ပၢင်ၼႄၵၢင်ၸႂ်တီႈတူၼ်ႈတီးမိူဝ်ႈၼႆႉႁၢဝ်ႈႁႅင်း ၵူၼ်းမိူင်းတိတ်းႁၢင်ႈမိၼ်းဢွင်ႇလၢႆႇၼိူဝ်တၢင်းလူင်

ၵူၼ်းမိူင်းတူၼ်ႈတီး ၼႄၵၢင်ၸႂ်သၢၼ်ၶတ်းသိုၵ်းယိုတ်းဢႃႇၼႃႇၸိုင်ႈမိူင်း၊ ပၢင်ၼႄၵၢင်ၸႂ်မိူဝ်ႈၼႆႉ သိုၵ်းလႄႈပလိၵ်ႈမၢၼ်ႈၸႂ်ႉလၢႆးႁၢႆႉႁၢမ်ႈႁႄႉ တီႉၺွပ်းၵူၼ်းၵႂႃႇၼႄၵၢင်ၸႂ် ဢမ်ႇယွမ်း 10။

ဝၼ်းတီႈ 2/3/2021 ယၢမ်းၵၢင်ၼႂ်ၼႆႉ ၵူၼ်းမိူင်း ၸဵမ်ၵူၼ်းၼုမ်ႇ ႁူမ်ႈၵၼ်သေ ဢဝ်ႁၢင်ႈၼႃႈ ၸွမ်ၸိၵ်းသိုၵ်းလူင် မိၼ်း ဢွင်ႇလၢႆႇ ၽူႈၼမ်းၸုမ်းသိုၵ်းမၢၼ်ႈ ဢၼ်ယိုတ်းဢႃႇၼႃႇ ၸိုင်ႈမိူင်းၼၼ်ႉမႃး တိတ်းပႃႉသႂ်ႇ တီႈၼိူဝ်သဵၼ်ႈတၢင်းလူင် (အရှေ့မြို့ပတ်လမ်း) ၼႂ်းၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်း ႁႂ်ႈၵူၼ်းမိူင်း ယဵပ်ႇတႆႇပႆၵႂႃႇမႃး ၼႄၾၢင်ႁၢင်ႈ ဢမ်ႇၵျိူၵ်ႈ ဢမ်ႇ လူဝ်ႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း  ။

တီႈၵူၼ်းမိူင်းၼႄၵၢင်ၸႂ်ၼၼ်ႉ မီးပလိၵ်ႈလႄႈတင်းသိုၵ်းဢဝ်ႁႅင်းမႃးပိုတ်းယိုဝ်းယႃႉၾုင်ၵူၼ်းမိူင်းၼႄၵၢင်ၸႂ်။ လုၵ်ႈႁဵၼ်းၵေႃႉၼိုင်ႈၺႃးမၢၵ်ႇၵွင်ႈယင် မၢတ်ႇၸဵပ်းတီႈၵွင်းလင် ။    

“မိူဝ်ႈၵႆႈၼႆႉၵူၺ်း ပဵၼ်ၵူၼ်းၼုမ်ႇ ၽူႈၸၢႆးၵေႃႉၼိုင်ႈ တိူဝ်ႉၺႃးမၢၵ်ႇၵွင်ႈ ယၢင် ဢၼ်ပလိၵ်ႈသိုၵ်းၶဝ် ယိုဝ်းသႂ်ႇ တၼ်း သိတ်ႈသႂ်ႇၵွင်းလင်မၼ်းၸၢႆး လႆႈမၢတ်ႇၸဵပ်း ဝႆႉၶႃႈဢေႃႈ” – ၽူႈသိုဝ်ႉၶၢဝ်ႇ ၽူႈတွႆႇႁွၵ်ႈ ႁၢႆးငၢၼ်းၼင်ႇၼႆ။

မိူဝ်ႈၼႆႉ ယၢမ်းၵၢင်ၼႂ် ပလိၵ်ႈ/ သိုၵ်းမၢၼ်ႈ ဢဝ်မၢၵ်ႇၵႅတ်ႉသ်ၼမ်ႉတႃ ပွႆႇသႂ်ႇ ၵူၼ်းၼႄၵၢင်ၸႂ်ၵူၺ်းဢမ်ႇၵႃး ဢဝ်မၢၵ်ႇၵႂၼ်းပွႆႇသႂ်ႇပႃးၼႂ်းဝၢင်းႁိူၼ်းၵူၼ်းမိူင်း။

ၶၢဝ်းယၢမ်းၵၢင်ဝၼ်း သိုၵ်းလႄႈပလိၵ်ႈ ဢဝ်ဢဵၼ်ႁႅင်းၵႂႃႇလိုပ်ႈလမ်းဝႅတ်ႉလွမ်ႉ ၵူၼ်းၼႄၵၢင်ၸႂ်တီႈတၢင်းႁုၼ်ႇႁၢင်ႈမႃႉ။ တီႉၺွပ်းၵႂႃႇၵူၼ်းၼုမ်ႇမွၵ်ႈ 10 ၵေႃႉ ပႃးတင်းၼၢင်းယိင်းဢွၼ်ႇၵမ်ႈၽွင်ႈ။

ယိင်းဢွၼ်ႇ ၽူႈၶဝ်ႈႁူမ်ႈၼႄၵၢင်ၸႂ်သေ လႆႈပၢႆႈသိုၵ်းလႄႈပလိၵ်ႈလိုပ်ႈလမ်းၼၼ်ႉလၢတ်ႈတီႈၽူႈတွႆႇႁွၵ်ႈဝႃႈ – ပလိၵ်ႈလႄႈ သိုၵ်း လမ်းၵူၼ်းၼုမ်ႇ။ ၵူၼ်းၼုမ်ႇၶဝ်ႈၵႂႃႇမႅပ်းဝႆႉၼႂ်းဝၢင်းႁိူၼ်းၵူၼ်းဝၢၼ်ႈ။ ပလိၵ်ႈၶဝ်ႈမႃးသွၵ်ႈတဝ်ၼႂ်းႁၢၼ်ႉၶၢႆၼမ်ႉၼဵင်ႈၸဵမ်းသေ တီႉၺွပ်းၵႂႃႇၵူၼ်းၼုမ်ႇၸိူဝ်းပၢႆႈပဵမ်ႇၼႂ်းႁၢၼ်ႉၼၼ်ႉ၊ လႆႈၵႂႃႇဢမ်ႇယွမ်း 10 ၵေႃႉ ။ပႃးတင်းၽူႈယိင်းႁေ– ဝႃႈၼႆ။

ၵူၼ်းၼႄၵၢင်ၸႂ်ၵမ်ႈၽွင်ႈယင်းလၢတ်ႈဝႃႈ –ပလိၵ်ႈႁွင်ႉသႅၼ်ႇႁႂ်ႈၵူၼ်းၼႄၵၢင်ၸႂ်ဢွၵ်ႇမႃး၊ ဝၢႆးၼၼ်ႉဢဝ်ၵွင်ႈႁၢတ်ႇသႂ်ႇပႃးႁိူၼ်းၵူၼ်းဝၢၼ်ႈ– ဝႃႈၼႆ။

ဝၢႆးလင်ပလိၵ်ႈတီႉလႆႈၵူၼ်းမွၵ်ႈ 10 ၵေႃႉၼၼ်ႉသေ ဢွၼ်ၵၼ်ပွၵ်ႈမိူဝ်းၵႂႃႇလႄႈ ၵူၼ်းၼုမ်ႇၼႄၵၢင်ၸႂ်ၵေႃႈ ၸင်ႇယႅၵ်ႈၵၼ်ပူတ်းလိုဝ်ႈပၢင်ၼႄၵၢင်ၸႂ်ဝၼ်းမိူဝ်ႈၼႆႉ။

ဝၢႆးသေ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး မိူဝ်ႈဝၼ်းတီႈ 1/2/2021 ၼၼ်ႉ ၵူၼ်းမိူင်း ၵူၼ်းၼုမ်ႇ ပတ်းပိုတ်ႉ မိူင်း ႁူမ်ႈတုမ် ဢွၵ်ႇၼႄၵၢင်ၸႂ်သၢၼ်းၶတ်းတေႃႇသိုၵ်းမၢၼ်ႈ မႃးႁၢဝ်ႈႁႅင်း။

 တီႈတူၼ်ႈတီးၵေႃႈ ဢမ်ႇၵိုတ်းဢမ်ႇလိုဝ်ႈ ဢွၵ်ႇၼႄၵၢင်ၸႂ်သၢၼ်ၶတ်းတေႃႇသိုၵ်းမၢၼ်ႈ ႁၢၼ်ႉတေႃႇထိုင် ဝၼ်းမိူဝ်ႈၼႆႉ။ တႄႇဢဝ် ဝၼ်းတီႈ 28/2/2021 မႃးတေႃႇထိုင် ဝၼ်းတီႈ 2/3/2021 ၼႂ်းၶၢဝ်းတၢင်း 3 ဝၼ်းမႃးၼႆႉ ပလိၵ်ႈ သိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉ ဢဝ်ၼမ်ႉသိတ်း ၊ ပွႆႇမၢၵ်ႇၵႅတ်ႉသ်ၼမ်ႉတႃ၊ ယိုဝ်းၵွင်ႈ၊ လၢမ်းတီႉ ၵူၼ်းမိူင်း မႃးႁၢဝ်ႈႁႅင်း ၼင်ႇႁိုဝ် ပၢင်ၼႄၵၢင်ၸႂ် ပေႃးတေၵိုတ်း ၼင်ႇႁိုဝ်လုမ်ႈၾႃႉတေႁပ်ႉလႄႈမၵ်းမၼ်ႈၶဝ်ပဵၼ်ၶုၼ်မိူင်း ဝႃႈၼႆ။