Friday, March 29, 2024

ယႃႈယႃႁႄႉၵင်ႈၶူဝ်ႊဝိတ်ႉ ဢၼ်ဢၢၼ်းသမ်းပၼ်ၵူၼ်းမိူင်းၼႂ်းဝၼ်းတီႈ 5 လိူၼ်မၢတ်ႉၶျ်ၼႆႉ ယွၼ်ႉၵၢၼ်မိူင်းသုၵ်ႉယုင်ႈလႄႈ ႁၢင်ႉၵၢတ်ႈပႅတ်ႈ

Must read

ႁွင်ႈၵၢၼ်ၾၢႆႇပၢႆးယူႇလီ ပိုၼ်ၽၢဝ်ႇဝႆႉဝႃႈ ဝၼ်းတီႈ 5/3/2021 ၼႆႉ တေတႄႇသမ်း ယႃႈယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ပၼ်ၵူၼ်းမိူင်း ၼႆသေတႃႉ ယွၼ်ႉပိူဝ်ႈၵၢၼ်မိူင်းသုၵ်ႉယုင်ႈပႅတ်ႈလႄႈ ဢမ်ႇၸၢင်ႈသမ်း၊ ဢဝ်ႁၢင်ႉႁၢတ်ႈၵႂႃႇပႅတ်ႈ။

Image: https://www.thehindubusinessline.com/ ယႃႈယႃႁႄႉၵင်ႈၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19

ၼၢင်းမူဝ်းမူဝ်းဢွင်ႇ ၽူႈမီးပုၼ်ႈၽွၼ်းၾၢႆႇၽွင်းငမ်း ပွၵ်ႉမိင်ႇၵလႃႇဢူး ဝဵင်းတူၼ်ႈတီးလၢတ်ႈတီႈၽူႈတွႆႇႁွၵ်ႈဝႃႈ – “ပေႃးဢဝ်ၽႅၼ်ၵၢၼ်ဝႃႈတႄႉၵူၼ်းမိူင်းတေလႆႈသမ်းမိူဝ်ႈၼႆႉဢေႃႈ။ ဢၼ်ၶဝ်ၽႅၼ်ၵၢၼ်ဝႆႉပၼ်တႄႉ ၵူၼ်းမိူင်းၼႆၵေႃႈတေလႆႈသမ်းၵႂႃႇၵမ်းၶၵ်ႉတွၼ်ႈၼၼ်ႉၶႃႈၼႃႇ။ မိူၼ်ၼင်ႇ- ပၼ်ၶႃႈႁၢပ်ႇၵၢၼ် ၶုၼ်သမ်းဢွၼ်တၢင်း၊ ဝၢႆးၼၼ်ႉ တေပဵၼ်ၵူၼ်းႁဵတ်းၵၢၼ်ၾၢႆႇတေႃႉသူင်ႇ၊ ဝၢႆးၼၼ်ႉတေပဵၼ် ၸုမ်းႁဵတ်းၵၢၼ်ယေးငိုၼ်း၊ ၵူၼ်းႁဵတ်းၵၢၼ်ႁူင်းႁႅမ်း ၸိူဝ်းၼႆႉၼေႃႈ။ ၵူၺ်းၵႃႈတလဵဝ်တႄႉ ငဝ်းလၢႆးဝၢၼ်ႈမိူင်းၵေႃႈ ပဵၼ်ၼႆၵႂႃႇပႅတ်ႈႁေ တေလႆႈသမ်းမိူဝ်ႈလႂ်ၽႂ်ယင်းပႆႇႁူႉဢေႃႈၼႆႉ” – ဝႃႈၼႆ။

- Subscription -

ယႃႈယႃႁႄႉၵင်ႈၶူဝ်ႊဝိတ်ႉ ဢၼ်လႆႈမႃးတီႈ မိူင်းၵြႃး ဢိၼ်ႊတီႊယႃႊ ၼၼ်ႉ ႁွပ်ႈႁႅၵ်ႈ သမ်းပၼ် ၽူႈႁၢပ်ႇၵၢၼ်ၾၢႆႇပၢႆးယူႇလီၼႂ်းဝၼ်းတီႈ 28/1/2021 သေ ႁွပ်ႈ 2 တႃႇၾၢႆႇ ပၢႆးယူႇလီၶဝ် ဢၼ်တေ လႆႈသမ်းၼႂ်းဝၼ်းတီႈ 28/2/2021 ။ ၵူၺ်းၵႃႈတၼ်းလႆသမ်း ႁွပ်ႈႁႅၵ်ႈၵူၺ်း၊ ယွၼ်ႉငဝ်းလၢႆးဝၢၼ်ႈမိူင်း သုၵ်ႉယုင်ႈလႄႈႁွပ်ႈသွင်ဢမ်ႇပဵၼ်သမ်း။

လိူဝ်ၼၼ်ႉဢမ်ႇၵႃး ယႃႈယႃၸုပ်ႈသွင် တေထိုင်မိူင်းမၢၼ်ႈၼႂ်းဝၼ်းတီႈ5/2/2021 ၼႆၼၼ်ႉၵေႃႈ ဢမ်ႇထိုင်မႃးလႄႈ ၽႅၼ်ၵၢၼ်တေဢၢၼ်းသမ်းပၼ်ၵူၼ်းမိူင်း ၼႂ်းဝၼ်းတီႈ 5/3/2021 ၼႆၼၼ်ႉၵေႃႈ လႆႈလူႉပႅတ်ႈ။

ၼၢင်းမူဝ်းမူဝ်းဢွင်ႇလၢတ်ႈဝႃႈ  – “သင်ဝႃႈ ငဝ်းလၢႆးဝၢၼ်ႈမိူင်းလီယဝ်ႉသေ သမ်းပၼ်ၵူၼ်းမိူင်း လႆႈယဝ်ႉ ၼႆတႄႉ ဢၼ်ဝၢင်းၽႅၼ်ဝႆႉဝႃႈ တေသမ်းပၼ်ၵမ်း ၸုပ်ႈၸုပ်ႈဢၼ်ဝႃႈ ၼၼ်ႉလႅပ်ႈ တေဢမ်ႇ ပဵၼ် ယဝ်ႉ။ ၵူၼ်းမိူင်းပတ်းပိုၼ်ႉ လႅပ်ႈတေလႆႈသမ်းမိူဝ်ႈမိူဝ်ႈၵၼ်ၵမ်းလဵဝ်ၵၼ်မူတ်း ။ ၵူၺ်းၵႃႈ တေပဵၼ် မိူဝ်ႈလႂ်ပႆႇႁူႉ ။ တိုၵ်ႉပႂ်ႉထွမ်ႇတူၺ်းယူႇ  ”– ဝႃႈၼႆ။

ယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႆႉ မိူင်းၵြႃးဢိၼ်ႊတီႊယိူဝ်ႊ တွၼ်ႈပၼ်မိူင်းယူႇႁိမ်းၵိၼ်ၸမ်ၶဝ် လၢႆလၢႆမိူင်း၊ တွၼ်ႈတႃႇ ၵူၼ်းမိူင်းမၢၼ်ႈၵေႃႈ ပွၵ်ႈဢွၼ်တၢင်းသုတ်း လႆႈႁပ်ႉ 1.5 လၢၼ်ႉလွတ်ႇ   ။ ယွၼ်ႉပိူဝ်ႈသိုၵ်းယိုတ်းဢႃႇၼႃႇသေ ပဵၼ်ၽွင်းငဝ်းလၢႆး ၵူၼ်းမိူင်းၼႄၵၢင်ၸႂ်သၢၼ်ၶတ်း၊ ၾၢႆႇပၢႆးယူႇလီၵေႃႈ ၶဝ်ႈႁူမ်ႈ CDM သၢၼ်ၶတ်းဢႃႇၼႃႇမူတ်းယဝ်ႉလႄႈ ယႃႈယႃ ၸွင်ႇႁွတ်ႈမႃး ထႅင်ႈႁိုဝ်ဢမ်ႇမႃးၼႆ ၵေႃႈ ၽႂ်ဢမ်ႇလႆႈႁူႉၸွမ်း။ လိူဝ်ၼၼ်ႉ ဢမ်ႇမီးၵူၼ်းၵူတ်ႇထတ်းပၼ်လႄႈ ဝၼ်းမိူဝ်ႈၼႆႉ ၵူၼ်းတိတ်းၸပ်းၶူဝ်ႊဝိတ်ႉ 19 မီးၵႃႈႁိုဝ် ငဝ်းလၢႆးၶူဝ်ႊဝိတ်ႉ 19 ၼႂ်းမိူင်းႁဝ်းမီးၸိူင်ႉႁိုဝ်ၼႆ ၽႂ်ၵေႃႈဢမ်ႇလႆႈႁူႉၸွမ်း။

( ၸၢႆးတုမ်ႇၶမ်း သူင်ႇၶၢဝ်ႇ)

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း