ၵူၼ်းၼုမ်ႇၽႃၵၢၼ်ႉ ၵူႈၸၢဝ်းၶိူဝ်း ၼႂ်းၸႄႈမိူင်းၶၢင် ႁူမ်ႈၵၼ် ဢွၵ်ႇၼႄၵၢင်ၸႂ် သၢၼ်းၶတ်းတေႃႇသိုၵ်းမၢၼ်ႈ ယိုတ်းဢႃႇ ၼႃႇမႃး ဢမ်ႇၶၢတ်ႇဢမ်ႇဝၢႆး ပလိၵ်ႈ/သိုၵ်းမၢၼ်ႈ ပွႆႇမၢၵ်ႇသႂ်ႇ ၼႂ်းၵႄႈပၢင်ၼႄ ၵၢင်ၸႂ် ဝႃႈၼႆ။
မိူဝ်ႈၼႆႉ ဝၼ်းတီႈ 2/3/2021 တီႈၵၢင်ဝဵင်း ၼႂ်းၸႄႈဝဵင်းၽႃၵၢၼ်ႉ ၸႄႈမိူင်းၶၢင် ပလိၵ်ႈ/သိုၵ်းမၢၼ်ႈ ဢဝ်ဢဵၼ်ႁႅင်း ၶဝ်ႈယႃႉပၢင်ၼႄၵၢင်ၸႂ်၊ ပွႆႇမၢၵ်ႇသႂ်ႇ ၵူၼ်းမိူင်းထိုင်တီႈယၢႆႈၵၼ်၊ လွင်ႈၸႂ်ႉလၢႆးႁၢဝ်ႈႁႅင်းႁၢႆႉၸႃႉ ၼႆႉတွၼ်ႈတႃႇၵူၼ်းၼႄၵၢင်ၸႂ်တီႈၽႃၵၢၼ်ႉ ပဵၼ်ပွၵ်ႈႁႅၵ်ႈ။
ၽူႈၶဝ်ႈႁူမ်ႈ ပၢင်ၼႄၵၢင်ၸႂ် တီႈၽႃၵၢၼ်ႉ ၵေႃႉၼိုင်ႈ လၢတ်ႈဝႃႈ – “မိူဝ်ႈတႄႇမၼ်းၼႆႉ ထႅဝ်ႁဝ်းၶႃႈ ၼႄၵၢင်ၸႂ်ၼႆႉ တိုၵ်ႉ ဢွၼ်ၵၼ် ၼႄၵၢင်ၸႂ် ပႆမႃးၼႂ်းဝဵင်း တၢင်းၵၢတ်ႇလူင်ၼႆႉ မီးပလိၵ်ႈၵေႃႉၼိုင်ႈ ၶဝ်ႈမႃးတူင်ႉၼိုင်ႁဵတ်း CDM ႁူမ်ႈၸွမ်းၵူၼ်းမိူင်း။ ၵမ်းၼႆႉ သိုၵ်းမၢၼ်ႈ လႆႈငိၼ်းၶၢဝ်ႇ ပလိၵ်ႈသေ လၢမ်းၸွမ်းတင်းလင် ထႅဝ်ၼႄၵၢင်ၸႂ် ႁဝ်းၶႃႈ ဢဵၼ်ႁႅင်းၵူၼ်းၶဝ် တေမီး 4-5 သိပ်း ၼႆႉ လူင်းမႃးသွၵ်ႈႁႃ ဢၢႆႈပလိၵ်ႈ ဢၼ်မႃး တူင်ႉၼိုင်ၸွမ်းၼႂ်းၵႄႈၵူၼ်းမိူင်းၼၼ်ႉ။ ယဝ်ႉၵေႃႈ ပွႆႇမၢၵ်ႇဢၼ်မီးသဵင် ထႅင်ႈ 2-3 လုၵ်ႈ” – ဝႃႈၼႆ။
ပလိၵ်ႈ၊သိုၵ်းမၢၼ်ႈ ပွႆႇမၢၵ်ႇလွၵ်ႇငိုတ်ႈလႄႈၵူၼ်းမိူင်း ၵူၼ်းၼုမ်ႇ ၼႄၵၢင်ၸႂ် တူၵ်းၸႂ်တိုၼ်ႇသၢၼ်ႈ ဢွၼ်ၵၼ်ငိူင်ႉဝႄႈပၢႆႈၶဝ်ႈသွၼ်ႈၼႂ်းႁိူၼ်းၵူၼ်းဝၢၼ်ႈ။
“ၽိူဝ်ႇဝႃႈ ပလိၵ်ႈသိုၵ်းမၢၼ်ႈ ပွႆႇမၢၵ်ႇယဝ်ႉၼႆၵေႃႈ မၢင်ၵေႃႈ ၶိုင်လႅၼ်ႈၶဝ်ႈႁိူၼ်း ယေးႁိမ်းႁွမ်းၸိူဝ်းၼၼ်ႉ ။ ၽွင်းၵူၼ်းတိုၵ်ႉပၢႆႈ ပလိၵ်ႈသမ်ႉလမ်းပေႃႉ။ ယဝ်ႉၵေႃႈ ထွၼ်ဢဝ်ၵၢၵ်ႇသေႃးရူတ်ႉသၢမ် လေႃႉ ဢၼ်ၸုမ်းၼႄၵၢင်ၸႂ် တၢင်ႇၶိူင်ႈသဵင်/ သွင်းပွၵ်ႉၼၼ်ႉပႅတ်ႈ ၊ တီႈၽႃၵၢၼ်ႉၼႆႉ လႆႈဝႃႈ မိူဝ်ႈၼႆႉ ပလိၵ်ႈ/ သိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉ ပွႆႇမၢၵ်ႇသႂ်ႇၵူၼ်းမိူင်းၼႆႉ ပဵၼ်ပွၵ်ႈဢွၼ်တၢင်းသုတ်း။ မိူဝ်ႈၵူႈပွၵ်ႈ ဢမ်ႇပဵၼ်ၸိူင်ႉၼႆၶႃႈ”- ၽူႈၶဝ်ႈႁူမ်ႈ ၼႄၵၢင်ၸႂ် တီႈၽႃ ၵၢၼ်ႉ ၵေႃႉၼိုင်ႈ သိုပ်ႇလၢတ်ႈၼႄၼင်ႇၼႆ။
တီႈပၢင်ၼႄၵၢင်ၸႂ်တီႈဝဵင်းၽႃၵၢၼ်ႉၼႆႉ ၵမ်ႈၼမ် ပဵၼ်ၵူၼ်းၼုမ်ႇ ၸၢဝ်းၶိူဝ်း မိူၼ်ၼင်ႇ ၸၢဝ်းၶိူဝ်းတႆး၊ ၶၢင် ၸိူဝ်းၼႆႉ မိူဝ်ႈၼႆႉ ၽူႈၶဝ်ႈႁူမ်ႈ ၼႄၵၢင်ၸႂ် ဢမ်ႇယွမ်းမိုၼ်ႇ လႆႈႁူႉၼင်ႇၼႆ။
