ပၢင်ၼႄၵၢင်ၸႂ် တီႈသီႇပေႃႉ ပလိၵ်ႈ/သိုၵ်းမၢၼ်ႈ ႁၢမ်ႈႁႄႉဢမ်ႇပၼ် ၵူၼ်းမိူင်း/ ၵူၼ်းၼုမ်ႇ ဢွၵ်ႇၼႄၵၢင်ၸႂ် ပဵၼ်ဝၼ်း ႁႅၵ်ႈ ဝႃႈၼႆ။
မိူဝ်ႈၼႆႉ ဝၼ်းတီႈ 10/3/2021 ယၢမ်းၵၢင်ၼႂ် ၵူၼ်းမိူင်း/ ၵူၼ်းၼုမ်ႇ တီႈၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ တေၶွၼ်ႈတုမ် ႁူမ်ႈၵၼ် ဢွၵ်ႇၼႄၵၢင်ၸႂ် သၢၼ်ၶတ်းတေႃႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းထႅင်ႈ ယူႇတီႈ ပလိၵ်ႈသိုၵ်းမၢၼ်ႈ ႁၢမ်ႈႁႄႉ ဝၼ်းႁႅၵ်ႈ ဢမ်ႇပၼ်ၵူၼ်းမိူင်း/ ၵူၼ်းၼုမ်ႇ ဢွၵ်ႇၼႄၵၢင်ၸႂ် ၼႆယဝ်ႉ။
ၵူၼ်းၼုမ်ႇ သီႇပေႃႉ ၽူႈၶဝ်ႈႁူမ်ႈတူင်ႉၼိုင်ၵေႃႉၼိုင်ႈ လၢတ်ႈဝႃႈ – “မိူဝ်ႈၼႆႉ ပလိၵ်ႈသိုၵ်းမၢၼ်ႈ ၶဝ်မႃးႁၢမ်ႈႁႄႉႁဝ်းၶႃႈ ဢမ်ႇပၼ် ဢွၵ်ႇၼႄၵၢင်ၸႂ်ၶႃႈ၊ ၶဝ်ဝႃႈ ပဵၼ်ၶေႃႈၸီႉသင်ႇ တင်းၼိူဝ်လူင်းမႃး။ တေဢမ်ႇလႆႈၶွၼ်ႈတုမ်ၵၼ် 5 ၵေႃႉၶိုၼ်ႈ ၼိူဝ်။ ၼႂ်းၶၢဝ်းတၢင်း 15 မိၼိတ်ႉၼႆႉ ႁႂ်ႈလႆႈယၢႆႈၽုင်ၵၼ်ဝႆးဝႆးၼႆၶႃႈ”- ဝႃႈၼႆ။
ပလိၵ်ႈသိုၵ်းမၢၼ်ႈ ပႃးၵွင်ႈၸေးမိုဝ်းၵၼ် ဢဝ်ၵႃးသိုၵ်း၊ ၵႃးၼမ်ႉ၊ ၵႃးပလိၵ်ႈ၊ ၵႃးၶွၵ်ႈ ၸိူဝ်းၼႆႉ ဢွၵ်ႇ မႃးလွၵ်ႈငိုတ်ႈၼႄၵူၼ်းမိူင်း မႃးႁၢမ်ႈႁႄႉ ၼႆယဝ်ႉ။
“လွင်ႈၶဝ်မႃးႁႄႉႁၢမ်ႈၸိူင်ႉၼႆ ႁဝ်းၶႃႈ ဢမ်ႇႁၼ်လီၸွမ်းၶႃႈ ဢၼ်ႁဝ်းၶႃႈ ဢွၵ်ႇ ၼႄၵၢင်ၸႂ်ၼႆႉ ဢမ်ႇၸႂ်ႉလၢႆးႁုၵ်ႉႁၢႆႉ သင်သေ ၼႄၶႃႈ။ ႁဝ်းၶႃႈ ၼႄၵၢင်ၸႂ် သၢၼ်ၶတ်းလၢႆးၵတ်းယဵၼ် ပုၼ်ႈတႃႇ ၼႂ်းဝဵင်းႁဝ်းၶႃႈၸိူင်ႉၼၼ်ၵူၺ်း လွင်ႈၶဝ် မႃးႁႄႉႁၢမ်ႈ ယႃႉၸိူင်ႉၼႆ မၼ်းဢမ်ႇသၢင်ႇထုၵ်ႇ ၼႂ်းၸႂ်ႁဝ်းၶႃႈတႄႉ ဢမ်ႇလႆႈၸႂ် ၸႂ်လမ်တႄႉၶႃႈဢေႃႈ၊ ၵူၺ်းၵႃႈ ၼင်ႇ ႁိုဝ် CDM ပေႃးတေဢွင်ႇပေႉၵႂႃႇၼၼ်ႉ ႁဝ်းၶႃႈ ၵူၼ်းၼုမ်ႇ ဢမ်ႇယွမ်းၵၼ်ႉၶႃႈ တေတေႃႇသူႈၵႂႃႇထႅင်ႈ ဢမ်ႇလႆႈၶွၼ်ႈ တုမ်တီႈၼိုင်ႈၵေႃႈ တေၶွၼ်ႈတုမ်သေတီႈတီႈသေ ႁဵတ်းသၢင်ႈၵႂႃႇၶႃႈ”- ၵူၼ်းၼုမ်ႇ သီႇပေႃႉ သိုပ်ႇလၢတ်ႈၼႄ ၼင်ႇၼႆ။
မိူဝ်ႈၼႆႉ လိူဝ်သေတီႈသီႇပေႃႉယဝ်ႉ ဢၼ်သိုၵ်းလႄႈပလိၵ်ႈမၢၼ်ႈဢဝ်ဢဵၼ်ႁႅင်းယႃႉၵူၼ်းၼႄၵၢင်ၸႂ်ႁၢဝ်ႈႁႅင်းမီးလၢႆလၢႆးဝဵင်း မိူၼ်ၼင်ႇ တူၼ်ႈတီး၊ ၵျွၵ်ႉမႄး၊သီႇပေႃႉ၊ လႃႈသဵဝ်ႈ ၊ မူၸေႊ ၸဵမ်ၸိူဝ်းၼႆႉ။ တီႈၵျွၵ်ႉမႄးၵေႃႈ လႆႈႁူႉဝႃႈပလိၵ်ႈပေႃႉထုပ်ႉလုၵ်ႈဢွၼ်ႇ/ၵူၼ်းၼုမ်ႇမၢတ်ႇၸဵပ်းႁၢဝ်ႈႁႅင်း 2 ၵေႃႉ။ လွင်ႈႁၢဝ်ႈႁႅင်းပဵၼ်ၸၼ်ႉသီလႅင်ဝႆႉ လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ