သိုၵ်းမၢၼ်ႈ ဢဝ်ဢဵၼ်ႁႅင်း  100 ပၢႆ ၶိုၼ်ႈလေႃႇတိုၵ်း SSPP တီႈၸႄႈဝဵင်းၼမ်ႉတူႈ  သွင်ၾၢႆႇတိုၵ်ႉထႅမ်ႁႅင်းၶဵင်ႈၶႅင်ၵၼ်ဝႆႉ ဝႃႈၼႆ။

ဝၼ်းတီႈ 8/3/2021 ယၢမ်းၵၢင်ၼႂ် 6:30 မူင်း တေႃႇထိုင် 7:20 မူင်း သိုၵ်းမၢၼ်ႈ တပ်ႉမ 88 လႄႈ တပ်ႉမ 101 ၶလယ 253 ၶလယ 256 လႄႈ ၶမယ 324 ႁူမ်ႈႁႅင်းဢမ်ႇယွမ်း 100 လေႃႇတိုၵ်း SSPP တီႈၾၢႆႇႁွင်ႇဝၢၼ်ႈဝႃႈ  ဢိူင်ႇၼမ်ႉတွင်ႇၵူင်း ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ  ။

ၽူႈတူင်ႉၼိုင် ၼႂ်းတူင်ႇဝူင်းတႆးၼႂ်းၸႄႈဝဵင်းတီႈၼမ်ႉတူႈ လၢတ်ႈဝႃႈ – “ၸႂ်ႈၶႃႈဢေႃႈ ပဵၼ်သိုၵ်းမၢၼ်ႈလေႃႇတိုၵ်း SSPP ၵမ်းလဵဝ်ၶႃႈယဝ်ႉ။ သွင်ၾၢႆႇ သဵင်ၵွင်ႈတႅၵ်ႇ  ႁိုင်မွၵ်ႈ ၼိုင်ႈၸူဝ်ႈမူင်းၼႆႉ။ ငိၼ်းဝႃႈ သိုၵ်းမၢၼ်ႈ ႁႅၼ်းသိုၵ်းလေႃႇတိုၵ်း ဢမ်ႇယွမ်းပၢၵ်ႇၼႆၶႃႈ”- ဝႃႈၼႆ။

လွင်ႈၼႆႉႁူင်းပွႆႇသဵင်တႆးႁုၼ်ႈမႂ်ႇၵေႃႈဢွၵ်ႇဝႆႉဝႃႈ သိုၵ်းမၢၼ်ႈ လၢႆလၢႆတပ်ႉၵွင်တႂ်ႈတပ်ႉမ 88   လႄႈ  တႂ်ႈတပ်ႉမ 101   ႁူမ်ႈႁႅင်းၵၼ် 140 ၵေႃႉ ၶိုၼ်ႈလေႃႇတိုၵ်း SSPP ဢၼ်မီးတၢင်းၾၢႆႇႁွင်ႇဝၢၼ်ႈဝႃႈ ဝႃႈၼႆဝႆႉ။

ဢိင်ၼိူဝ်လွင်ႈၼႆႉ ၽူႈတူင်ႉၼိုင် ၼႂ်းၵၢၼ်သိုၵ်း တၢင်းပွတ်းၼမ်ႉတူႈ ၵေႃႉၼိုင်ႈဝႃႈ ယၢမ်းလဵဝ် တင်းသွင်ၾၢႆႇၵေႃႈ တိုၵ်ႉၶဵင်ႈၶႅင်ၵၼ်ဝႆႉယူႇလႄႈ လွင်ႈၵူၼ်းမၢတ်ႇၸဵပ်းလူႉတၢႆတႄႉ ပႆႇႁူႉ ၵူၺ်းၵႃႈ တင်းၾၢႆႇသိုၵ်းမၢၼ်ႈတႄႉ မီးယူႇ လွင်ႈ မၢတ်ႇၸဵပ်းလူႉတၢႆ ၼမ်လႄႈဢေႇ ဝႃႈၼႆ။

ၵဵဝ်ႇၵပ်းလွင်ႈၼႆႉသေ ယူႇတီႈၸဝ်ႈႁၢၼ် တၢၼ်းဢွင်ႇ ၽူႈၶၢၼ်ပၢၵ်ႇ SSPP တႄႉ လၢတ်ႈဝႃႈ – “လွင်ႈပဵၼ်ပၢင်တိုၵ်းၵၼ် တင်းၼမ်ႉတူႈၼၼ်ႉ သိုၵ်းမၢၼ်ႈၶဝ် ႁဵတ်းပၢင်တိုၵ်းတူႉ/ ပွမ်ၵူၺ်း ၶဝ်ယိုဝ်းႁင်းၵူၺ်း ယိုဝ်းၾၢႆႇလဵဝ်ၵူၺ်း။ တင်းႁဝ်းတႄႉ ဢမ်ႇပဵၼ်၊ ႁဝ်းတႄႉ တိုၼ်းဝႃႈၶဝ်ယဝ်ႉ ယႃႇပေမႃးၵဝ်း မႃးယိုဝ်းၸွမ်းၼႂ်းထိူၼ်ႇ ပေႃးၶဝ်မႃးၵဝ်းၼႂ်းထိူၼ်ႇၸိုင် ႁဝ်းတေ မၢင်ၶဝ်ၽႅဝ်ၼႂ်းဝဵင်းၶႃႈယဝ်ႉ” – ဝႃႈၼႆ။

ဝၢႆးသေ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း မိူဝ်ႈဝၼ်းတီႈ 1/2/2021 ၼႆႉသေ တပ်ႉသိုၵ်းမၢၼ်ႈ ပိုတ်ႇၼႃႇသိုၵ်း တေႃႇ SSPP ၼႂ်းၵႄႈ မူႇၸေႊ – ၵူတ်ႇၶၢႆ မႃးယဝ်ႉၵမ်းၼိုင်ႈ ။ ထုင်ႉၸႄႈဝဵင်းၵျွၵ်ႉမႄး၊ ၼမ်ႉတူႈၼႆႉ မီးၸုမ်း ယိပ်းၵွင်ႈၵၢင်ႇလၢႆလႆၢၸုမ်း တူင်ႉၼိုင်။ ပၢင်တိုၵ်းၵေႃႈပဵၼ်ဢမ်ႇထၢတ်ႇ။

ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ပဵၼ်ၸုမ်းလူင်းလၢႆးမိုဝ်း ၵိုတ်းတိုၵ်းၸၼ်ႉၸႄႈမိူင်းလႄႈ ၸၼ်ႉ မိူင်းႁူမ်ႈတုမ်ဝႆႉ ၸုမ်းၼိုင်ႈ ။