မိူဝ်ႈၼႆႉ ဝၼ်းတီႈ 8/3/2021 ၵူၼ်းမိူင်း ၸႄႈဝဵင်းလွႆလႅမ်-ပၢင်လူင် ဢွၵ်ႇၼႄၵၢင်ၸႂ်သၢၼ်ၶတ်းသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း၊ ပလိၵ်ႈ/ သိုၵ်းမၢၼ်ႈ တီႉၺွပ်းၵူၼ်းမိူင်း ၼွၵ်ႈဝဵင်းၼႂ်းဝဵင်းတင်းမူတ်း 13 ၵေႃႉဝႃႈၼႆ။
ၵူၼ်းပိုၼ်ႉတီႈ လွႆလႅမ် လၢတ်ႈဝႃႈ – “ ၸႂ်ႈၶႃႈဢေႃႈ မိူဝ်ႈၼႆႉ ယၢမ်းၵၢင်ၼႂ် ၵူၼ်းမိူင်းလွႆလႅမ် ၺႃးတီႉ 3 ၵေႃႉ။ ၵေႃႉ ၼိုင်ႈ ပဵၼ်မေႃသွၼ် တေႃႇၶျႄႇရီႊ ဢႃယု 40 ပၢႆ ယူႇပွၵ်ႉ 4 ၊ မသူၺ်ႇသူၺ်ႇ ဢႃယု 23 ပီ ၵူၼ်းပွၵ်ႉ 1 ယဝ်ႉၵေႃႈ ၵျွင်းသြႃႇ ဢူးၶိၼ်ႇမွင်ႇတၢၼ်း ဢႃယု 60 ပီ ”- ဝႃႈၼႆ။
တေႃႇၶျႄႇရီႊ တင်း မသူၺ်ႇသူၺ်ႇ ထုၵ်ႇပလိၵ်ႈတီႉ တီႈၵၢင်ဝဵင်းလွႆလႅမ်။ ဢူးၶိတ်ႇမွင်ႇတၢၼ်းသမ်ႉ ၺႃးတီႉ တီႈတၢင်းဢွၵ်ႇၵႂႃႇ လွႆလႅမ် – ပၢင်လူင် ။ ၼွၵ်ႈလိူဝ် ၼၼ်ႉ ၵူၼ်းၼုမ်ႇဢၼ်ၼႄၵၢင်ၸႂ်သၢၼ်ၶတ်းသိုၵ်းမၢၼ်ႈ တီႈဝဵင်းပၢင်လူင် ၵေႃႈ ၺႃးတီႉ တၢင်းၼႃႈၵွင်းမူး ပၢင်လူင် ၊ ၵူၼ်းမိူင်းဢၼ်ၺႃးတီႉမိူဝ်ႈၼႆႉတင်းမူတ်းမီး 13 ၵေႃႉ – ၵူၼ်းပိုၼ်ႉတီႈ လွႆလႅမ် သိုပ်ႇလၢတ်ႈၼႄ ၼင်ႇၼႆ။
ၵူၼ်းၺႃးတီႉၸိူဝ်းၼႆႉၵမ်ႈၽွင်ႈၵေႃႈ ၺႃးတီႉၼႂ်းပၢင်ၼႄၵၢင်ၸႂ် ၵမ်ႈၽွင်ႈၵေႃႈၺႃးတီႉၼိူဝ်သဵၼ်ႈတၢင်း၊ ယၢမ်းလဵဝ်တႃႇဢဝ်ၵူၼ်းၼုမ်ႇၺႃးတီႉၸိူဝ်းၼၼ်ႉဢွၵ်ႇမႃးထဝ်ႈဝၢၼ်ႈထဝ်ႈၼႃးလႄႈ ၽူႈယႂ်ႇၵူၼ်းလူင်တိုၵ်ႉၸွႆႈၵၼ်ၶိုင်ယူႇ ၵူၼ်းၼုမ်ႇပၢင်လူင်ၵေႃႉၼိုင်ႈလၢတ်ႈ။
ပၢင်ၼႄၵၢင်ၸႂ် တီႈလွႆလႅမ် – ပၢင်လူင်ၼႆႉ ၵူၼ်းမိူင်း/ ၵူၼ်းၼုမ်ႇ ၶွၼ်ႈတုမ်ၵၼ် တီႈလဵဝ်သေ ဢွၵ်ႇၼႄ ၵၢင်ၸႂ် – ႁဵတ်းၼႆၵူႈဝၼ်း။ မိူဝ်ႈၼႆႉၵေႃႈတေႃႈၼင်ႇၼၼ်။ ၵူၺ်းၵႃႈ ပလိၵ်ႈ/ သိုၵ်းမၢၼ်ႈ ၶဝ်ႈတီႉၵူၼ်းမိူင်းၼႄၵၢင်ၸႂ်မိူဝ်ႈၼႆႉ လႆႈဝႃႈပဵၼ်ဢၼ်သိုၵ်းမၢၼ်ႈၸႂ်ႉလၢႆးႁုၵ်ႉႁၢႆႉတီႉၺွပ်းပဵၼ်ပွၵ်ႈႁႅၵ်ႈ ၵူၼ်းလွႆလႅမ်လၢတ်ႈၼင်ႇၼႆ။
“ပၢင်ၼႄၵၢင်ၸႂ် တီႈလွႆလႅမ် – ပၢင်လူင်ၼႆႉ ယူႇတီႈပလိၵ်ႈသိုၵ်းမၢၼ်ႈ ယိုဝ်းၵွင်ႈမၢၵ်ႇယၢင် ပွႆႇမၢၵ်ႇၵႅတ်ႉၼမ်ႉတႃတႄႉပႆႇ မီး။ ၵူၺ်းၵႃႈ မိူဝ်ႈၼႆႉတႄႉ ၶဝ်လၢမ်းတီႉၺွပ်းၵူၼ်းမိူင်းၶႃႈဢေႃႈ။ မိူဝ်ႈၼႆႉ တွၼ်ႈဝႆႉဝၼ်းၼႆႉ ၶဝ်တေလၢမ်းတီႉ ထႅင်ႈ လၢႆ ၵေႃႉတႄႉ ဢမ်ႇႁူႉၶႃႈ၊ ဢၼ်ၶဝ်ၸႂ်ႉလၢႆးႁုၵ်ႉႁၢႆႉ တေႃႇၵူၼ်းမိူင်းမႃးတႄႉ ပႆႇမီးၶႃႈ။ ဢၼ်ၶဝ်လွၵ်ႇငိုတ်ႈတႄႉ မီးမႃးၼမ် ၼႃႇယဝ်ႉၶႃႈ”- ၵူၼ်းၼုမ်ႇ လွႆလႅမ်လၢတ်ႈ။
မိူဝ်ႈဝႃး ဝၼ်းတီႈ 7/3/2021 ယၢမ်းၵၢင်ၼႂ် 10 မူင်း ထိုင် 12 မူင်း ၵေႃႈတီႈဝဵင်းပၢင်လူင် မီးပၢင်ၼႄၵၢင်ၸႂ် ၵမ်ႉထႅမ် သိုၵ်းမၢၼ်ႈ ၼႂ်းၵၢင်ဝဵင်းႁူဝ်ၵူၼ်းၼပ်ႉႁူဝ်သိပ်း။ ၽွင်းၼၼ်ႉ ၵူၼ်းမိူင်းပိုၼ်ႉတီႈသမ်ႉသၢၼ်ၶတ်း တွႆႇပူင်းလိုပ်ႈလမ်း ။ ဢဵၼ်ႁႅင်းၵူၼ်းမိူင်းမီးၼပ်ႉႁူဝ်ပၢၵ်ႇ။
မိူဝ်ႈၼႆႉ ဝၼ်းတီႈ 8 ယူႇတီႈပလိၵ်ႈ/ သိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉ တေႃႇၵူၼ်းမိူင်း ၵူၼ်းၼုမ်ႇ ၸိူဝ်း ဢွၵ်ႇၼႄၵၢင်ၸႂ် ၼႂ်းမိူင်းႁူမ်ႈတုမ် ၼႂ်းမိူင်းတႆး ၸိူဝ်းၼႆႉ ႁၢဝ်ႈႁႅင်း။ မိူၼ်ၼင်ႇၸႂ်ႉမၢၵ်ႈၵွင်ႈ ဢၼ်တႄႉယိုဝ်းသႂ်ႇ၊ ပွႆႇမၢၵ်ႇၵႅတ်ႉသ်ၼမ်ႉတႃ၊ ယိုဝ်းၵွင်ႈ မၢၵ်ႇယၢင်၊ ႁေႃႈၵႃးၽႃႇၵူၼ်းၶီႇရူတ်ႉၶိူင်းၸွမ်းတႃႈၸွမ်းတၢင်း လမ်းတီႈၵူၼ်း ပေႃႉထုပ်ႉ၊ ႁေႉၵူၼ်းမိူင်း ၵူတ်ႇထတ်း ၸွမ်းသဵၼ်ႈတၢင်း ႁၢဝ်ႈႁႅင်း ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ