ၵၢၼ်တေႃႉသူင်ႇၶဝ်ႈဢွၵ်ႇ တီႈလႅၼ်လိၼ်တႆး – ၶႄႇ 105 လၵ်း ၸႄႈဝဵင်းမူႇၸေႊၼၼ်ႉ လႆႈပိၵ်ႉဢိုတ်းဝႆႉ  ယွၼ်ႉ ၵၢၼ်တူင်ႉၼိုင် ၵူၼ်းမိူင်းသၢၼ်ၶတ်းၼႄၵၢင်ၸႂ် တေႃႇၸုမ်းသိုၵ်းယိုတ်းဢႃႇၼႃႇ။

မိူဝ်ႈၼႆႉ ဝၼ်းတီႈ 8/2/2021 ယၢမ်းၵၢင်ၼႂ် ၵူၼ်းမိူင်းမူႇၸေႊ ႁူဝ်ၵူၼ်းမွၵ်ႈ 2 သႅၼ်ၼႆႉ ႁူမ်ႈၵၼ်တူင်ႉၼိုင် ၼႄၵၢင်ၸႂ် သၢၼ်ၶတ်းတေႃႇသိုၵ်းမၢၼ်ႈ ယိုတ်းဢႃႇၼႃႇဝၢၼ်ႈမိူင်း ။

ၽူႈတူင်ႉၼိုင် ၼႂ်းတူင်ႇဝူင်းၵၢၼ်ၵႃႉၶၢႆ တီႈလႅၼ်လိၼ် 105 လၵ်း ၵေႃႉၼိုင်ႈ လၢတ်ႈဝႃႈ – “ၽူႈႁၢပ်ႇၵၢၼ်ၾၢႆႇၵုမ်း ၶူဝ်းၵုၼ်ႇၶဝ်ႈ ဢွၵ်ႇ ၾၢႆႇဢေႊၵျႅၼ်ႊၶဝ် မိူဝ်ႈၼႆႉ ၵႂႃႇၼႄၵၢင်ၸႂ်ၵၼ်မူတ်းၶႃႈယဝ်ႉ။ လိူဝ်ၼၼ်ႉ ၽူႈႁၢပ်ႇၵၢၼ်ၼႂ်းႁွင်ႈၵၢၼ် ၾၢႆႇၵဵပ်း ၶွၼ်ႇၶဝ်ၵေႃႈၵႂႃႇတူင်ႉၼိုင် သၢၼ်ၶတ်း မိူၼ်ဝႃႈ ပိၵ်ႉဢိုတ်းပႅတ်ႈၵၢၼ်တေႃႉသူင်ႇယဝ်ႉ။ ယၢမ်းလဵဝ် လွင်ႈႁဵတ်းဝႂ်ၶူဝ်းၵုၼ်ႇ ၶဝ်ႈဢွၵ်ႇၵႂႃႇမႃးၼၼ်ႉၵေႃႈ ဢမ်ႇမီးၽႂ်ႁဵတ်းယဝ်ႉ”- ဝႃႈၼႆ။

တွၼ်ႈတႃႇတေၵူၼ်ႇပင်းလႆႈ ၸဝ်ႈဢႃႇၼႃႇသိုၵ်း ၼၼ်ႉ ၵူၼ်းမိူင်းမူႇၸေႊ၊ ၽူႈႁၢပ်ႇၵၢၼ်လူင်ပွင်ၸိုင်ႈ၊ လုၵ်ႈႁဵၼ်း၊ ၶူးသွၼ်၊ မေႃယႃလႄႈ ၸုမ်းတူင်ႉၼိုင်တူင်ႇဝူင်းၵူၼ်း ၼႂ်းၸႄႈတွၼ်ႈမူႇၸေႊ ၸိူဝ်းၼႆႉ ဢွၵ်ႇၼႄၵၢင်ၸႂ် သၢၼ်ၶတ်း  ႁူမ်ႈၵၼ်မူတ်း။

ဢိင်ၼိူဝ် လွင်ႈသၢၼ်ၶတ်းသိုၵ်းယိုတ်းဢမ်းၼၢတ်ႈၼႆႉသေ ယူႇတီႈၽူႈႁၢပ်ႇၵၢၼ်လူင်ပွင်ၸိုင်ႈ တူင်ႉၼိုင်သၢၼ်ၶတ်း ၵၼ်မႃးသေ ပႃးၸဵမ်ႁွင်ႈၵၢၼ်လူင်ပွင်ၸိုင်ႈ၊ လုမ်းလူင်ပွင်ၸိုင်ႈလႄႈ ႁူင်းၵၢၼ် ၸိူဝ်းၼႆႉ ဢွၼ်ၵၼ် ၼႄၵၢင်ၸႂ်လူၺ်ႈဢမ်ႇလူင်းႁဵတ်းၵၢၼ်  မိူၼ်ၼင်ႇ ၶူင်းၵၢၼ် CDM Civil Disobedience Movement , Red Ribbon Campaign ၸိူဝ်းၼႆႉ။