ၵူၼ်းမိူင်းမူႇၸေႊ ၸမ် 2 သႅၼ် ၽွမ်ႉၵၼ်ၼႄၵၢင်ၸႂ် သၢၼ်ၶတ်းသိုၵ်းမၢၼ်ႈယိုတ်းဢမ်းၼၢတ်ႈ ၽူႈမီးပုၼ်ႈၽွၼ်းတၢင်းၾင်ႇမိူင်း ၶႄႇ တူၵ်းၸႂ်ၼႅတ်ႈသူင်ႇ ၸူမ်းႁူမ်ႇလူမ်ႈဢဝ်တီႈယူႇၸွမ်းလႅၼ်လိၼ်ၼႅၼ်ႈၼႃ။
မိူဝ်ႈၼႆႉ ဝၼ်းတီႈ 8/2/2021 ယၢမ်းၵၢင်ၼႂ် 8 မူင်း ၽူႈမီးပုၼ်ႈၽွၼ်းတၢင်းၾင်ႇမိူင်း ၶႄႇ တိူဝ်းႁႅင်းၵူၼ်း ဢဝ်ႁူမ်ႇလူမ်ႈ တီႈၽၵ်းတူလႅၼ်လိၼ်မိူၼ်ၼင်ႇ ၽၵ်းတူမၢၼ်ႈဝဵင်း၊ ၽၵ်းတူ ႁေႃ ၶမ်း(ရွေနန်းတော်) ၸိူဝ်းၼႆႉသေဢမ်ႇၵႃး ပွႆႇၻရူၼ်ႊ မိၼ်ထၢႆႇ ၶဝ်ႈမႃးတၢင်း မူႇၸေႊထႅင်ႈ 2-3 လမ်း လူးၵွၼ်ႇဝႃႈၼႆ။
“တၢင်းၾင်ႇမိူင်းၶႄႇ ပွႆႇၻရူၼ်ႊမႃးမိၼ်တူၺ်း ၼႂ်းပၢင်ၼႄၵၢင်ၸႂ် တေမီး 2-3 လမ်းၼႆႉၶႃႈ။ ၸဝ်ႈၼႃႈတီႈတၢင်းမိူင်း ၶႄႇၵေႃႈမႃးပႂ်ႉဢဝ်ႁူမ်ႇလူမ်ႈ ၾင်ႇမိူင်းၶႄႇ၊ ၽၵ်းတူၶဝ်ႈဢွၵ်ႇတႄႉ ပိၵ်ႉဝႆႉၶႃႈဢေႃႈ။ မိူဝ်ႈၵူႈပွၵ်ႈ ၶဝ်ဢမ်ႇမီးႁူမ်ႇလူမ်ႈ မႃးပႂ်ႉၼႅၼ်ႈၼႃၸိူင်ႉၼႆၶႃႈ။ ၶဝ်ႁူႉဝႃႈ တၢင်းမူႇၸေႊႁဝ်းၶႃႈ ၼႄၵၢင်ၸႂ် ၼႆၵေႃႈ ၶဝ်မႃးပႂ်ႉဢဝ်ႁူမ်ႇလူမ်ႈ ၶႃႈဢေႃႈ၊ တၢင်ႇဝၼ်းပူၼ်ႉမႃးၼၼ်ႉ ဢမ်ႇႁၼ် ၶဝ်မႃးပႂ်ႉၶႃႈ”- ၽူႈၶဝ်ႈႁူမ်ႈၼႄၵၢင်ၸႂ် တီႈမူႇၸေႊ ၵေႃႉၼိုင်ႈ လၢတ်ႈ ၼႄၼင်ႇၼႆ။
ပၢင်ၼႄၵၢင်ၸႂ်သၢၼ်ၶတ်း တီႈမူႇၸေႊၼႆႉ တႄႇ ၶွၼ်ႈတုမ်ၵၼ် တီႈပၢင်ႇႁိူဝ်း မိၼ်သေ ဢွၼ်ၵၼ်ပႆမႃးတီႈၽၵ်းတူ မၢၼ်ႈဝဵင်း လႅၼ်လိၼ်တႆး – ၶႄႇ သေပၼ်ႇလဵပ်ႈမႃးၶိုၼ်းတၢင်းပၢင်ႇႁိူဝ်းမိၼ်ၶိုၼ်း။ ဢဵၼ်ႁႅင်းၵူၼ်းမိူင်းမူႇၸႄႈၼႄၵၢင်ၸႂ် ၸမ် 2 သႅၼ်ၵေႃႉ ၼႆႉ လႆႈႁူႉၼင်ႇၼႆ။
