ယၢမ်းတဵင်ႈၶိုၼ်း ၶမ်ႈဝႃးၼႆႉ သိုၵ်းမၢၼ်ႈ တင်း ပလိၵ်ႈမၢၼ်ႈ ၶဝ်ႈၵူတ်ႇထတ်း ဢွင်ႈတီႈၵူၼ်းသိုဝ်ႉၶၢႆသႅင်ၶဵဝ် ၼႂ်းဝဵင်းၽႃၵၢၼ်ႉ ဝႃႈၼႆ။
မိူဝ်ႈဝႃး ဝၼ်းတီႈ 18/2/2021 ယၢမ်းၵၢင်ၶိုၼ်း 11 မူင်း သိုၵ်းမၢၼ်ႈတင်း ပလိၵ်ႈမၢၼ်ႈ ၶီႇရူတ်ႉၵႃး 4 လမ်း သေ ၶဝ်ႈၵႂႃႇၵူတ်ႇထတ်း တီႈၵူၼ်းသိုဝ်ႉၶၢႆသႅင်ၶဵဝ် ဝၢၼ်ႈသိူၵ်ႈမူႇ(သဵၵ်ႉမူး) ပွၵ်ႉၵွင်းတႆး (ပွၵ်ႉသျၢၼ်းၵူင်း) ၸႄႈဝဵင်းၽႃၵၢၼ်ႉ ၸႄႈမိူင်းၶၢင် ၼႆယဝ်ႉ။
ၵူၼ်းသိုဝ်ႉၶၢႆသႅင် ၵေႃႉၼိုင်ႈ လၢတ်ႈဝႃႈ – “ၶဝ်ဝႃႈ သွၵ်ႈႁႃၵူၼ်းၼႆဝႃႇ။ ၶၢဝ်းယၢမ်းၶဝ်မႃး သွၵ်ႈၵူတ်ႇထတ်းႁႃၵူၼ်းၸိူင်ႉၼႆႉ ဢမ်ႇမႅၼ်ႈၶၢဝ်းမၼ်းၶႃႈ လိုၵ်းပေႃးတၢၼ်ႇၼႆႉ။ ၵူၺ်းၵႃႈ ဢမ်ႇတီႉၺွပ်း ၽႂ်ၵႂႃႇသေၵေႃႉၶႃႈ”- ဝႃႈၼႆ။
တီႈဝဵင်းၽႃၵၢၼ်ႉၼႆႉ ၶႃႈႁၢပ်ႇၵၢၼ်ၶုၼ် ၵမ်ႈၽွင်ႈ လႄႈ ၵူၼ်းမိူင်း လၢႆလၢႆၸၢဝ်းၶိူဝ်း၊ လၢႆလၢႆသႅၼ်း ႁူဝ်ၵူၼ်း မွၵ်ႈ 3 မိုၼ်ႇ ဢွၵ်ႇၼႄၵၢင်ၸႂ် သၢၼ်ၶတ်း တပ်ႉမတေႃႇသိုၵ်းမၢၼ်ႈ ယိုတ်းဢဝ်ဢႃႇၼႃႇ ၸိုင်ႈမိူင်း ဢၼ်ၵူၼ်းမိူင်း တွတ်ႈၶႅပ်းၵၢင်ၸႂ်လိူၵ်ႈတင်ႈ။
