ပၢင်ၼႄၵၢင်ၸႂ် တီႈမူႇၸေႊ မိူဝ်ႈၼႆႉ ပလိၵ်ႈ/ သိုၵ်းမၢၼ်ႈ တႄႇၸႂ်ႉလၢႆးႁုၵ်ႉႁၢႆႉ ယိုဝ်းၵွင်ႈ မၢၵ်ႇယၢင် ပွႆႇမၢၵ်ႇၵႅတ်ႉသ် ၼမ်ႉတႃ တေႃႇ ၵူၼ်းမိူင်းၼႄၵၢင်ၸႂ် ။
မိူဝ်ႈၼႆႉ ဝၼ်းတီႈ 8/3/2/2021 ယၢမ်းၵၢင်ၼႂ် ၵူၼ်းမိူင်းမူႇၸေႊ ႁူမ်ႈၵၼ်ၼႄၵၢင်ၸႂ် ထႅင်ႈ။ ဢဵၼ်ႁႅင်းၵူၼ်းမိူင်းမီးၼမ်လိူဝ်တၢင်ႇဝၼ်း။ ပလိၵ်ႈ/ သိုၵ်း မၢၼ်ႈ တႄႇၸႂ်ႉလၢႆးႁုၵ်ႉႁၢႆႉ ယႃႉၾုင်ၵူၼ်းမိူင်း မိူၼ်ၼင်ႇ ၸႂ်ႉမၢၵ်ႇၵႅတ်ႉသ်ၼမ်ႉတႃ ၊ ၸႂ်ႉၵွင်ႈမၢၵ်ႇယၢင် ယိုဝ်းသႂ်ႇၵူၼ်းမိူင်း ၼႆယဝ်ႉ။
ၽူႈၶဝ်ႈႁူမ်ႈ ၼႄၵၢင်ၸႂ် တီႈမူႇၸေႊ ၵေႃႉၼိုင်ႈ လၢတ်ႈဝႃႈ – “မိူဝ်ႈၼႆႉတီႈမူႇၸေႊ ပဵၼ်ဝၼ်းဢွၼ်တၢင်းသုတ်းဢၼ်ပလိၵ်ႈ/ သိုၵ်း မၢၼ်ႈ ၸႂ်ႉၵွင်ႈမၢၵ်ႇယၢင် တင်း မၢၵ်ႇၵႅတ်ႉသ်ၼမ်ႉတႃ ပွႆႇသႂ်ႇ ။ ယဝ်ႉၵေႃႈ တီႉဢဝ်ၵူၼ်းၼုမ်ႇၵႂႃႇ မွၵ်ႈ 10 ၵေႃႉ။ မိူဝ်ႈၵႆႈလႆႈငိၼ်းဝႃႈ ၵူၼ်းၼႄၵၢင်ၸႂ် တိူဝ်ႉၺႃးမၢၵ်ႇၵွင်ႈတႄႉ ၵေႃႉၼိုင်ႈ။ တိူဝ်ႈၺႃးတီႈၶႅၼ်။ ”- ဝႃႈၼႆ။
ယၢမ်းလဵဝ်ၵူၼ်းတိူဝ်ႉမၢတ်ႇတီႈၶႅၼ်ၼၼ်ႉ ဢဝ်ၵႂႃႇယူတ်းယႃတူဝ်ဝႆႉဝႃႈၼႆ။
ၾၢႆႇၼိုင်ႈၵေႃႈ ၼင်ႇႁိုဝ် ၵူၼ်းမိူင်းမူႇၸေႊ ပေႃးတေဢမ်ႇဢွၵ်ႇၼႄၵၢင်ၸႂ် လႆႈၼၼ်ႉ ယူႇတီႈပလိၵ်ႈ/ သိုၵ်းမၢၼ်ႈ ၸွမ်းႁႄႉ၊ ၸွမ်းဢိုတ်း၊ ၸွမ်းယႃႉ ဢမ်ႇပၼ်ၵူၼ်းမိူင်းၵူၼ်းၼုမ်ႇၶွၼ်ႈတုမ်ၵၼ် ။ ၵူၺ်းၵႃႈၵူၼ်းမိူင်းမူႇၸေႊ ဢမ်ႇယွမ်းထွႆထွၼ် တိုၵ်ႉသိုပ်ႇၼႄၵၢင်ၸႂ်ၵၼ်ယူႇထႅင်ႈတိၵ်းတိၵ်း ဝႃႈၼႆ။
“မိူဝ်ႈၼႆႉ ယၢမ်းၵၢင်ၼႂ် ၵူၼ်းမိူင်းတင်း ၵူၼ်းၼုမ်ႇ တိုၵ်ႉတႄႇၶွၼ်ႈတုမ်ၵၼ် တီႈပၢင်ႇပွႆး/ ပၢင်ႇၵွင်းမူးၶမ်း မူႇၸေႊ ဢဵၼ် ႁႅင်းမွၵ်ႈ 50 ၵေႃႉ။ ပလိၵ်ႈသိုၵ်းမၢၼ်ႈ မႃးလွမ်ႉတီႈၼၼ်ႈ ဢမ်ႇပၼ်ၵူၼ်းၼုမ်ႇတီႈၼၼ်ႈၶွၼ်ႈတုမ်ၵၼ် ဢွၵ်ႇ ၼႄၵၢင်ၸႂ်ၵၼ်။ ၵူၼ်းၼုမ်ႇ ဢွၼ်ၵၼ်ငိူင်ႉပႅတ်ႈ ၵႂႃႇၶွၼ်ႈတုမ်ၵၼ် တီႈပၢင်လဵၼ်ႈမၢၵ်ႇၼင် မိူင်းႁူမ်ႈတုမ်။ တီႈပၢင်ႇ ႁိူဝ်းမိၼ်ၵေႃႈ ၶဝ်တုမ်ၵၼ်ၶႃႈဢေႃႈ တေမီး 2 တီႈၶႃႈ”- ၵူၼ်းၼုမ်ႇ ၽူႈၶဝ်ႈႁူမ်ႈ ၼႄ ၵၢင်ၸႂ် လၢတ်ႈၼႄၼင်ႇၼႆ။
ၼွၵ်ႈလိူဝ်ၼၼ်ႉ တီႈၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၵေႃႈ ပလိၵ်ႈ/ သိုၵ်းမၢၼ်ႈၸႂ်ႉလၢႆး ႁုၵ်ႉႁၢႆႉ လမ်းတီႉၵူၼ်းမိူင်းၼႄၵၢင်ၸႂ် ၽႅဝ်ထိုင်ၼႂ်းၵၢတ်ႇ ၸိူဝ်းၼႆႉ။
“တီႈတႃႈၶီႈလဵၵ်း ႁိမ်းၵၢတ်ႇသၼ်သၢႆးၼႆႉ ၵူၼ်းမိူင်း/ ၵူၼ်းၼုမ်ႇ တိုၵ်ႉၶွၼ်ႈတုမ်ၵၼ် တေဢွၵ်ႇၼႄၵၢင်ၸႂ် ထုၵ်ႇပလိၵ်ႈ/ သိုၵ်းမၢၼ်ႈ ၸွမ်းဝႅတ်ႉလွမ်ႉ ႁႄႉဢိုတ်းၶႃႈ”- ၽူႈၶဝ်ႈႁူမ်ႈၼႄၵၢင်ၸႂ် တီႈတႃႈၶီႈလဵၵ်း ၵေႃႉၼိုင်ႈ လၢတ်ႈ။
တီႈၸႄႈဝဵင်းမူႇၸေႊ တင်း ၸႄႈဝဵင်းတႃႈၶီႈလဵၵ်းၼႆႉ ပဵၼ်ဝဵင်းဢၼ်တိတ်းၸပ်း လႅၼ်လိၼ်တႆး – ၶႄႇလႄႈ တႆး – ထႆး ဝၢႆးသေ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း မႃးၼႆႉ ၵူၼ်းမိူင်း/ ၵူၼ်းၼုမ်ႇ ႁူမ်ႈၵၼ် ဢွၵ်ႇၼႄၵၢင်ၸႂ် သၢၼ်ၶတ်း တေႃႇသိုၵ်းမၢၼ်ႈမႃး ဢမ်ႇၵိုတ်းဢမ်ႇလိုဝ်ႈ၊ ထႅင်ႈၾၢႆႇၼိုင်ႈၵေႃႈ ဢမ်ႇတွၼ်ႉၺႃး ပလိၵ်ႈ/ သိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉ သေ ပွႆႇမၢၵ်ႇၵႅတ်ႉၼမ်ႉတႃလႄႈ ယိုဝ်းၵွင်ႈမၢၵ်ႇယၢင် သႂ်ႇၸိူဝ်းၼႆႉမႃးသေပွၵ်ႈ။ ၵူၺ်းၵႃႈ ၼႂ်းဝၼ်း သွင်ဝၼ်းမႃးၼႆႉ တႄႇ ၸႂ်ႉလၢႆးႁုၵ်ႉႁၢႆႉ တေႃႇၵူၼ်းမိူင်း ၼႄၵၢင်ၸႂ်မႃး ႁၢဝ်ႈႁႅင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ