သဵင်ၵွင်ႈတႅၵ်ႇတၢင်းမူႇၸေႊ ႁၢဝ်ႈႁႅင်း လၢႆၵမ်း

မိူဝ်ႈၼႆႉ ဝၼ်းတီႈ 1/3/2021 ယၢမ်းၵၢင်ၼႂ် မွၵ်ႈ 10 မူင်းၶိုင်ႈ သဵင်ၵွင်ႈလူင်တႅၵ်ႇ ပဵၼ်လၢႆၵမ်းၾၢႆႇတၢင်းမၢၼ်ႈႁွင်း ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ။

ၵူၼ်းပိုၼ်ႉတီႈမူႇၸေႊ ၵေႃႉၼိုင်ႈ လၢတ်ႈဝႃႈ – “ပဵၼ်သဵင်မၢၵ်ႇလူင်ၶႃႈဢေႃႈ တႅၵ်ႇပဵၼ်လၢႆၵမ်းၶႃႈ။ သဵင်ၵွင်ႈဢွၼ်ႇတႄႉ ဢမ်ႇလႆႈငိၼ်းၵႃႈႁိုဝ်ၶႃႈ။ ယၢမ်းလဵဝ်တႄႉ ယဵၼ်ၵႂႃႇၶႃႈယဝ်ႉ။ လႅပ်ႈပဵၼ်ၾၢႆႇလဵဝ် ယိုဝ်းၵူၺ်းၶႃႈ ဢၼ်ႁဝ်းၶႃႈထွမ်ႇတႄႉ”- ဝႃႈၼႆ။

ထႅင်ႈၾၢႆႇၼိုင်ႈၵေႃႈ တၢင်းသၢႆၼမ်ႉဢုမ်၊ မေႃႈတွင်း၊ မၢၼ်ႈႁွင်းၼႆႉမီးၾၢႆႇ သဵၼ်ႈတၢင်းလူင် မူႇ ၸေႊ – လႃႈသဵဝ်ႈ  ။

 ဢွင်ႈတီႈၸိူဝ်းၼႆႉ ၸုမ်းယိပ်းၵွင်ႈၵၢင်ႇ ယူႇသဝ်းတူင်ႉၼိုင်ဝႆႉ မိူၼ်ၼင်ႇ တပ်ႉသိုၵ်းKIO ၊ သိုၵ်း TNLA ၸုမ်း ဢူၺ်းလီပွတ်းႁွင်ႇ ၸိူဝ်းၼႆႉ  ။ ၼွၵ်ႈလိူဝ်ၼၼ်ႉ ဢွင်ႈတီႈၸိူဝ်းၼႆႉ ၸုမ်းဢူၺ်းလီ ပွတ်းႁွင်ႇ တင်းသိုၵ်းမၢၼ်ႈၵေႃႈ ၵႆႉပဵၼ်ပၢင်တိုၵ်းၵၼ်တႃႇသေႇ။

ၵွပ်ႈၼႆ ၼႂ်ၼႆႉပဵၼ်ၾၢႆႇလႂ်ယိုဝ်းတေႃႇၸုမ်းလႂ်ၼႆ  ၽူႈတွႆႇႁွၵ်ႈတိုၵ်ႉၸွပ်ႇထၢမ်တူၺ်းယူႇ။

ၼႂ်းႁၢင်လိူၼ်ၾႅပ်ႊၿိဝ်ႊရီႊ 2021 ၼႆႉမႃး သိုၵ်းမၢၼ်ႈ ၶိုၼ်းတိုၵ်း ၸုမ်းသိုၵ်းၶၢင် KIA မႃးႁၢဝ်ႈႁႅင်း လၢႆဝၼ်းထပ်းၵၼ် တီႈႁိမ်းဝၢၼ်ႈတီးမႃႉ မၢၵ်ႇလူင်တူၵ်းသႂ်ႇ ႁိူၼ်းၵူၼ်းဝၢၼ်ႈ လႆႈမၢတ်ႇၸဵပ်း လူႉတၢႆ ၸွမ်းၵေႃႉၼိုင်ႈ ၼႆယဝ်ႉ။