ၽူႈၵွၼ်းပွၵ်ႉ တီႈဝဵင်းမိူင်းယႆ ဢၼ်ၶွင်ႇသီႇသိုၵ်းမၢၼ်ႈ လိူၵ်ႈၶိုၼ်ႈမႃးမႂ်ႇ လူၺ်ႈဢမ်ႇပႃးသဵင်ၵၢင်ၸႂ်ၵူၼ်းမိူင်းၼၼ်ႉ ဢၢၼ်းၶိုင်ယိုတ်း တီႈလိၼ်ၼႂ်းဝၢၼ်ႈသေ တေႁဵတ်းလုမ်းၽူႈၵွၼ်းပွၵ်ႉ ၊ ၵူၼ်းၼႂ်းပွၵ်ႉလႄႈၸိူဝ်းယူႇႁိမ်းႁွမ်း ဢမ်ႇလႆႈၸႂ်။
မိူဝ်ႈႁၢင်လိူၼ်ၾႅပ်ႊၿိဝ်ႊရီႊ ပူၼ်ႉမႃးၼႆႉ ၽူႈၵွၼ်းပွၵ်ႉ 3 ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ၸုမ်းဢၼ်ၶွင်ႇသီႇသိုၵ်းမၢၼ်ႈ လိူၵ်ႈၶိုၼ်ႈမႃးမႂ်ႇၼၼ်ႉ ဢၢၼ်းယိုတ်းဢဝ် တီႈလိၼ်ၼႂ်းဝၢၼ်ႈ ဢၼ်ၵူၼ်းဝၢၼ်ႈ ႁူမ်ႈၵၼ်ၸႂ်ႉဝႆႉ ၊ ႁဵတ်းၵိၼ်ၵၢၼ်မႃးၸွမ်းၵၼ် ပီယၢဝ်းၶၢဝ်းႁိုင်ၼၼ်ႉ သေတေသၢင်ႈလုမ်းၽူႈၵွၼ်းပွၵ်ႉၵႂႃႇ ဝႃႈၼႆ။
ၸၢႆးၺုၼ်ႉ ၸဝ်ႈၶွင်ႁၢၼ်ႉၶဝ်ႈၽၵ်း ဢၼ်ယူႇႁိမ်းတီႈလိၼ်ဝၢၼ်ႈ ဢၼ်တေၺႃးယိုတ်းၼၼ်ႉ လၢတ်ႈဝႃႈ – “တီႈလိၼ်ၼႆႉ မၼ်းပဵၼ် ၼင်လိၼ်တၢင်း/ လူင်ပွင်ၸိုင်ႈဝႆႉၶႃႈ ဢေႃႈ။ ၵမ်းၼႆႉ ၽူႈၵွၼ်းပွၵ်ႉသမ်ႉ တေမႃးႁဵတ်းလုမ်းၼႂ်းပွၵ်ႉ တေမႃးယႃႉႁၢၼ်ႉၶၢႆၶဝ်ႈၽၵ်းၶႃႈ ဢၼ်မီးတင်းၼႃႈၼင်လိၼ်ၼႆႉသေ တေဢဝ်ပႅတ်ႈမူတ်းၶႃႈဢေႃႈ လိၼ်ၽိုၼ်ၼႆႉ။ ႁၢၼ်ႉၶၢႆၶဝ်ႈၽၵ်းၶႃႈၼႆႉ ၶႃႈပိုတ်ႇမႃးတီႈၼႆႈ တေမီးၶၢဝ်းတၢင်း မွၵ်ႈ 30 ပီယဝ်ႉၶႃႈ ”- ဝႃႈၼႆ။
ပၢင်ႇတီႈလိၼ် ၼႂ်းပွၵ်ႉ 3 တီႈၼႆႈပဵၼ်ပၢင်ႇၵူၼ်းမိူင်းႁူမ်ႈၵၼ်ၸႂ်ႉမႃးၸဵမ်ပၢၼ်ၸဝ်ႈၾႃႉ။ တၢင်းၵႂၢင်ႈတေမီးမွၵ်ႈ 30 ပေႇလႄႈ 50 ပေႇ။ ၵူၺ်းၵႃႈ ၸုမ်းၶွင်ႇသီႇၽွင်းငမ်းဝၢၼ်ႈဢိူင်ႇၸုမ်းမႂ်ႇ ဢၼ်ၵူၼ်းမိူင်းဢမ်ႇလႆႈလိူၵ်ႈသမ်ႉၶိုင်ဢၢင်ႈယိုတ်းဢဝ်လႄႈ ၵူၼ်းၼႂ်းပွၵ်ႉယွမ်ႇၵေႃႈ ဢမ်ႇလႆႈၸႂ်။
“ၾၢႆႇၼိုင်ႈၵေႃႈ ၶဝ်ပဵၼ်ၸုမ်းဢၼ်သိုၵ်းလိူၵ်ႈမႃးၵူၺ်း။ ဢမ်ႇပႃးၵၢင်ၸႂ်ၵူၼ်းမိူင်း။ ယၢမ်းလဵဝ်ၵေႃႈၶဝ်ဢမ်ႇဢုပ်ႇဢမ်ႇထၢမ် ၵူၼ်းမိူင်းသေ ၶဝ်ၶႂ်ႈႁဵတ်းသင်ႁဵတ်းလူင်ၵႂႃႇၼႆႉ ဢမ်ႇလႆႈၶႃႈ။ ၵူၺ်းၶဝ်တႄႉၵူၼ်းမိူင်းဢမ်ႇၽွမ်ႉၵေႃႈၶဝ်ဢမ်ႇထွမ်ႇ၊ ၶဝ်တေမႃးလွမ်ႉဢဝ်တီႈႁွင်ႇၸၢႆးၶႃႈႁၢၼ်ႉၶႃႈၼႆႉၵႂႃႇ ၶဝ်ဝႃႈၼႆဢေႃႈ”- ၸၢႆးၺုၼ်ႉ သိုပ်ႇလၢတ်ႈၼႄၼင်ႇၼႆ။
သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း မိူဝ်ႈဝၼ်းတီႈ 1/2/2021 ၼႆႉသေ တႃႇသိုပ်ႇႁဵတ်းၵၢၼ်ၵႂႃႇၼၼ်ႉ ၶိုၼ်းၶွတ်ႇၽွတ်ႈၸုမ်းၽွင်းငမ်း ပွၵ်ႉယွမ်ႇဝၢၼ်ႈဢိူင်ႇ ၊ လိူၵ်ႈဢဝ်ၵူၼ်းၶဝ်မႃးသႂ်ႇဝႆႉ လူၺ်ႈဢမ်ႇပႃးၵၢင်ၸႂ်ၵူၼ်းမိူင်း။ၾၢႆႇၼိုင်ႈ ၶၢဝ်းတၢင်းသိုၵ်းယိုတ်းဢႃႇၼႃႇမႃးၼိုင်ႈလိူၼ်တဵမ်မိူဝ်ႈၼႆႉ ၵူၼ်းမိူင်းဢမ်ႇၽွမ်ႉဢမ်ႇလႆႈၸႂ် တိုၵ်ႉသၢၼ်ၶတ်းၼႄၵၢင်ၸႂ်ယူႇၵူႈဝၼ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ