ပၢင်ၼႄၵၢင်ၸႂ် တီႈတူၼ်ႈတီး မိူဝ်ႈၼႆႉ မီးလၢႆလၢႆသၢႆ သိုၵ်းလႄႈပလိၵ်ႈဢမ်ႇႁၢမ်ႈႁႄႉ

မိူဝ်ႈၼႆႉ ဝၼ်းတီႈ 3/3/2021 ၵေႃႈၵူၼ်းၼုမ်ႇဝဵင်းတူၼ်ႈတီးဢွၵ်ႇၼႄၵၢင်ၸႂ်သၢၼ်ၶတ်းသိုၵ်းမၢၼ်ႈထႅင်ႈ လၢႆလၢႆၸုမ်း လၢႆလၢႆတီႈ၊ ပလိၵ်ႈဢဝ်ႁႅင်းမႃးလွၵ်ႇငိုတ်ႈယူႇသေတႃႉ ၵူၼ်းမိူင်းဢမ်ႇ  ထွႆထွၼ် – ၼႄၵၢင်ၸႂ် လူၺ်ႈလၢႆးၵတ်းယဵၼ်တေႃႇပေႃးယဝ်ႉတူဝ်ႈလီငၢမ်း။

ၵူၼ်းမိူင်းတႄႇၼႄၵၢင်ၸႂ် ယၢမ်းၵၢင်ၼႂ် 8 မူင်း။ ဢွၵ်ႇလၢႆသၢႆ မိူၼ်ၼင်ႇ သၢႆပွၵ်ႉပျီႇတေႃႇတႃႇ၊ သၢႆၼိူဝ်သဵၼ်ႈတၢင်းၵၢင်ဝဵင်း၊ သၢႆသဵၼ်ႈတၢင်းႁွပ်ႈဝဵင်းၸိူဝ်းၼႆႉ။ ပလိၵ်ႈ ဢဝ်ႁႅင်းမႃးပႂ်ႉဝႆႉယူႇသေတႃႉ ဢမ်ႇတီႉၺွပ်းယႃႉၾုင်ၵူၼ်းၼႄၵၢင်ၸႂ်လႄႈ ၵူၼ်းမိူင်းလႆႈၼႄၵၢင်ၸႂ်ယဝ်ႉတူဝ်ႈလီငၢမ်းၼႂ်းၶၢဝ်းယၢမ်းမွၵ်ႈဝၢႆးဝၼ်း 1 မူင်း။

ၵူၼ်းၼုမ်ႇၼႄၵၢင်ၸႂ် ၵေႃႉၼိုင်ႈ လၢတ်ႈဝႃႈ – “မိူဝ်ႈၼႆႉတႄႉ ပလိၵ်ႈယေး သိုၵ်းမၢၼ်ႈ ဢမ်ႇမႃးႁဵတ်းသင်ၶႃႈ တီႈပၢင် ၼႄၵၢင်ၸႂ်ႁဝ်း ၶႅမ်ႉလႅပ်ႈၵႂႃႇၵူႈလွင်ႈၶႃႈ မိူဝ်ႈၼႆႉတႄႉ။ ယၢမ်းလဵဝ်ၼႆႉ ဢွၼ်ၵၼ်ၽၢတ်ႇၾုင်သေ ပွၵ်ႈမိူဝ်းႁိူၼ်းယေး ႁင်း ၽႂ် မၼ်းမူတ်းယဝ်ႉၶႃႈ”- ဝႃႈၼႆ။

တီႈပၢင်ၼႄၵၢင်ၸႂ် တီႈဝဵင်းတူၼ်ႈတီး မိူဝ်ႈၼႆႉ ၸဵမ်ပလိၵ်ႈ/ သိုၵ်းမၢၼ်ႈ ဢမ်ႇၶဝ်ႈယႃႉ ၶဝ်ႈလၢမ်းတီႉၺွပ်း ၵူၼ်းမိူင်းသင် ပဵၼ်ဢၼ်လၢၵ်ႇလၢႆးဝႆႉ ဢၼ်ၼိုင်ႈ ၵူၼ်းၼႄၵၢင်ၸႂ် ၵေႃႉၼိုင်ႈ လၢတ်ႈၼႄၼင်ႇၼႆ။

“မိူဝ်ႈၼႆႉ လၢၵ်ႇလၢႆးၶႃႈၼႃ ၶဝ်ဢမ်ႇႁဵတ်းသင်တီႈၵူၼ်းၼႄၵၢင်ၸႂ် ပလိၵ်ႈသိုၵ်းမၢၼ်ႈၶဝ် ၸုၵ်းယူႇဝႆႉၸိူင်ႉၼၼ်သေ တူၺ်းၵူၺ်း။ ဢမ်ႇၶဝ်ႈတီႉၺွပ်း ပွႆႇမၢၵ်ႇၵႅတ်ႉသ်ႉၼမ်ႉတႃ ယိုဝ်းၵူၼ်းမိူင်း မိူၼ်မိူဝ်ႈပူၼ်ႉမႃး ဝၼ်းသွင်ဝၼ်းၼၼ်ႉယဝ်ႉ။ ၵူၺ်းၵႃႈ ၶဝ်တေမီးၽႅၼ်ၵၢၼ်သေလွင်ႈလွင်ႈႁိုဝ် ဢမ်ႇႁူႉ”- ၵူၼ်းၼုမ်ႇ ဢွၵ်ႇၼႄၵၢင်ၸႂ် သိုပ်ႇလၢတ်ႈၼႄၼင်ႇၼႆ။  

ပၢင်ၼႄၵၢင်ၸႂ် ၵူၼ်းၼုမ်ႇမိူဝ်ႈၼႆႉတႄႉ ၸတ်းႁဵတ်းပၢင်ၼႄၵၢင်ၸႂ် ၸွမ်းၼႂ်းပွၵ်ႉ ၼႂ်းယွမ်ႇ ၼႂ်းၵိဝ်ႇၵၼ်ၵႂႃႇ။ ၵူၺ်းၵႃႈ ၸွမ်းသဵၼ်ႈတၢင်းလူင် ၸိူဝ်းၼၼ်ႉတႄႉ ဢမ်ႇဢွၵ်ႇၼႄ ဝႃႈၼႆ။

ယဝ်ႉၵေႃႈ ယူႇတီႈၵူၼ်းၼုမ်ႇသေ ၸႅတ်ႇႁဵတ်းပဵၼ် လၢႆမူႇ လၢႆၸုမ်း မွၵ်ႈ 4-5 မူႇၼႆႉ ၽႄၵၼ်တူင်ႉၼိုင်။ မၢင်ၸုမ်း ပႆ တၢင်းၼႄၵၢင်ၸႂ်၊ မၢင်ၸုမ်းၼင်ႈသေ ၼႄၵၢင်ၸႂ်၊ မၢင်ၸုမ်း ႁၢင်ႈႁႅၼ်း ႁဵတ်းႁူဝ်ႉ ၶၢတ်ႈဝႆႉ ယဝ်ႉၵေႃႈ တႃႇႁႄႉၵင်ႈ လွင်ႈ ပလိၵ်ႈသိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉတေႃႇ ၸိူဝ်းၼၼ်ႉ။ မိူဝ်ႈၼႆႉ ပၢင်ၼႄၵၢင်ၸႂ် တီႈတူၼ်ႈတီး ဢဵၼ်ႁႅင်းၵူၼ်း တေဢမ်ႇ ယွမ်း 1 ႁဵင် ၼႆယဝ်ႉ။

ၼွၵ်ႈလိူဝ်ၼၼ်ႉ တီႈဝဵင်းၵျွၵ်ႉမႄးၵေႃႈ ၵူၼ်းမိူင်း ၵူၼ်းၼုမ်ႇ ၼပ်ႉႁဵင် ၶွၼ်ႈတုမ်ၵၼ် တီႈႁူင်းႁေႃးၵၢင်ဝဵင်းသေ ၼႄၵၢင် ၸႂ်ၵႂႃႇ ၵတ်းၵတ်းယဵၼ်ယဵၼ် ယဝ်ႉတူဝ်ႈၵႂႃႇ လီငၢမ်း  ။

မိူဝ်ႈဝႃး ဝၼ်းတီႈ 2/3/2021 ယၢမ်းဝၢႆးဝၼ်း ပလိၵ်ႈသိုၵ်းမၢၼ်ႈ ၸႂ်ႉလၢႆးႉႁၢႆႉ လမ်းၶဝ်ႈတီႉၵူၼ်းမိူင်း ၸွမ်း ၼႂ်းႁိူၼ်းယေးၵူၼ်းမိူင်း ၸွမ်းၼႂ်းႁၢၼ်ႉၶၢႆၶူဝ်း ၸိူဝ်းၼႆႉ ႁၢဝ်ႈႁႅင်း။  တီႉလႆႈၵူၼ်းမိူင်းၶဝ်ႈသွၼ်ႉမူၵ်းၼႂ်း ႁၢၼ်ႉၶၢႆၼမ်ႉၼဵင်ႈဝၢၼ် Morning Sun Café တီႈတူၼ်ႈတီးၼၼ်ႉ  ဢမ်ႇယွမ်း 30 ၵေႃႉ  ။