ပလိၵ်ႈ/ သိုၵ်းမၢၼ်ႈ ၸႂ်ႉၵွင်ႈ မၢၵ်ႇယၢင် ယိုဝ်းၵူၼ်းမိူင်းၼႄၵၢင်ၸႂ် တီႈၸႄႈဝဵင်းၽႃ ၵၢၼ်ႉ ၸႄႈမိူင်းၶၢင် မၢတ်ႇၸဵပ်း 4 ၵေႃႉ တႃႇ 2 ၵေႃႉ မၢတ်ႇၸဵပ်းႁၢဝ်ႈႁႅင်း ဝႃႈၼႆ။
မိူဝ်ႈၼႆႉ ဝၼ်းတီႈ 3/3/2021 ယၢမ်းၵၢင်ၼႂ် 10 မူင်း ပလိၵ်ႈ/ သိုၵ်းမၢၼ်ႈ ၸႂ်ႉလၢႆးႁုၵ်ႉ ႁၢႆႉ ဢဝ်ၵွင်ႈၵၢင်ႇ မၢၵ်ႇယၢင် ယိုဝ်း သႂ်ႇၵူၼ်းၼႄၵၢင်ၸႂ် တီႈၸႄႈဝဵင်းၽႃၵၢၼ်ႉ ၸႄႈမိူင်းၶၢင် ၼႂ်းပၢင်ၼႄၵၢင်ၸႂ်ၼၼ်ႉ တိူဝ်ႉၺႃးၵူၼ်းမိူင်း 4 ၵေႃႉ ၼႂ်း ၼၼ်ႉ မၢတ်ႇၸဵပ်း ႁၢဝ်ႈႁႅင်း 2 ၵေႃႉ ။
ၵူၼ်းၼုမ်ႇ ၼႄၵၢင်ၸႂ် တီႈၽႃၵၢၼ်ႉ လၢတ်ႈဝႃႈ – “ၶဝ်ၸႂ်ႉၵွင်ႈ မၢၵ်ႇယၢင်(ရာဘာ) သေ ယိုဝ်းမႃး ၶႃႈဢေႃႈ။ တိူဝ်ႉၺႃးၵူၼ်း 4 ၵေႃႉ။ ၼႂ်းၼၼ်ႉ မၢတ်ႇၸဵပ်းႁၢဝ်ႈႁႅင်း 2 ၵေႃႉ။ ၵေႃႉၼိုင်ႈ ၺႃးယိုဝ်းတိူဝ်ႉတီႈမိုဝ်း တိူဝ်ႉလုပ်ႇ လႅပ်ႈတေလႆႈတႅပ်း၊ ထႅင်ႈ ၵေႃႉၼိုင်ႈ ၺႃး တိူဝ်ႉဢူၵ်း”- ဝႃႈၼႆ။
ၵေႃႉဢၼ်မၢၵ်ႇၵွင်ႈတိူဝ်ႉၺႃးတီႈမိုဝ်းၼၼ်ႉ လႆႈသူင်ႇယူတ်းယႃတူဝ်ဝႆႉတီႈ ႁူင်းယႃၽႃၵၢၼ်ႉ။ ၵေႃႉတိူဝ်ႉၺႃး တီႈဢူၵ်းၼၼ်ႉ တႄႉ လႆႈသူင်ႇယူတ်းယႃတူဝ်တီႈႁူင်းယႃလူင် မျိတ်ႉၵျီးၼႃး ၼႆယဝ်ႉ။
မိူဝ်ႈဝႃး ဝၼ်းတီႈ 2/3/2021 ၼၼ်ႉၵေႃႈ ပလိၵ်ႈ/ သိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉ ပွႆႇမၢၵ်ႇ ၵႅတ်ႉသ်ၼမ်ႉတႃ တီႈၼႂ်းပၢင်ၼႄ ၵၢင်ၸႂ်ၼၼ်ႉ ပဵၼ်လၢႆလုၵ်ႈ။ ၵၢၼ်ၸႂ်ႉလၢႆးႁုၵ်ႉႁၢႆႉ တေႃႇၵူၼ်းမိူင်းၼႄၵၢင်ၸႂ် တီႈဝဵင်းၽႃၵၢၼ်ႉၼႆႉ တိုၵ်ႇတႄႇႁဵတ်းမႃး မိူဝ်ႈဝႃးၼႆႉ ဝႃႈၼႆ။
ပၢင်ၼႄၵၢင်ၸႂ် တီႈၸႄႈဝဵင်းၽႃၵၢၼ်ႉၼႆႉ ဝၢႆးသေ သိုၵ်းမၢၼ်ႈယိုဝ်းဢႃႇၼႃႇ ၸိုင်ႈ မိူင်းမႃးယဝ်ႉၵေႃႈ ၵူၼ်းမိူင်း ၵူၼ်း ၼုမ်ႇ ႁူမ်ႈၵၼ် ဢွၵ်ႇၼႄၵၢင်ၸႂ် သၢၼ် ၶတ်း တေႃႇတပ်ႉသိုၵ်းမၢၼ်ႈ မႃးႁၢဝ်ႈႁႅင်း တေႃႇထိုင်မႃးဝၼ်းမိူဝ်ႈၼႆႉ ဝႃႈၼႆ။
