မိူဝ်ႈၼႆႉ ဝၼ်းတီႈ 5/3/2021 ယၢမ်းၵၢင်ၼႂ် 9 မူင်း ထိုင် 11 မူင်း ၵၢင်ဝၼ်း ၵူၼ်းမိူင်း/ ၵူၼ်းၼုမ်ႇ ႁူမ်ႈၵၼ်ၼႄၵၢင်ၸႂ် သၢၼ်ၶတ်းတေႃႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း တီႈၼိူဝ်သဵၼ်ႈတၢင်းလူင် လႃႈသဵဝ်ႈ – သႅၼ်ဝီ ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ ၽူႈၶဝ်ႈႁူမ်ႈ ၼႄၵၢင်ၸႂ် ၼမ်လိူဝ်ၵူႈဝၼ်း မိူဝ်ႈပူၼ်ႉမႃး ။
ၵူၼ်းၼုမ်ႇ ၽူႈၶဝ်ႈႁူမ်ႈၼႄၵၢင်ၸႂ် တီႈလႃႈသဵဝ်ႈ လၢတ်ႈဝႃႈ – “မိူဝ်ႈၼႆႉ ၸဵမ်ၵူၼ်းမိူင်း ၵူၼ်းၼုမ်ႇၶဝ်ႈႁူမ်ႈ ၼမ်လိူဝ် ၵူႈ ဝၼ်းပူၼ်ႉမႃးၼၼ်ႉၶႃႈ။ မိူဝ်ႈၼႆႉ ၸႂ်ႉလၢႆးၵတ်းယဵၼ် ၼင်ႈၼိူဝ်တၢင်းလူင်သေ ၼႄၵၢင်ၸႂ်၊ ပလိၵ်ႈလႄႈသိုၵ်း သေႃႇမႃးဝႃႈ ႁႂ်ႈယၢႆႈၵၼ်ၼႆ။ ၵူၼ်းၼုမ်ႇၶိုၼ်းတွပ်ႇလၢတ်ႈဝႃႈ ပေႃးထိုင်ၶၢဝ်းယၢမ်း ႁဝ်းတိုၼ်းတေယၢႆႈ ၼႆသေႁဝ်းၶႃႈလႆႈၼႄၵၢင်ၸႂ်ၵႂႃႇၵတ်းၵတ်းယဵၼ်ယဵၼ်ၶႃႈဢေႃႈ” -ဝႃႈၼႆ ။
တီႈဝဵင်းလူင်လႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ ၵူၼ်းမိူင်းၽွမ်ႉၵၼ်ၼႄၵၢင်ၸႂ်သၢၼ်ၶတ်းသိုၵ်းယိုတ်းဢႃႇၼႃႇ မႃးဢမ်ႇထၢတ်ႇ။ ဝၼ်း 2 ႁႃႈတူဝ်လႄႈဝၼ်း Milktea Alliance ဝၼ်းတီႈ 28/2/2021 ၼၼ်ႉၵေႃႈ ၵူၼ်းမိူင်းၶဝ်ႈႁူမ်ႈၼႄၵၢင်ၸႂ်ၼမ်ၵိုၼ်း။ ဝၼ်းတီႈ 28/2/2021 ၼၼ်ႉ ပလိၵ်ႈၸႂ်ႉႁႅင်းၵွင်ႈႁႅင်းၵူၼ်းလႄႈမၢၵ်ႇၵႅတ်ႉသ်ၼမ်ႉတႃ ယႃႉၾုင်ၵူၼ်းမိူင်းႁၢဝ်ႈႁႅင်း၊ ၵူၼ်းမိူင်းမၢတ်ႇၸဵပ်းလိူဝ်ႁႅင်း။ ဝၢႆးၼၼ်ႉၵူၼ်းမိူင်းလႃႈသဵဝ်ႈ ဢွၵ်ႇၼႄၵၢင်ၸႂ်ပဵၼ်ဝၼ်း ၵိုတ်းယင်ႉပဵၼ်ဝၼ်း သေ မိူဝ်ႈၼႆႉၸင်ႇၶိုၼ်းဢွၵ်ႇမႃးႁူမ်ႈၵၼ်ၼႄၵၢင်ၸႂ် ၵိုတ်းၶွၼ်ႈ။
“ၼႂ်းဝၼ်းသွင်ဝၼ်းမႃးၼႆႉ ၵူၼ်းၼုမ်ႇၶဝ် ၶီႇရူတ်ႉၶိူင်ႈသေ ဢွၵ်ႇၼႄၵၢင်ၸႂ်။ ၸဵမ်ပလိၵ်ႈသိုၵ်းမၢၼ်ႈၶဝ် ပႂ်ႉၸွမ်းတၢင်း သေ ႁႄႉရူတ်ႉၶိူင်းၵိုတ်း ၵူတ်ႇထတ်း ၸွမ်းတႂ်ႈတီႈၼင်ႈရူတ်ႉၶိူင်ႈ၊ ၼႂ်းၾူၼ်း ၸိူဝ်းၼႆႉၶႃႈ။ သင်ဝႃႈ ၶဝ်ႁၼ်ၵဵဝ်ႇၶွင်ႈၸွမ်း ပၢင်ၼႄၵၢင်ၸႂ်ၼႆၵေႃႈ ႁွင်ႉၵႂႃႇႁူင်းပလိၵ်ႈ ၵမ်းလဵဝ်”- ၵူၼ်းၼုမ်ႇ လႃႈသဵဝ်ႈ ၽူႈၶဝ်ႈႁူမ်ႈၼႄၵၢင်ၸႂ် ၵေႃႉၼိုင်ႈ လၢတ်ႈ ၼႄၼင်ႇၼႆ။
မိူဝ်ႈၼႆႉ ၼႂ်းဝဵင်းလူင်လၢႆလၢႆဝဵင်းၼႂ်းၸိုင်ႈတႆး မိူၼ်ၼင်ႇ ဝဵင်းတူၼ်ႈတီး၊ သႅၼ်ဝီ ၸိူဝ်းၼႆႉၵေႃႈ မီးပၢင်ၼႄၵၢင်ၸႂ်။ ဝၼ်းမိူဝ်ႈၼႆႉပၢင်ၼႄၵၢင်ၸႂ်ၼႂ်းၸိုင်ႈတႆးယဝ်ႉတူဝ်ႈၵႂႃႇလီငၢမ်း ။
