ပလိၵ်ႈလႄႈသိုၵ်းမၢၼ်ႈ လမ်းတီႉၵူၼ်းၼုမ်ႇၼႄၵၢင်ၸႂ် တီႈႁိမ်းႁုၼ်ႇႁၢင်ႈမႃႉ ဝဵင်တူၼ်ႈတီး ၊ ၶဝ်ႈတီႉတီႈႁၢၼ်ႉၶၢႆၼမ်ႉၼဵင်ႈဝၢၼ် လႆႈၵႂႃႇဢမ်ႇယွမ်း 30 ၵေႃႉ ။
မိူဝ်ႈၼႆႉ ဝၼ်းတီႈ 2/3/2021 ပလိၵ်ႈ/ သိုၵ်းမၢၼ်ႈ ႁူမ်ႈၵၼ် ၸႂ်ႉဢဵၼ်ႁႅင်း တင်းၼမ် ဢဝ်လၢႆးႁုၵ်ႉႁၢႆႉ ႁၢဝ်ႈႁႅင်း သေၶဝ်ႈတီႉ ၺွပ်းၵူၼ်းမိူင်း/ ၵူၼ်းၼုမ်ႇ တီႈႁၢၼ်ႉၶၢႆၼမ်ႉၼဵင်ႈဝၢၼ် Moring Sun Café တီႈၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။
ၵူၼ်းႁၼ်တႂ်ႈၼႃႈတႂ်ႈတႃ တီႈတူၼ်ႈတီး ၵေႃႉၼိုင်ႈလၢတ်ႈဝႃႈ – “ပလိၵ်ႈယေး သိုၵ်းမၢၼ်ႈ ၸႂ်ႉႁႅင်းၵူၼ်းသေ ပိတ်ႉထိပ်ႇၽၢင်ႈၽၵ်းတူဝၢင်း ၽၵ်းတူႁိူၼ်း ၶဝ်ႈတီႉၺွပ်း ၵူၼ်းၼႄၵၢင်ၸႂ် ဢၼ်မူၵ်းယူႇ ၼႂ်းႁၢၼ်ႉၼမ်ႉၼဵင်ႈဝၢၼ် မေႃးၼိင်းသၢၼ်း ၵႂႃႇ 30 ပၢႆ ပႃးတင်းၼၢင်းယိင်း ၵူၼ်းၸၢႆး ပလိၵ်ႈပေႃႉထုပ်ႉပိတ်ႉထိပ်ႇယဝ်ႉ ဢဝ်တၢင်ႇရူတ်ႉၵႃးၵႂႃႇၶႃႈဢေႃႈ”- ဝႃႈၼႆ။
ၵူၼ်းၼႄၵၢင်ၸႂ် ဢၼ်ၺႃးပလိၵ်ႈတီႉၵႂႃႇၼၼ်ႉၵမ်ႈၼမ်ပဵၼ်ၵူၼ်းၼုမ်ႇ လုၵ်ႈႁဵၼ်းၸၼ်ႉၸွမ်။ တူင်ႇဝူင်းၸုမ်းၶၢဝ်ႇၼႂ်းပိုၼ်ႉတီႈလၢတ်ႈဝႃႈ သိုၵ်းမၢၼ်ႈသူင်ႇၵႂႃႇတီႈၶွၵ်ႈလူင် တွင်ႇလေးလူင်း 20 ၵေႃႉ ။ ၽူႈၸၢႆး 19 ၵေႃႉလႄႈ ၽူႈယိင်း 1 ၵေႃႉ ဝႃႈၼႆ။
လိူဝ်ၼၼ်ႉ ပလိၵ်ႈသိုၵ်းမၢၼ်ႈၼႆႉယင်းပၢႆပူတ်းထွတ်ႇဢဝ်ပႃး ၵွင်ႈထၢႆႇ CCTV တီႈႁၢၼ်ႉၼမ်ႉၼဵင်ႈဝၢၼ် ၼၼ်ႉၵႂႃႇပႃးၸွမ်း။ ယိုတ်းဢဝ်ၾူၼ်းၵူၼ်းမိူင်း ဢၼ်ၶဝ်တီႉၺွပ်းၵႂႃႇၼၼ်ႉပႃးထႅင်ႈ၊ ဢမ်ႇပၼ်ၶိုၼ်း ။
ပၢင်ၼႄၵၢင်ၸႂ်ဝဵင်းတူၼ်ႈတီးမိူဝ်ႈၼႆႉ လႆႈဝႃႈပလိၵ်ႈၸႂ်ႉလၢႆးႁၢႆႉၸႃႉ ႁၢမ်ႈယႃႉၾုင်ၵူၼ်းမိူင်း ႁၢဝ်ႈႁႅင်းလိူဝ်ၵူႈဝၼ်း။ ၵူၺ်း ၵႃႈ ၸုမ်းသူတ်ႇမူၼ်းလွတ်ႈဢၢၼ်ႇပထၢၼ်းၵၢင်ဝဵင်းၵေႃႈဢမ်ႇထွႆထွၼ်သေ မိူဝ်ႈၼႆႉယၢမ်းဝၢႆးဝၼ်း 4 မူင်း ၶွၼ်ႈၵၼ်တီႈ ၵၢင်ဝဵင်းတီႈႁူပ်ႉၵၼ်ၵူႈဝၼ်းၼၼ်ႉသေ သူတ်ႇမူၼ်းႁေႃးဢၢၼ်ႇပရိတ်ႈလူင်ၵႂႃႇၶႃႈဢေႃႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ