ပလိၵ်ႈ/ သိုၵ်းမၢၼ်ႈ တီႉၵူၼ်းၼုမ်ႇ တီႈလႃႈသဵဝ်ႈၵႂႃႇထႅင်ႈ ၸၢႆးၵေႃႉၼိုင်ႈ ယိင်းၵေႃႉၼိုင်ႈ ဝႃႈၼႆ။
မိူဝ်ႈၼႆႉ ဝၼ်းတီႈ 2/3/2021 ပလိၵ်ႈ/ သိုၵ်းမၢၼ်ႈ ဢၼ်ပႂ်ႉဝႆႉတီႈၼႃႈၸၼ်ႉၸွမ် ဝဵင်းလႃႈသဵဝ်ႈၼၼ်ႉ ႁႄႉရူတ်ႉၶိူင်းၵူၼ်း ၼုမ်ႇ ၶီႉသွၼ်ႉမႃးၸွမ်းၵၼ် 2 ၵေႃႉၼၼ်ႉ ၵိုတ်းသေ တီႉၺွပ်းၵုမ်းတူဝ်ၵႂႃႇ ပဵၼ်ၽူႈၸၢႆးၵေႃႉၼိုင်ႈလႄႈ ၽူႈယိင်းၵေႃႉၼိုင်ႈ။
ၵူၼ်းၼုမ်ႇ လႃႈသဵဝ်ႈ ၵေႃႉၼိုင်ႈ လၢတ်ႈဝႃႈ – “ၸႂ်ႈၶႃႈဢေႃႈ ပဵၼ်ၵူၼ်းၼုမ်ႇ ၸၢႆးၵေႃႉၼိုင်ႈ၊ ယိင်းၵေႃႉၼိုင်ႈ ၶဝ်ၶီႇရူတ်ႉ ၶိူင်ႈမႃးတင်းၼႃႈၸၼ်ႉၸွမ်လႃႈသဵဝ်ႈ သဵင်ရူတ်ႉၶိူင်ႈၶဝ်သမ်ႉ မေႃႁႅင်းသေ ပလိၵ်ႈ/ သိုၵ်းမၢၼ်ႈ ႁွင်ႉၵိုတ်း ယဝ်ႉၵေႃႈ တီႉဢဝ် ၶဝ်သွင်ၵေႃႉၼၼ်ႉၵႂႃႇၶႃႈ”- ဝႃႈၼႆ။
ယၢမ်းလဵဝ် တီႈၸႄႈဝဵင်းလႃႈသဵဝ်ႈၼႆႉ ၵူၼ်းမိူင်းဢိၵ်ႇပႃးၵူၼ်းၼုမ်ႇ ဢၼ်ဢွၵ်ႇ ၼႄၵၢင်ၸႂ် သၢၼ်ၶတ်းတေႃႇသိုၵ်း မၢၼ်ႈမႃးၼႆႉ ထုၵ်ႇပလိၵ်ႈ/ သိုၵ်းမၢၼ်ႈ တီႉၺွပ်းၵုမ်းတူဝ်ဝႆႉ တင်းမူတ်းမီးၵႂႃႇ 28 ၵေႃႉယဝ်ႉ။
“မိူဝ်ႈဝၼ်းတီႈ 28/2/2021 ပူၼ်ႉမႃး ဢၼ်ၶဝ်တီႉၺွပ်းၵႂႃႇၵူၼ်းၼုမ်ႇၼၼ်ႉ ယူႇတီႈ ပေႃႈမႄႈၽႂ်မၼ်း လႆႈၵႂႃႇလူင်းလၢႆး မိုဝ်း ႁၢပ်ႉဢဝ်ဢွၵ်ႇမႃး 7 ၵေႃႉ ပွႆႇတူဝ်ဢွၵ်ႇမႃး မိူဝ်ႈၼႆႉ ယၢမ်းၵၢင်ဝၼ်း 12 မူင်း။ ၵူၼ်းမိူင်းဢၼ်ၸိူဝ်းၺႃးတီႉၸိူဝ်းၼၼ်ႉၵေႃႈပလိၵ်ႈလႄႈသိုၵ်းတိုၵ်ႉထဵတ်ႈထၢမ်ယူႇ ၵမ်ႈၽွင်ႈပႆႇလႆႈပွၵ်ႈၶိုၼ်းႁိူၼ်း ”- ၵူၼ်းၼုမ်ႇ ၼႂ်းပိုၼ်ႉတီႈလႃႈသဵဝ်ႈ လၢတ်ႈၼႄၼင်ႇၼႆ။
ၵူၼ်းမိူင်း ၵူၼ်းၼုမ်ႇ ဢၼ်ထုၵ်ႇပလိၵ်ႈသိုၵ်းမၢၼ်ႈ တီႉဝႆႉ တီႈလႃႈသဵဝ်ႈၼႆႉ တင်းမူတ်း မီး 28 ၵေႃႉ ပွႆႇတူဝ်ပၼ်ၶိုၼ်း ယဝ်ႉ 7 ၵေႃႉ ၵိုတ်းထႅင်ႈ 21 ၵေႃႉ ၼႆယဝ်ႉ။
တႄႇဢဝ် ဝၼ်းတီႈ 28/2/2021 မႃးထိုင် ဝၼ်းတီႈ 1/3/2021 ၼႆႉ ပၢင်ၼႄၵၢင်ၸႂ် တီႈဝဵင်းလႃႈသဵဝ်ႈၼၼ်ႉ ယူႇတီႈပလိၵ်ႈ/ သိုၵ်းမၢၼ်ႈ ၸႂ်ႉလၢႆးႁၢဝ်ႈႁႅင်း ပွႆႇမၢၵ်ႇ ၵႅတ်ႉသ်ၼမ်ႉတႃ၊ ယိုဝ်းမၢၵ်ႇၵွင်ႈယၢင်၊ ဢဝ်ၼမ်ႉသိတ်း လႄႈ လမ်းပေႃႉထုပ်ႉ ၵူၼ်းမိူင်းၼႄၵၢင်ၸႂ် ႁၢဝ်ႈႁႅင်းမႃးၵူႈဝၼ်း။
မိူဝ်ႈဝႃးတင်း မိူဝ်ႈၼႆႉ ၵူၼ်းၼုမ်ႇလႃႈသဵဝ်ႈ ဢဝ်ႁၢင်ႈၼႃႈ ၸွမ်ၸိၵ်းသိုၵ်းလူင် မိၼ်းဢွင်ႇလၢႆႇ တိတ်းပႃႉသႂ်ႇၼိူဝ်သဵၼ်ႈတၢင်း လူင် ၸွမ်းၼႂ်းၵၢင်ဝဵင်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ