃႇ လၢႆလၢႆတီႈ မိူၼ်ၼင်ႇ ပွၵ်ႉသူၺ်ႇတထေးၵူင်း၊ ႁိမ်းၵၢတ်ႇ 212 လႄႈ ပွၵ်ႉ ပီႇတေႃႇတႃႇ ၸိူဝ်းၼႆႉ။ တီႈပၢင်ၼႄၵၢင်ၸႂ်ႁိမ်းၵၢတ်ႇ 212 ၼၼ်ႉ ၵူၼ်းၼုမ်ႇ 2 ၵေႃႉ ၺႃး တီႉၺွပ်းၵႂႃႇ။ တီႈပၢင်ၼႄၵၢင်ၸႂ်ပွၵ်ႉသူၺ်ႇတထေးၵူင်းၼၼ်ႉတႄႉ သိုၵ်းမၢၼ်ႈယိုဝ်းၵွင်ႈ မၢၵ်ႇယၢင်ရႃႇပႃႇသႂ်ႇတိူဝ်ႉမႅၼ်ႈ ၵူၼ်းၼုမ်ႇ ၵေႃႉၼိုင်ႈ မၢတ်ႇၸဵပ်းတီႈလင်။
ဝၼ်းမိူဝ်ႈၼႆႉ သိုၵ်းမၢၼ်ႈ ဢဝ်ႁႅင်းၵူၼ်းသေ ပၼ်ႇလဵပ်ႈဝဵင်းတူၼ်ႈတီး ၸွမ်းယႃႉၾုင်ၵူၼ်းၼႄၵၢင်ၸႂ်။ ပေႃးထိုင်မႃး ယၢမ်းၵၢင်ၶမ်ႈ ၵၢင်ၶိုၼ်းသမ်ႉ ဢမ်ႇပၼ်ၵူၼ်းမိူင်းလႆႈၼွၼ်းယူႇသဝ်းလီ ၸွမ်းလၢမ်းတီႉ ၵူတ်ႇထတ်း ၽႅဝ်ၼႂ်းႁေႃ ၼႂ်းႁိူၼ်း ၸွမ်းပွၵ်ႉယွမ်ႇ ၵူၼ်းမိူင်း ႁၢဝ်ႈႁႅင်း ၼႆယဝ်ႉ။
ဝၢႆးသေ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း တင်ႈဢဝ်ဝၼ်းတီႈ 1/2/2021 ၼၼ်ႉမႃး ႁၼ်ႉတေႃႇထိုင်ယၢမ်းလဵဝ် ၵူၼ်းမိူင်း ၵူၼ်းၼုမ်ႇ ၸႄႈဝဵင်းတူၼ်ႈတီး ႁူမ်ႈၵၼ် ၼႄၵၢင်ၸႂ် သၢၼ်ၶတ်းတေႃႇသိုၵ်းမၢၼ်ႈယိုတ်းဢႃႇၼႃႇ ၸိုင်ႈမိူင်းမႃး ႁၢဝ်ႈႁႅင်း ဢမ်ႇၵိုတ်းဢမ်ႇလိုဝ်ႈ မီးၶၢဝ်းတၢင်း 30 ဝၼ်းပၢႆ ။ ၵူၼ်းၼုမ်ႇတူၼ်ႈတီး ထုၵ်ႇပလိၵ်ႈ သိုၵ်းမၢၼ်ႈ တီႉၺွပ်းၵႂႃႇ ဢမ်ႇယွမ်း 50 ၵေႃႉ ယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ