ပၢင်ၼႄၵၢင်ၸႂ် သၢၼ်ၶတ်းသိုၵ်းမၢၼ်ႈတီႈၵဵင်းမႆႇ မိူင်းထႆး မီးလၢႆၸၢဝ်းၶိူဝ်း ၵူၼ်းမိူင်းႁူမ်ႈတုမ် ၶဝ်ႈႁူမ်ႈ  ၸွမ်းတင်းၼမ် လၢႆ။

မိူဝ်ႈၼႆႉ ဝၼ်းတီႈ 5/3/2021 ယၢမ်းၵၢင်ဝၼ်း 12 မူင်း လၢႆၸၢဝ်းၶိူဝ်း ၼႂ်းမိူင်းႁူမ်ႈတုမ် ၶွၼ်ႈတုမ်ၵၼ် တီႈၽၵ်းတူတႃႈပႄး/ ပရတူႊထႃႉၽႄး ၼႂ်းၸႄႈဝဵင်းၵဵင်းမႆႇ ၸိုင်ႈထႆး ဢွၼ်ၵၼ်ပႆတၢင်း ဢွၵ်ႇၼႄၵၢင်ၸႂ် သၢၼ်ၶတ်းတေႃႇၸုမ်းသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်း ။ ဝၢႆးၼၼ်ႉႁူမ်ႈၵၼ်ၵႂႃႇယိုၼ်ႈလိၵ်ႈၸူး တီႈလုမ်းၽွင်းတၢင် ဢမေႊရိၵၼ်ႊ တင်း လုမ်းၽွင်းတၢင်ၵျပၼ်ႊ ဢၼ်ပၵ်းဝႆႉတီႈၵဵင်းမႆႇၼၼ်ႉ ဝႃႈ ၼႆ။

ၽူႈၶဝ်ႈႁူမ်ႈတူင်ႉၼိုင် ပၢင်ၼႄၵၢင်ၸႂ် တီႈၵဵင်းမႆႇ ၵေႃႉၼိုင်ႈ လၢတ်ႈဝႃႈ – “ႁဝ်းၶႃႈ ၵူၼ်းမိူင်း ႁူမ်ႈတုမ် ဢၼ်မႃးႁဵတ်းၵၢၼ် ၼႂ်းၵဵင်းမႆႇ ၼႆႉ ႁူမ်ႈၵၼ် ၶွၼ်ႈတုမ်တီႈၽၵ်းတူတႃႈပႄးသေ ႁူမ်ႈၵၼ်ပႆၵႂႃႇတီႈလုမ်းၽွင်းတၢင်ဢမေႊရိၵၼ်ႊ တင်း ၵျပၼ်ႊ ၵႂႃႇ ယိုၼ်ႈလိၵ်ႈတုၵ်းယွၼ်းၸူးတီႈၶဝ်ၼၼ်ႉၶႃႈဢေႃႈ”- ဝႃႈၼႆ။

ၼႂ်းၽိုၼ်လိၵ်ႈ ဢၼ်ၵႂႃႇယိုၼ်ႈ တီႈလုမ်းၽွင်းတၢင်ဢမေႊရိၵၼ်ႊတင်း ၵျပၼ်ႊၼၼ်ႉ ပႃးဝႆႉဝႃႈ -ၵူၼ်းမိူင်းယွမ်းႁပ်ႉ  ပိူင်တီႊမူဝ်ႊၶရေႊသီႊ၊ ဢမ်ႇလူဝ်ႇပိူင်ဢုပ်ႉပိူင်ႇၽွင်းငမ်းဢႃႇၼႃႇသိုၵ်းမၢၼ်ႈ၊ ယဝ်ႉၵေႃႈႁႂ်ႈသိုၵ်းမၢၼ်ႈပွႆႇ ပၼ်  ၽူႈၼမ်း ၵၢၼ်မိူင်းၵူႈၵေႃႉ ဢၼ်သိုၵ်းမၢၼ်ႈ တီႉၺွပ်းဝႆႉ ၸိူဝ်းၼၼ်ႉ- ဝႃႈၼႆ။

ဝၢႆးလင်ယိုၼ်ႈလိၵ်ႈယဝ်ႉ ဢွၼ်ၵၼ်ပႆတၢင်းမႃးၶိုၼ်းတီႈၽၵ်းတူ တႃႈပႄးသေ  မႃးၸတ်းပၢင်ဢုပ်ႇလၢတ်ႈ ၵႂၢမ်းၼႂ်းဢူၵ်းၼႂ်းၸႂ်လႄႈတၢင်းႁၼ်ထိုင်ၽႂ်မၼ်း- ဝႃႈၼႆ။

တီႈပၢင်ၼႄၵၢင်ၸႂ်ၼၼ်ႉ မီးၵူၼ်းမိူင်းလၢႆလၢႆၸၢဝ်းၶိူဝ်း ပႃးၸဵမ်တႆး ၶဝ်ႈႁူမ်ႈ။ ဢွၼ်ၵၼ်ယိပ်းပၢႆႉၵၢင်ၸႂ်သၢၼ်ၶတ်းသိုၵ်းမၢၼ်ႈ ဢၼ်ဢဝ်လိၵ်ႈၸၢဝ်းၶိူဝ်းၽႂ်မၼ်းတႅမ်ႈဝႆႉ၊ လိူဝ်ၼၼ်ႉပူၵ်းတုင်းၸိူဝ်ႉၸၢတ်ႈၽႂ်မၼ်းတီႈၼႂ်းပၢင်။

ပၢင်ၼႄၵၢင်ၸႂ်တီႈၽၵ်းတူတႃႈပႄးၼႆႉ ဢၢၼ်းတေၸတ်းႁဵတ်းတေႃႇထိုင်ၶၢဝ်းယၢမ်းႁူဝ်ၶမ်ႈ လႆႈႁူႉၼင်ႇၼႆ။