ၵူၼ်းမိူင်း/ ၵူၼ်းၼုမ်ႇ ၼႂ်းၸႄႈဝဵင်းၽႃၵၢၼ်ႉ ဢွၵ်ႇၼႄၵၢင်ၸႂ် သၢၼ်ၶတ်းတေႃႇ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း မႃး ၸမ်လိူၼ်၊ ၼႂ်း 2-3 ဝၼ်းမႃးၼႆႉ ၺႃးပလိၵ်ႈ ပိုတ်းယိုဝ်းႁၢမ်ႈႁႄႉ မၢတ်ႇၸဵပ်းယူႇသေတႃႉဢမ်ႇၵိုတ်းဢမ်ႇလိုဝ်ႈသေ မိူဝ်ႈၼႆႉၵေႃႈသိုပ်ႇၼႄၵၢင်ၸႂ်ထႅင်ႈ။
မိူဝ်ႈဝႃး ဝၼ်းတီႈ 4/2/2021 ပၢင်ၼႄၵၢင်ၸႂ် တီႈၸႄႈဝဵင်းၽႃၵၢၼ်ႉ ၸႄႈမိူင်းၶၢင် ပလိၵ်ႈ/ သိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉ ဢဝ်မၢၵ်ႇၵႅတ်ႉသ်ၼမ်ႉတႃပွႆႇ၊ ယိုဝ်း ၵွင်ႈမၢၵ်ႇယၢင်သႂ်ႇ ၵူၼ်းမိူင်းၼႄၵၢင်ၸႂ်ၼၼ်ႉ ႁၢဝ်ႈႁႅင်း ။
ၵူၼ်းၼုမ်ႇ ၽူႈၶဝ်ႈႁူမ်ႈ ၼႄၵၢင်ၸႂ် တီႈၽႃၵၢၼ်ႉ လၢတ်ႈဝႃႈ – “မိူဝ်ႈဝႃး ပလိၵ်ႈ/ သိုၵ်းမၢၼ်ႈ ၸႂ်ႉမၢၵ်ႇၵႅတ်ႉသ် တင်း ယိုဝ်းၵွင်ႈမၢၵ်ႇယၢင်ထႅင်ႈတင်းၼမ်ၶႃႈ။ မၢၵ်ႇၵွင်ႈ ဢၼ်ၶဝ်ႈယိုဝ်းသႂ်ႇၵူၼ်းမိူင်းၼၼ်ႉ တေဢမ်ႇယွမ်းပၢၵ်ႇလုၵ်ႈ ။ ၵူၼ်း ၼႂ်းၸုမ်းၶႃႈႁဝ်းၶဝ် ၺႃးမၢၵ်ႇၵွင်ႈယၢင် မီး 4-5 ၵေႃႉလူးၵွၼ်ႇ၊ မိူဝ်ႈၼႆႉၵေႃႈႁဝ်းၶႃႈဢမ်ႇၵူဝ် ဢမ်ႇထွႆ၊ သိုပ်ႇၼႄၵၢင်ၸႂ်ထႅင်ႈ ၵူၺ်းၵႃႈ ပလိၵ်ႈတႄႉဢမ်ႇပွႆႇမၢၵ်ႇဢမ်ႇယိုဝ်း ၶဝ်မႃး ၸုၵ်းတူၺ်း ၸိူင်ႉၼၼ်ၵူၺ်းသေယဝ်ႉတူဝ်ႈၵႂႃႇ”- ဝႃႈၼႆ။
ၵူၼ်းမိူင်း/ ၵူၼ်းၼုမ်ႇ ဢၼ်ထုၵ်ႇၺႃးၵွင်ႈမၢၵ်ႇယၢင် ယိုဝ်းသႂ်ႇၼၼ်ႉ မၢင်ၵေႃႉ တိူဝ်ႉၺႃးၼႃႈၽၢၵ်ႇ၊ လၢႆႇတႃ၊ ဝႂ်ႁူ၊ ၵၢၼ်ႈၶေႃးလႄႈ ၶႅၼ် ၸိူဝ်းၼႆႉ ၵူၺ်းၵႃႈ ဢမ်ႇထိုင်တီႈလႆႈမႆႈၸႂ် ၼင်ႇၵဝ်ႇဝႃႈၼႆ။
ၵူၼ်းမိူင်းၽႃၵၢၼ်ႉ ပႆတၢင်းၼႄၵၢင်သႂ်သၢၼ်ၶတ်းသိုၵ်းမႃးၸဵမ်မိူဝ်ႈလိူၼ်ယဝ်ႉမႃးသေတႃႉ ဝၼ်းတီႈ 2/3/2021 ၼႆႉ ၸင်ႇၺႃး ပလိၵ်ႈ/ သိုၵ်းမၢၼ်ႈ ဢဝ် ဢဵၼ်ႁႅင်း ၶဝ်ႈယႃႉပၢင်ၼႄၵၢင်ၸႂ် ပွႆႇမၢၵ်ႇသႂ်ႇ ၵူၼ်းမိူင်း ထိုင်တီႈယၢႆႈၵၼ် ။
မိူဝ်ႈ ဝၼ်းတီႈ 3/3/2021 ယၢမ်းၵၢင်ၼႂ် 10 မူင်း ၵေႃႈပလိၵ်ႈ/ သိုၵ်းမၢၼ်ႈယိုဝ်းၵွင်ႈမၢၵ်ႇယၢင်သႂ်ႇ ၵူၼ်းၼႄၵၢင်ၸႂ် တီႈၸႄႈဝဵင်းၽႃၵၢၼ်ႉ တိူဝ်ႉၺႃးၵူၼ်းမိူင်း 4 ၵေႃႉ မၢတ်ႇၸဵပ်း ႁၢဝ်ႈႁႅင်း 2 ၵေႃႉ ။
တီႈပၢင်ၼႄၵၢင်ၸႂ်တီႈဝဵင်းၽႃၵၢၼ်ႉၼႆႉ ၵမ်ႈၼမ် ပဵၼ်ၵူၼ်းၼုမ်ႇ ၸၢဝ်းၶိူဝ်း တႆး၊ ၶၢင် ။ မိူဝ်ႈ ၼႆႉ ၽူႈၶဝ်ႈႁူမ်ႈ ၼႄၵၢင်ၸႂ် ဢမ်ႇယွမ်းမိုၼ်ႇ လႆႈႁူႉၼင်ႇၼႆ။
