ပလိၵ်ႈမၢၼ်ႈ/သိုၵ်းမၢၼ်ႈ ၸႂ်ႉဢဵၼ်ႁႅင်း ၶဝ်ႈတီႉၺွပ်း ၵူၼ်းမိူင်း ၼႂ်းၵျွင်းၽြႃးၶရိတ်ႉယၼ်ႇၶၢင် (ၵၶျိၼ်ႇၼိတ်ႉၶျိၼ်း) 11 ၵေႃႉ ဢၼ်မီးတီႈ ပွၵ်ႉ 1 ဝဵင်းလႃႈသဵဝ်ႈ ဝႃႈၼႆ။
မိူဝ်ႈၼႆႉ ဝၼ်းတီႈ 1/3/2021 ယၢမ်းဝၢႆးဝၼ်း ယူႇတီႈပလိၵ်ႈ/ သိုၵ်းမၢၼ်ႈ ႁူမ်ႈၵၼ် ၶဝ်ႈတီႉၺွပ်း တီႈၵျွင်းၽြႃး ၶရိယၼ်ႇ ပွၵ်ႉ 1 ၼႂ်းဝဵင်းလႃႈသဵဝ်ႈၼၼ်ႉ တီႉၵႂႃႇ ၽူႈပိုၼ်ၽႄႈ (ထမ်မသြႃႇ) 4 ၵေႃႉ၊ လိူဝ်သေ ၼၼ်ႉၵေႃႈ ပဵၼ်လုၵ်ႈႁဵၼ်း ဢၼ်ယူႇတီႈၼၼ်ႉ 7 ၵေႃႉ။ ပလိၵ်ႈမၢၼ်ႈ ဢဝ်ၶဝ် ၵႂႃႇၶင်ဝႆႉ ၼႂ်းတပ်ႉပလိၵ်ႈမၢႆ 1 (လွႆယဵဝ်ႈ) – လႆႈႁူႉၸွမ်းၼင်ႇၼႆ။
ၽူႈတူင်ႉၼိုင် ၼႂ်းပၢင်ၼႄၵၢင်ၸႂ် တီႈလႃႈသဵဝ်ႈ ၵေႃႉၼိုင်ႈ လၢတ်ႈဝႃႈ – “မိူဝ်ႈၼႆႉ ၵူၼ်းၼႄၵၢင်ၸႂ် တီႉၺွပ်း ၵူၼ်း ဢၼ်ပွမ်တူဝ်သေ မႃးယူႇၼႂ်းၵႄႈၶဝ်၊ ၶဝ်ၺွပ်းမႃးတီႈၵျွင်းၽြႃးၶၢင် တီႈပွၵ်ႉ 1 ၼႆႉသေ ထႃႁူဝ်လွမ်ႈ၊ ၶုတ်ႇၶူၼ်တႃႇမၼ်းသေ ပွႆႇၶိုၼ်း။ ပေႃးပွႆႇၵေႃႈ မၼ်းၵႂႃႇ ႁွင်ႉတပ်ႉပလိၵ်ႈမႃးတီႉဢဝ် ၵူၼ်းဢၼ်မီးၼႂ်းၵျွင်းၽြႃး ၼႆႉယဝ်ႉယိုင်”- ဝႃႈၼႆ။
ၵူၼ်းမိူင်း 11 ၵေႃႉၼၼ်ႉ – (1) သြႃႇၼေႃႇမၢႆ (ဆရာ KD နော်မိုင် – ဓမ္မ ဆရာ)၊ သြႃႇၶွင်ႇလွၼ်း (ဆရာခေါင်လွမ်း – ဓမ္မဆရာ)၊ သြႃႇသေႃႇတွႆႇဢွင်ႇ (ဆရာဇော်ဒွဲအောင် – ဓမ္မဆရာ)၊ သြႃႇသႅင်ယႃႇ ဢွင်ႇ (ဆရာဆိုင်ရာအောင် – ဓမ္မဆရာ)၊ မွင်ႇၸၢဝ်ႇၶွင်ႇ (မောင်ဇော်ခေါင်)၊ လုၵ်ႈႁဵၼ်း မွင်ႇႁွင်းၶွင်ႇ (မောင်ဟောင်းခေါင် – ကျောင်းသား)၊ လုၵ်ႈႁဵၼ်း မွင်ႇတဝ်ႇၶွင်ႇ (မောင်ဒေါင်ဝ် ခေါင် – ကျောင်းသား)၊ မွင်ႇတဝ်ႇၸူင်း (မောင်ဒေါင်ဝ်ဂျုံး – KTC)၊ မွင်ႇၶွင်ႇၸူင်း (မောင်ခေါင်ဂျုံး – KTC) လႄႈ မွင်ႇၵွမ်ႇသုတ်ႉၼၼ်ႇ (မောင်ဂွမ်ဆွတ်နန် – KTC) ၸိူဝ်းၼႆႉ။
“သိုၵ်းမၢၼ်ႈ/ ပလိၵ်ႈၶဝ်ႈၺွပ်း တီႈၵျွင်းၶရိယၼ်ႇၼႆႉ ၶဝ်ဢမ်ႇၶဝ်ႈၺွပ်းလီလီ၊ ၶဝ်ႁေႃႈၵႃးၽၢင်ႈ သႂ်ႇၽၵ်းတူသေ ၶဝ်ႈတီႉၺွပ်းဢေႃႈၼႆႉ မိူၼ်ၵူၼ်းၸူၼ် ၵူၼ်းႁၢႆႉၼၼ်ႉၶႃႈယဝ်ႉ”- ၵူၼ်းမိူင်းပိုၼ်ႉတီႈ လႃႈသဵဝ်ႈ လၢတ်ႈၼႄၼင်ႇၼႆ။
ပၢင်ၼႄၵၢင်ၸႂ်သၢၼ်ၶတ်းတေႃႇသိုၵ်းမၢၼ်ႈ ယိုတ်းဢႃႇၼႃႇ တီႈၸႄႈဝဵင်းလႃႈသဵဝ်ႈ မႃးတေႃႇထိုင်ယၢမ်းလဵဝ်ၼႆႉ ၵူၼ်း မိူင်း/ ၵူၼ်းၼုမ်ႇ ဢၼ်ထုၵ်ႇပလိၵ်ႈတီႉၺွပ်းၵုမ်းတူဝ်ဝႆႉ တင်းမူတ်းမီး 24 ၵေႃႉ ဝႃႈၼႆ။
ယၢမ်းလဵဝ် ၼႂ်းၸႄႈဝဵင်းလႃႈသဵဝ်ႈၼႆႉ ၸွမ်းၼႂ်းၵိဝ်ႇ ၼႂ်းသွႆး ၸိူဝ်းၼႆႉ ၸဵမ်ပလိၵ်ႈ/ သိုၵ်းမၢၼ်ႈ ပႂ်ႉၵူတ်ႇထတ်းၵူၼ်းၵႂႃႇမႃး ႁၢဝ်ႈႁႅင်း ၼႆယဝ်ႉ။
“ပလိၵ်ႈ/ သိုၵ်းၼႆႉ ပႂ်ႉၸွမ်းၼႂ်းၵိဝ်ႇ ၼႂ်းသွႆးၼမ်ၶႃႈဢေႃႈ ပႂ်ႉဝႆႉ ပေႃးၶဝ်ႁၼ် ၵူၼ်းမိူင်း ၵူၼ်းၼုမ်ႇ ၵႂႃႇမႃးၼႆၵေႃႈ ႁွင်ႉ ၸႅတ်ႈ ယွၼ်းတူၺ်းၾူၼ်း၊ ပေႃးႁၼ်ၼႂ်းၾူၼ်း တႅမ်ႈဝႆႉလွင်ႈသိုၵ်း ဢမ်ႇလီၼႆ ၶဝ်ႁွင်ႉၵႂႃႇၵမ်းလဵဝ်ၶႃႈ”- ၵူၼ်းလႃႈ သဵဝ်ႈ ၵေႃႉၼိုင်ႈ လၢတ်ႈၼႄၼင်ႇၼႆ။
မိူဝ်ႈဝႃး ဝၼ်းတီႈ 28 ၼႆႉ ၼၢင်းယိင်းၵေႃႉၼိုင်ႈ ဢႃယု မွၵ်ႈ 30 ပၢႆ ၺႃးမၢၵ်ႇၵႅတ်ႉသ်ၼမ်ႉတႃ မၢတ်ႇၸဵပ်းၸွမ်းႁၢဝ်ႈႁႅင်း ယၢမ်းလဵဝ် လႆႈသူင်ႇယူတ်းယႃတူဝ်ဝႆႉတီႈ ႁူင်းယႃလႃႈသဵဝ်ႈ။
ၼွၵ်ႈလိူဝ်ၼၼ်ႉ တီႈၸႄႈဝဵင်းတူၼ်ႈတီးၵေႃႈ မိူၼ်ၵၼ် မိူဝ်ႈဝႃး တင်းမိူဝ်ႈၼႆႉ ပလိၵ်ႈ/ သိုၵ်းမၢၼ်ႈ ၸႂ်ႉၵႅတ်ႉသ်၊ ၵွင်ႈယၢင်၊ ဢဝ်ၵႃးၼမ်ႉသိတ်ႇသႂ်ႇ သေယႃႉပၢင်ၵူၼ်းမိူင်းယၢႆႈ၊ ယင်းမီးၶၢဝ်ႇဝႃႈ ၵူၼ်းမိူင်း လႃႈသဵဝ်ႈ ၺႃးယိုဝ်းတၢႆ ၵေႃႉၼိုင်ႈ ၼႆၼၼ်ႉ ၽူႈတွႆႇႁွၵ်ႈတိုၵ်ႉၶတ်းၸႂ်ယိုၼ်ယၼ်ၶေႃႈမုၼ်း ႁႂ်ႈတႅတ်ႈတေႃးယူႇ။
