ဝဵင်းယႂ်ႇဝဵင်းလူင် ၼႂ်းမိူင်းတႆး ၵူႈၸႄႈဝဵင်း ဢွၵ်ႇၼႄၵၢင်ၸႂ်သၢၼ်ၶတ်း တေႃႇသိုၵ်းမၢၼ်ႈယိုတ်းဢႃႇၼႃႇဝၢၼ်ႈမိူင်း ၊ ဢဵၼ်ႁႅင်းၵူၼ်း ၶဝ်ႈႁူမ်ႈၼမ်လိူဝ် ဝၼ်းၵဝ်ႇ ပႃးတင်းႁွင်ႈၵၢၼ်တႂ်ႈၶႃႈႁၢပ်ႇၵၢၼ်ၶုၼ်ၵေႃႈၶဝ်ႈႁူမ်ႈ။
မိူဝ်ႈၼႆႉ ဝၼ်းတီႈ 9/2/2021 ယၢမ်းၵၢင်ၼႂ် ၸႄႈဝဵင်း တႃႈ ၶီႈလဵၵ်း ၵဵင်းတုင် တူၼ်ႈတီး လၢင်းၶိူဝ်း မိူင်းပၼ်ႇ မိူင်းၼၢႆး လႃႈသဵဝ်ႈ ၵျွၵ်ႉမႄး မိူင်းယႆ မူႇၸေႊ ၵုၼ်ႁဵင် ၼမ်ႉၶမ်း ၸိူဝ်းၼႆႉ ၵူၼ်းမိူင်းပိုၼ်ႉတီႈ ဢွၵ်ႇၼႄၵၢင်ၸႂ် ႁၢဝ်ႈႁၢဝ်ႈႁႅင်းႁႅင်း တေႃႇတပ်ႉသိုၵ်းမၢၼ်ႈယိုတ်းဢႃႇၼႃႇ ။
ၵူၼ်း တႃႈၶီႈလဵၵ်း လၢတ်ႈဝႃႈ – “မိူဝ်ႈၼႆႉ ယၢမ်းၵၢင်ၼႂ်ၵူၼ်းတႃႈၶီႈလဵၵ်းဢွၵ်ႇၼႄၵၢင်ၸႂ်ၼိူဝ်တၢင်း ၸဵမ် ၸဝ်ႉယဝ်ႉၶႃႈ။ မိူဝ်ႈၼႆႉ ၶႂ်ႈဝႃႈ ဢဵၼ်ႁႅင်း ၵူၼ်းၼမ်လိူဝ်မိူဝ်ႈဝႃးၵွၼ်ႇ။ လွင်ႈႁၢမ်းၵူၼ်းၶွၼ်ႈတုမ်ၵၼ် ၸိူဝ်းၼၼ်ႉတႄႉ ၵူၼ်းမိူင်း ဢမ်ႇသူၼ်ၸႂ်ၶႃႈယဝ်ႉ ၼႄၵၼ်ၵႂႃႇၸိူင်ႉၼၼ်ၶႃႈယဝ်ႉ” – ဝႃႈၼႆ။
ၵူၼ်းဝဵင်းတႃႈၶီႈလဵၵ်းၼႆႉ လႆႈဢွၵ်ႇၼႄၵၢင်ၸႂ်သၢၼ်ၶတ်းသိုၵ်းယိုတ်းဢႃႇၼႃႇ တင်ႈတႄႇဝၼ်းတိတ်ႉၼႆႉမႃးတေႃႇထိုင်ဝၼ်းမိူဝ်ႈၼႆႉ ဢွၵ်ႇၼႄၵၢင်ၸႂ်ၵူႈဝၼ်း။ မိူဝ်ႈဝႃးႁူဝ်ၵူၼ်းမီးႁဵင်ပၢႆ။ မိူဝ်ႈၼႆႉလႅပ်ႈဢမ်ႇယွမ်း သၢမ်ႁဵင် ၼၢင်းယိင်း ဢႃယုမွၵ်ႈ 40 ၵူၼ်းၶၢႆၶူဝ်းၵိုၵ်းႁိူၼ်း ယူႇၵၢင်ဝဵင်းတႃႈၶီႈလဵၵ်းလၢတ်ႈၼေၼင်ႇၼႆ။
မၼ်းၼၢင်းလၢတ်ႈဝႃႈ -“ပီၵၢႆသမ်ႉပဵၼ်ၶူဝ်ႊဝိတ်ႉ 19 မႃးၵဝ်း။ ပီၼႆႉသမ်ႉ သိုၵ်းမႃးယိုတ်းဢႃႇၼႃႇႁေ။ႁဝ်းၶႃႈဢမ်ႇၽွမ်ႉလႆႈၶႃႈ ၽွင်းဝၢၼ်ႈမိူင်းလူဝ်ႇၶိုၼ်ႈယႂ်ၶိုတ်းၵၢပ်ႈ ၶဝ်သမ်ႉတေမႃးပိၵ်ႉႁူပိၵ်ႉတႃ ပိၵ်ႉဢွၵ်းဢေႃႁဝ်းၶႃႈၼႆႉ။ ႁဝ်းၶႃႈယၢမ်ႈယူႇတႂ်ႈမိုဝ်းသိုၵ်းမၢၼ်ႈမႃးတင်းၸူဝ်ႈတင်းၸၢတ်ႈယဝ်ႉ ဢိမ်ႇၼႃႇယဝ်ႉ ဢမ်ႇဢဝ်ယဝ်ႉ ”- ဝႃႈၼႆ။
ၵူၼ်းမိူင်း ၼႄၵၢင်ၸႂ်သၢၼ်ၶတ်းသိုၵ်းယိုတ်းဢႃႇၼႃႇမႃးႁၢဝ်ႈႁႅင်းၼႂ်းၶၢဝ်းတၢင်းသၢမ်သီႇဝၼ်းၼႆႉလႄႈ ဝၼ်းတီႈ 8/2/2021 မိူဝ်ႈၶမ်ႈဝႃး သိုၵ်းယိုတ်းဢႃႇၼႃႇ ပိုၼ်ၽၢဝ်ႇမၢႆမီႈၸူး ဝဵင်းယႂ်ႇဝဵင်းလူင်လၢႆလၢႆဝဵင်း တေဢမ်ႇလႆႈၶွၼ်ႈၵၼ် 5 ၵေႃႉၶိုၼ်ႈၼိူဝ်၊ ၵၢင်ၶမ်ႈ 8 မူင်းထိုင်ၵၢင်ၼႂ် 4 မူင်း တေဢမ်ႇလႆႈဢွၵ်ႇႁိူၼ်း ၸဵမ်ၸိူဝ်းၼႆႉ ။
ၼႂ်းၼၼ်ႉမိူင်းတႆးပႃးၸႄႈဝဵင်းတူၼ်ႈတီး၊ လႃႈသဵဝ်ႈ၊ တႃႈၶီႈလဵၵ်းလႄႈ မူႇၸေႊလႄႈတင်ႈဢဝ် 8 မူင်းၵႂႃႇၵူၼ်းဢမ်ႇႁတ်းဢွၵ်ႇႁိူၼ်း၊ ဝဵင်းပေႃးယဵၼ်သီႇသီႇ။
ၽူႈယိင်းဢႃယုမွၵ်ႈ 30 ပီ ၵူၼ်းလႃႈသဵဝ်ႈ လၢတ်ႈဝႃႈ – “ ၶမ်ႈဝႃးမီးလိၵ်ႈပိုၼ်ၽၢဝ်ႇ ဢမ်ႇပၼ်ၶွၼ်ႈၵၼ်ၼႆသေတႃႉ မိူဝ်ႈၼႆႉၵူၼ်းၼႄၵၢင်ၸႂ်တႄႉဢမ်ႇယွမ်းၼင်ႇၵဝ်ႇၶႃႈ။ၵူၺ်းၵႃႈ ဢမ်ႇပႆတၢင်းပဵၼ်မူႇ ။ ၼင်ႈသွင်ၾၢၵ်ႇ ၶၢင်ႈတၢင်းသေ ယုၵ်ႉပၢႆႉ ၼႄၵၢင်ၸႂ်ၵတ်းၵတ်းယဵၼ်ယဵၼ်။ လႆႈႁၼ် ပီႈၼွင်ႉတဢၢင်း၊ ၶၢင်၊ ဝႃႉ ၶဝ်ၵေႃႈမႃးၶဝ်ႈႁူမ်ႈၸွမ်းဢေႃႈမိူဝ်ႈၼႆႉ”- ဝႃႈၼႆ။
ပွတ်းလႅၼ်လိၼ်ၶႄႇ ဝဵင်းမူႇၸေႊတႄႉ ယၢမ်းၵၢင်ၼႂ်ၽွင်းတႄႇၼႄၵၢင်ၸႂ်ၼၼ်ႉ လႆႈၾၢင်ႉတူၺ်းငဝ်းလၢႆးသေ ၶဝ်ႈႁႃၵၼ်လွႆးလွႆး လႆႈႁူႉၼင်ႇၼႆ။
“ၵွၼ်ႇႁဝ်းၶႃႈ ပႆႇပႆတၢင်းၼၼ်ႉ ႁဝ်းၶႃႈ မႃးၶွၼ်ႈတုမ်ၵၼ်သေ ယူႇဝႆႉလၢႆလၢႆၸုမ်း- ၸုမ်း 2-3 ၵေႃႉ။ ၵူၼ်းမိူင်းၼႄၵၢင်ၸႂ် တႄႇပႆ တီႈမင်ႇၵလႃႇမူႇၸေႊ ၶိုၼ်ႈမႃး တၢင်း ၽူၺ်းႁုင်း – တေႃႇယွတ်ႈ – ပွၵ်ႉႁွင်ႇလႄႈ ဢွၼ်ၵၼ်ၶဝ်ႈဝဵင်းၶႃႈ။ ၼႂ်းဝဵင်းတႄႉ ပလိၵ်ႈၶဝ် ဢမ်ႇပၼ်ႁဝ်းၶႃႈ ပႆသိုဝ်ႈၸွမ်းသဵၼ်ႈတၢင်းလူင်။ ၶဝ်ပိၵ်ႉတၢင်းဝႆႉလႄႈႁဝ်းၶႃႈလႆႈ ပႆၶဝ်ႈၵိဝ်ႇလဵပ်ႈၵႂႃႇတၢင်းၼႂ်းဝၢၼ်ႈဢဝ်ဢေႃႈ ။ ၵူၼ်းၼမ်တႄႉတႄႉၶႃႈမိူဝ်ႈၼႆႉတႄႉတႃႇတေဢွင်ႇပေႉၸုမ်းသိုၵ်းယိုတ်းဢႃႇၼႃႇၶႃႈဢေႃႈ”- ၽူႈၸၢႆးဢႃယုမွၵ်ႈ 30 ပၢႆ ၵူၼ်းမူႇၸေႊ လၢတ်ႈၼႄၼင်ႇ ၼႆ။
ဝဵင်းယႂ်ႇဝဵင်းလူင်မိူၼ်ၼင်ႇ မူႇၸေႊ ၊ တူၼ်ႈတီး၊ တႃႈၶီႈလဵၵ်းၸိူဝ်းၼႆႉတႄႉ တႄႇပၢင်ၶႂမ်ႈသပိတ်ႈလႆႈမႃး 2-3 ဝၼ်းယဝ်ႉသေတႃႉ ၵူၼ်းဝဵင်းဢွၼ်ႇၼႂ်းၸိုင်ႈတႆးလၢႆလၢႆဝဵင်းမိူၼ်ၼင်ႇ မိူင်းၼၢႆး ၊လၢင်းၶိူဝ်း၊မိူင်းပၼ်ႇ၊ မိူင်းတူၼ်ၸိူဝ်းၼႆႉ တိုၵ်ႉတႄႇပၢင်ၼႄၵၢင်ၸႂ်မိူဝ်ႈၼႆႉ 9/2/2021။
“တီႈလၢင်းၶိူဝ်းႁဝ်းၶႃႈတႄႉ ဢၼ်ဢွၵ်ႇၼႄၵၢင်ၸႂ် မိူဝ်ႈၼႆႉ ပဵၼ်ၵူၼ်းမိူင်းၵူၼ်းပိုၼ်ႉတီႈၵမ်းၼမ် ႁွင်ႈၵၢၼ်လူင်ပွင်ၸိုင်ႈတႄႉ ဢမ်ႇ ႁၼ်မႃးၶဝ်ႈႁူမ်ႈၸွမ်းၶႃႈ။ မိူဝ်ႈၼႆႉ ႁဝ်းၶႃႈဢွၵ်ႇၼႄဝႆႉၵႃႈၼႆႉသေ မိူဝ်ႈၽုၵ်ႈ မိူဝ်ႈႁိုဝ်းတေသိုပ်ႇၼႄၵၢင်ၸႂ်ၵႂႃႇထႅင်ႈၶႃႈ။ ႁဝ်းၶႃႈဢမ်ႇၶႂ်ႈႁႂ်ႈလုၵ်ႈလၢင်းႁဝ်းလႆႈယူႇၼႂ်းလပ်းသိင်ႇ မိူၼ်မိူဝ်ႈပၢၼ်ႁဝ်းၶႃႈၵေႃႈလဵၵ်ႉၼၼ်ႉဢေႃႈ။ လႆႈယူႇၼႂ်းပၢၼ်ဢၼ်လႆႈၵူဝ်ႁႄလူင်ၼၼ်ႉမႃးတင်းၸူဝ်ႈတင်းၸၢတ်ႈယဝ်ႉ ၶႂ်ႈႁႂ်ႈလုၵ်ႈလၢင်းႁဝ်း လႆႈႁဵၼ်းလီလီပိုတ်ႇႁူပိုတ်ႇတႃ”- ၽူႈ ၶဝ်ႈႁူမ်ႈၼႄၵၢင်ၸႂ် တီႈလၢင်းၶိူဝ်းၵေႃႉၼိုင်ႈ လၢတ်ႈၼႄၼင်ႇၼႆ။
တီႈၸႄႈဝဵင်းမိူင်ပၼ်ႇၵေႃႈ မိူဝ်ႈၼႆႉ ယၢမ်းၵၢင်ၼႂ် 9 မူင်း ၶွၼ်ႈတုမ်ၵၼ်တီႈဝတ်ႉမူၺ်ႇတေႃႇသေ ပႆ ၸဵမ်ၵူၼ်းမိူင်း၊ ၵူၼ်း ၼုမ်ႇ၊ မေႃသွၼ်၊ မေႃယႃလႄႈ လုၵ်ႈဢွၼ်ႇႁဵၼ်း ၸိူဝ်းၼႆႉၶဝ်ႈႁူမ်ႈ ၵမ်ႈၼမ် ပဵၼ်ၼႂ်းႁွင်ႈၵၢၼ်လူင်ပွင်ၸိုင်ႈ ဝႃႈၼႆ။
