မိူဝ်ႈၼႆႉ ဝၼ်းတီႈ 2/3/2021 တႄႇဢဝ် ယၢမ်းၵၢင်ၼႂ် 9 မူင်း ထိုင် ဝၢႆးဝၼ်း မွၵ်ႈ 3 မူင်းၼႆႉ ပလိၵ်ႈ/သိုၵ်းမၢၼ်ႈ ၸႂ်ႉဢဵၼ် ႁႅင်းၵူၼ်းတင်းၼမ် ပွႆႇမၢၵ်ႇၵႅတ်ႉသ်ၼမ်ႉတႃ ယိုဝ်းမၢၵ်ႇၵွင်ႈယၢင် တီႈၼႂ်းပၢင်ၼႄၵၢင်ၸႂ် ၼႂ်းၸႄႈဝဵင်း တူၼ်ႈတီး ၸိုင်ႈတႆးပွတ်းၸၢၼ်း ။
ၵူၼ်းၼုမ်ႇ ဢၼ်ၶဝ်ႈႁူမ်ႈပၢင်ၼႂ်ၵၢင်ၸႂ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ပလိၵ်ႈသိုၵ်းမၢၼ်ႈ ၶဝ် ၸႂ်ႉလၢႆးႁုၵ်ႉႁၢႆႉႁၢဝ်ႈႁႅင်း ၶဝ်ႈတီႉၵူၼ်းမိူင်း ၽႅဝ်ၼႂ်းႁိူၼ်းယေး ၼႂ်းႁၢၼ်ႉၶၢႆၶူဝ်းၸိူဝ်းၼႆႉၶႃႈ။ ၶဝ်ဢမ်ႇမီးၸႂ်ၵူၼ်းသေဢိတ်းယဝ်ႉ။ လၢႆးႁဵတ်းၶဝ်မိူဝ်ႈၼႆႉ မိူၼ်ၵူၼ်း ၸူၼ်၊ ၵူၼ်းမိူၵ်ႈလူင်ၼၼ်ႉၶႃႈဢေႃႈ။ ႁဝ်းၶႃႈ ဢွၼ်ၵၼ်ပၢႆႈၵႂႃႇမူၵ်းဝႆႉ ၼႂ်းႁိူၼ်းလင်ၼိုင်ႈ ႁဝ်းၶႃႈတေမီးမွၵ်ႈ 20 ၵေႃႉၼႆႉ ၶႃႈ။ သင်ဝႃႈ ၶဝ်ၶဝ်ႈမႃးတီႉႁဝ်းၶႃႈ တီႈၼႂ်းႁိူၼ်းၼၼ်ႉ ႁဝ်းၶႃႈ ၵူၼ်းၼုမ်ႇ လႆႈၸႂ်ၵၼ်ယဝ်ႉ တေဢမ်ႇပၼ်တီႉ တေမင်ၶဝ် ၼၼ်ႉၵူၺ်းယဝ်ႉၶႃႈ”- ဝႃႈၼႆ။
မိူဝ်ႈပူၼ်ႉမႃး ဝၼ်းတီႈ 28/2/2021 ၼၼ်ႉၵေႃႈ ပလိၵ်ႈသိုၵ်းမၢၼ်ႈ ၸႂ်ႉဢဵၼ်ႁႅင်း ၵူၼ်းတင်းၼမ် ပွႆႇမၢၵ်ႇၵႅတ်ႉသ်ၼမ်ႉ တႃ၊ ယိုဝ်းၵွင်ႈယၢင်၊ ႁူတ်းၼမ်ႉ ၸိူဝ်းၼႆႉ။
“မိူဝ်ႈဝၼ်းတီႈ 28 ပူၼ်ႉမႃးၼႆႉ ႁဝ်းၶႃႈၵူၼ်းၼုမ်ႇၵေႃႈလႆႈဢွၼ်ၵၼ်ပၢႆႈၶႃႈဢေႃႈ ဝၼ်းၼၼ်ႉၵေႃႈ ႁၢဝ်ႈႁႅင်း မိူၼ်မိူဝ်ႈ ၼႆႉၼင်ႇၵဝ်ႇၶႃႈ။ ၵူၺ်းၵႃႈ ၶဝ်ဢမ်ႇမႃးသွၵ်ႈၽႅဝ်ၼႂ်းႁိူၼ်း မိူၼ်မိူဝ်ႈၼႆႉ။ မိူဝ်ႈၼႆႉ ၶဝ်ႈတီႉၽႅဝ်ၼႂ်းႁိူၼ်းဢေႃႈ ။ ၶႂ်ႈ တိုၵ်းသူၼ်း ထိုင်ၵူၼ်းမိူင်း ၵူၼ်းၼုမ်ႇႁဝ်းၶႃႈဝႃႈ ၽွမ်ႉၵၼ် ႁူမ်ႈႁွမ်းၵၼ် ယႃႇထွႆ ယႃႇၵၢၼ်ႉ ဢၼ်ႁဝ်းၶႃႈ ႁဵတ်းယူႇၼႆႉ ဢမ်ႇၸႂ်ႈၵၢၼ်ႁၢႆႉ။ မၼ်းပဵၼ်ၵၢၼ်လီ တႃႇၵူၼ်းမိူင်းႁဝ်းၶႃႈၵူႈၵေႃႉ။ ပဵၼ်လွင်ႈတြႃးမၢၼ်ႇမႅၼ်ႈၵူၺ်း ႁဝ်းၶႃႈ တေႃႇသူႈ ဢၼ်ဢမ်ႇ တြႃးၼိူဝ်ၵူၼ်းမိူင်းၼၼ်ႉၵူၺ်း။ ႁဝ်းၶႃႈ သၢၼ်ၶတ်း လွင်ႈဢမ်ႇမၢၼ်ႇမႅၼ်ႈၸွမ်းထမ်းတြႃးၵူၺ်းၶႃႈ” – ၵူၼ်းၼုမ်ႇ ၶဝ်ႁူမ်ႈ ၼႄၵၢင်ၸႂ် သိုပ်ႇ လၢတ်ႈၼႄၼင်ႇၼႆ။
မိူဝ်ႈၼႆႉ ဝၼ်းတီႈ 2/3/2021 ယၢမ်းဝၢႆးဝၼ်း ယူႇတီႈပလိၵ်ႈသိုၵ်းမၢၼ်ႈ ၸႂ်ႉလၢႆးႁုၵ်ႉ ႁၢႆႉသေ ၶဝ်ႈတီႉၵူၼ်းမိူင်းၵူၼ်းၼုမ်ႇ ၵႂႃႇ 14 ၵေႃႉ။ ၼႂ်းၼၼ်ႉ တေပႃးလုၵ်ႈႁဵၼ်း ၵမ်ႈၼမ် ၼႆယဝ်ႉ။
တႄႇဢဝ် ဝၼ်းတီႈ 28/2/2021 တေႃႇထိုင် မိူဝ်ႈၼႆႉ ဝၼ်းတီႈ 2/3/2021 ယူႇတီႈပလိၵ်ႈသိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉသေ တေႃႇၵူၼ်းမိူင်းၼႄၵၢင်ၸႂ် မႃးႁၢဝ်ႈႁႅင်း ၼႂ်းၸႄႈတူၼ်ႈတီးၼႆႉ ဝႃႈၼႆ။
