တီႈၸႄႈဝဵင်းတူၼ်ႈတီး မီးပၢင်ၼႄၵၢင်ၸႂ် သွင်ပၢင် ပၢင်ၼိုင်ႈသၢၼ်ၶတ်းသိုၵ်းမၢၼ်ႈ ပၢင်ၼိုင်ႈသမ်ႉ ၵမ်ႉထႅမ်သိုၵ်းမၢၼ်ႈ ဝႃႈၼႆ။

မိူဝ်ႈၼႆႉ ဝၼ်းတီႈ 25/2/2021 ယၢမ်းဝၢႆးဝၼ်း 2 မူင်း ၸုမ်းၸိူဝ်းၵမ်ႉထႅမ်သိုၵ်းမၢၼ်ႈၼၼ်ႉ  ၶွၼ်ႈတုမ်ၵူၼ်းၵၼ်တီႈႁူင်း ႁဵၼ်းၸၼ်ႉသုင်မၢႆ 3 သေ ပႆတၢင်းထိုင်တီႈႁူင်းႁဵၼ်းၸၼ်ႉ သုင်မၢႆ 2 ၼႃႈလုမ်းသၽႃးၸႄႈမိူင်းတႆး  ၸႄႈဝဵင်းတူၼ်ႈတီး ၸိုင်ႈတႆးပွတ်း ၸၢၼ်း ။

ၽူႈသိုဝ်ႇၶၢဝ်ႇ ၽူႈတွႆႇႁွၵ်ႈ လၢႆးငၢၼ်းလၢတ်ႈၼႄဝႃႈ – “မိူဝ်ႈၼႆႉ တီႈတူၼ်ႈတီး မီးပၢင်ၼႄၵၢင်ၸႂ် 2 ပၢင်။ ပၢင်ဢၼ်သၢၼ် ၶတ်းသိုၵ်းမၢၼ်ႈၼၼ်ႉ ဢွၼ်ၵၼ်ၸုၵ်းၸွမ်းၶၢင်ႈတၢင်းသေ တွႆႇမေႃႈတွႆႇဝၢၼ်ႇ ၸူးၵူၼ်းၵမ်ႉထႅမ်သိုၵ်းမၢၼ်ႈ ဢၼ်ပႆ တၢင်းမႃးၼၼ်ႉ သဵင်ပေႃးပၼ်းလူင်ဝႆႉၶႃႈ။ၵူၼ်းၸုၵ်းၶၢင်ႈတၢင်း မၢင်ၵေႃႉ ဢဝ်ငိုၼ်း  ဝႂ်ႁဵင် 5 ဝႂ်၊ မၢင်ၵေႃႉဢဝ်ဝႂ် မိုၼ်ႇ 3-4 ဝႂ် ယုၵ်ႉတေႃႇၵူၼ်းၸိူဝ်းပႆတၢင်းမႃး ၸိူဝ်းၵမ်ႉထႅမ်သိုၵ်းမၢၼ်ႈၸိူဝ်းၼၼ်ႉ၊ ၶႂ်ႈမၢႆထိုင်ဝႃႈ သူႁပ်ႉငိုၼ်း ၵႃႈၸၢင်ႈမႃး ၼႆၼၼ်ႉၶႃႈယူဝ်ႉ”- ဝႃႈၼႆ။

ပၢင်ၼႄၵၢင်ၸႂ်ထႅင်ႈပၢင်ၼိုင်ႈသမ်ႉ မိူဝ်ႈၼႆႉၶၢဝ်းယၢမ်းၵၢင်ၼႂ် ၸုမ်းဢၼ်သၢၼ်ၶတ်းသိုၵ်းမၢၼ်ႈယိုတ်းဢႃႇၼႃႇ   ႁူမ်ႈၵၼ် ပႆတၢင်းၼႄၵၢင်ၸႂ်ၵၢင်ဝဵင်း၊ ၵမ်ႈၽွင်ႈသမ်ႉၵႂႃႇတီႈ ၼႃႈလုမ်းၽွင်းလူင်ၾၢႆႇမိူင်ၾၢႆ၊ မိူဝ်ႈဝႃးသမ်ႉ ပဵၼ်တီႈၼႃႈ လုမ်းၽွင်းလူင် ၾၢႆႇၾႆးၾႃႉ တုၵ်းယွၼ်း ယႃႇႁႂ်ႈၽူႈႁၢပ်ႇၵၢၼ် လူင်ပွင်ၸိုင်ႈ ၶဝ်ႈႁဵတ်းၵၢၼ်  ။ လိူဝ်ၼၼ်ႉ တႃႇမၢႆတွင်းဝၼ်းလိူၼ်သၢမ်မူၼ်း ဝၼ်းသၼၢပ်ႈၶႃးမၢၼ်ႈ ၼႆသေ မိူဝ်ႈၼႆႉၵၢင်ၼႂ်ၼင်ႇၵဝ်ႇ ၵူၼ်းၼႄၵၢင်ၸႂ်သၢၼ်ၶတ်းသိုၵ်းမၢၼ်ႈ ၽွမ်ႉၵၼ်ၵၼ်တႃးမုၼ်ႈသၼၢပ်ႈၶႃး ၸဵမ်ယိင်းၸဵမ်ၸၢႆး။

“ ယိူင်းဢၢၼ်းတႃႇၽွမ်ႉၵၼ်ႁူမ်ႈၵၼ်သေတိုၵ်းလိုပ်ႈၸဝ်ႈဢႃႇၼႃႇသိုၵ်းမၢၼ်ႈ တေႃႇပေႃးဢွင်ႇပေႉ ”- ၵူၼ်းသူၺ်းသၼၢပ်ႈၶႃးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ။

ပၢင်ၼႄၵၢင်ၸႂ် သၢၼ်ၶတ်းသိုၵ်းမၢၼ်ႈတီႈတူၼ်ႈတီးၼႆႉ ၸတ်းႁဵတ်းမႃး မီးၶၢဝ်းတၢင်း 19 ဝၼ်းယဝ်ႉ။ ဢမ်ႇယင်ႉဢမ်ႇ လိုဝ်ႈ ။ ယၢမ်းဝၢႆးဝၼ်းမိူဝ်ႈၼႆႉသမ်ႉ ၽူႈယိင်းလဵၵ်ႉယႂ်ႇၼုမ်ႇထဝ်ႈ ႁူမ်ႈၵၼ်မွၵ်ႈ 100 သူတ်ႇမူၼ်းလွတ်ႈပရိၵ်ႈလူင် ၵၢင်ဝဵင်းတူၼ်ႈတီး ယိူင်းဢၢၼ်းႁႂ်ႈဝၢၼ်ႈမိူင်းလႆႈၵတ်းယဵၼ် ၼႄၵၢင်ၸႂ်သၢၼ်ၶတ်းသိုၵ်းယိုတ်းဢႃႇၼႃႇဝၢၼ်ႈမိူင်း ။