ၾၢႆႇယေးငိုၼ်းၸိုင်ႈမိူင်း ၶွင်ႇသီႇသိုၵ်းမၢၼ်ႈ ဢွၵ်ႇလိၵ်ႈပိုၼ်ၽၢဝ်ႇႁႂ်ႈပိုတ်ႇယေးငိုၼ်းဝၼ်းတီႈ 8/3/2021 မိူဝ်ႈၼႆႉသေတႃႉ ယေးငိုၼ်းပႆႇႁတ်းပိုတ်ႇသေဢၼ်။
ဝၼ်းတီႈ 5/3/2021 ငဝ်ႈငုၼ်းယေးငိုၼ်းၸိုင်ႈမိူင်း မိူင်းမၢၼ်ႈ ဢွၵ်ႇလိၵ်ႈပိုၼ်ၽၢဝ်ႇၽိုၼ်ၼိုင်ႈဝႃႈ ၼင်ႇႁိုဝ် ၵၢၼ်ပၢႆးမၢၵ်ႈမီး ၵၢၼ်တေႃႉသူင်ႇၶူဝ်းၵုၼ်ႇ တေမိူၼ်ၵဝ်ႇၶိုၼ်းၼၼ်ႉ ႁႂ်ႈဢွၼ်ၵၼ်ပိုတ်ႇယေးငိုၼ်းၶိုၼ်းၼႂ်းဝၼ်းတီႈ 8/3/2021 ။ သင်ဝႃႈဢမ်ႇပိုတ်ႇယေးငိုၼ်းၸွမ်းၼင်ႇၶေႃႈပူင်ၸိုင်တေဢဝ်လိူင်ႈႁႂ်ႈထိုင်တီႈဝႃႈၼႆ။
ၽူႈမီးပုၼ်ႈၽွၼ်း ၵူၼ်းႁဵတ်းၵၢၼ်ယေးငိုၼ်း ၵေႃႉၼိုင်ႈ တီႈတႃႈၶီႈလဵၵ်း လၢတ်ႈဝႃႈ – “ၸႂ်ႈၶႃႈဢေႃႈ ၶဝ်ႁႂ်ႈပၢၼ်ႇ ပိုတ်ႇၵူႈတီႈတီႈၼႆၶႃႈဢေႃႈမိူဝ်ႈၼႆႉ။ ႁဝ်းၶႃႈသမ်ႉ လႆႈၵူဝ်သိုၵ်းၶႃႈဢေႃႈ ယူဝ်ၶႄးၶဝ်တေလၢႆႈၶူဝ်းသေ မႃးၸူၼ်ႁဝ်းၶႃႈၵေႃႈၸၢင်ႈပဵၼ်လႆႈ။ ၼႂ်းသိုၵ်းၼႆႉသမ်ႉ ၶဝ်ႁႃငိုၼ်းယၢပ်ႇ မိူဝ်ႈလဵဝ်ၼႆႉ ဢမ်ႇပိုတ်ႇ ၶဝ်သမ်ႉ ဢဝ်ပၵ်းပိူင် မႃးတဵၵ်းတဵင်ၸႂ်ႉပိုတ်ႇ ၶမ်ၸႂ်ဝႆႉ ၶႃႈဢေႃႈၼႆႉ”- ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇ ယေးငိုၼ်းငဝ်ႈငုၼ်းၸိုင်ႈမိူင်း မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉ မိူဝ်ႈဝၼ်းတီႈ 5/3/2021 ႁႂ်ႈယေး ငိုၼ်း ၵူႈတီႈ ဢမ်ႇဝႃႈယေးငိုၼ်းလူင်၊ ယေးငိုၼ်းဢွၼ်ႇ(ၵိင်ႇၽႄ) ၸိူဝ်းၼႆႉ ႁႂ်ႈလႆႈပိုတ်ႇပၼ် သင်ဝႃႈ ဢမ်ႇပိုတ်ႇမိူဝ်ႈၼႆႉ ဝၼ်းတီႈ 8 ၼႆႉၸိုင် တေဢဝ်လိူင်ႈလၢဝ်း ပၼ်တူတ်ႈတၢမ်ႇၼၵ်းၼႃ ဝႃႈၼႆ။
ၵူၼ်းမိူင်းတူၼ်ႈတီး ၵေႃႉၼိုင်ႈ လၢတ်ႈဝႃႈ – “မိူဝ်ႈၼႆႉ တီႈတူၼ်ႈတီးတႄႉ ပၢၼ်ႇဢမ်ႇပႆႇပိုတ်ႇသေတီႈ သေဢၼ်ၶႃႈ။ ၽႂ်ၵေႃႈ ဢမ်ႇၶႂ်ႈပိုတ်ႇလေႃႇ ဝၢၼ်ႈမိူင်းသုၵ်ႉသၵ်ႉၸိူင်ႉၼႆ ယၢမ်းလဵဝ်ၼႆႉပဵၼ်ၽွင်းယၢမ်းၵိၼ်းၸႂ်ၵၼ် ၵူၼ်းမိူင်းၵေႃႈ ၵိၼ်းၸႂ် ပလိၵ်ႈသိုၵ်းမၢၼ်ႈၵေႃႈ ၵိၼ်းၸႂ် ၵမ်ႉမီးၵူၼ်းၶဝ်ႈၸူၼ်ၼႂ်းပၢၼ်ႇတႄႉ သုၵ်ႉသၵ်ႉထႅင်ႈၵွၼ်ႇၶႃႈဢေႃႈ”- ဝႃႈၼႆ။
တင်ႈတႄႇဝၼ်းတီႈ 3/2/2021 မႃး ၸုမ်းၸဝ်ႈယေးငိုၼ်း ပိုၼ်ၽၢဝ်ႇဝႆႉ ႁႂ်ႈပိၵ်ႉဢိုတ်းယေးငိုၼ်းဝႆႉၸူဝ်ႈၶၢဝ်း။ ထိုင်ဝၼ်းတီႈ 15 မႃးၸုမ်းယေးငိုၼ်းၶဝ်ႈႁူမ်ႈၶူင်းၵၢၼ် CDM တေႃႇထိုင်ဝၼ်းမိူဝ်ႈၼႆႉပႆႇလူင်းႁဵတ်းၵၢၼ်ၶိုၼ်း၊ ၵူၼ်းမိူင်းလႆႈၸႂ်ႉဝတ်း ATM ထွၼ်ဢဝ်ငိုၼ်းတီႈတူႈငိုၼ်းၵူၺ်း။
ဢၼ် ၵူၼ်းမိူင်းတႆး ၸႂ်ႉၼမ်တႄႉပဵၼ်ယေးငိုၼ်း(ပၢၼ်ႇ) ၵမ်ႇပေႃးၸ (KBZ)၊ ဢီႊယႃႊပၢၼ်ႇ (AYA Bank)၊ CB Bank ၊ ယူဝ်းမႃႉပၢၼ်ႇ (Yoma Bank) လႄႈ MAB Bank ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ