ၵူၼ်းမိူင်းလၢင်းၶိူဝ်း  တွႆႇဝၢၼ်ႇတွႆႇမေႃႈၼႄၵၢင်ၸႂ်သၢၼ်ၶတ်းသိုၵ်းယိုတ်းဢႃႇၼႃႇ ၵူၼ်းလူင်ဝၢၼ်ႈ ၺႃးၽူႈၵွၼ်းၸႄႈဝဵင်းလၢင်းၶိူဝ်းႁွင်ႉၵႂႃႇထဵတ်ႈထၢမ်။             

ဝၼ်းတီႈ 5/2/2021 ယၢမ်းၵၢင်ၶမ်ႈ  8 မူင်း ၵူၼ်းမိူင်းၼႂ်းဝဵင်းလၢင်းၶိူဝ်း   ၽွမ်ႉၵၼ်တွႆႇပုင်းတွႆႇလဵၵ်းၼႄၵၢင်ၸႂ် သၢၼ်ၶတ်းသိုၵ်းယိုတ်းဢႃႇၼႃႇ ၊ ထိုင်ယၢမ်း 9 မူင်း ၽူႈၵွၼ်းၸႄႈဝဵင်းလၢင်းၶိူဝ်း ႁွင်ႉၽူႈၵွၼ်းပွၵ်ႉတႂ်ႈ ၵႂႃႇတွင်ႈထဵတ်ႈထၢမ်   တီႈလုမ်း ။

ၸုမ်းၵွၼ်းပွၵ်ႉဢိူင်ႇ ပွၵ်ႉတႂ်ႈ လၢတ်ႈဝႃႈ – “ၸဝ်ႈၸႄႈဝဵင်းၶဝ် ႁွင်ႉၽူႈၵွၼ်းပွၵ်ႉ ႁဝ်းၶႃႈပီႈၸၢႆးႁၢၼ်ႇ ၵႂႃႇထူပ်းသေထဵတ်ႈထၢမ်ဝႃႈ ၵူၼ်းၼႂ်းပွၵ်ႉဝၢၼ်ႈတႂ်ႈ ၽႂ်တွႆႇမေႃႈဝၢၼ်ႇ။ လွင်ႈၼႆႉ ၽူႈၵွၼ်းပွၵ်ႉႁဝ်းၶႃႈတွပ်ႇဝႃႈ  ဢမ်ႇႁူႉဝႃႈပဵၼ်ၽႂ်တွႆႇ။ ပေႃးၾၢႆႇၵွၼ်းၸႄႈဝဵင်းႁူႉၵေႃႈ ႁႂ်ႈၸီႉၸမ်ႈၼေၼႆလႄႈ ၽႂ်ၵေႃႈဢမ်ႇႁူႉဝႃႈပဵၼ်ၽႂ်တွႆႇ ။ တွင်ႈထၢမ်မွၵ်ႈ 15 မိၼိတ်ႉသေ ၶိုၼ်းပွႆႇၽူႈၵွၼ်းပွၵ်ႉႁဝ်းၶႃႈမႃးၶိုၼ်း ”- ဝႃႈၼႆ။

ၸူဝ်ႈၶၢဝ်း သိုၵ်းယိုတ်းဢႃႇၼႃႇဝၢၼ်ႈမိူင်းမႃးလႆႈၶၢဝ်းတၢင်း 7 ဝၼ်းၼႆႉ ၵူၼ်းဝၢၼ်ႈၵူၼ်းမိူင်းပတ်းပိုၼ်ႉမိူင်းႁူမ်ႈတုမ် ၽွမ်ႉၵၼ်တွႆႇမေႃႈတွႆႇဝၢၼ်ႇ ၵူႈၶမ်ႈၵူႈၶိုၼ်းၶၢဝ်းယၢမ်း 8 မူင်း၊ ၼႄၵၢင်ၸႂ်သၢၼ်ၶတ်းသိုၵ်းယိုတ်းဢႃႇၼႃႇဝၢၼ်ႈမိူင်း။ ၵဵဝ်ႇၵပ်းလွင်ႈၼႆႉ ဢမ်ႇမီးၽႂ်ႁၢမ်ႈယႃႇႁႂ်ႈတွႆႇ။ ၾၢႆႇၼိုင်ႈၼႂ်းမၢႆမီႈပလိၵ်ႈၵေႃႈမီးဝႆႉဝႃႈ ယွၼ်ႉပဵၼ်ၵၢၼ်တွႆႇ ၼႂ်းႁိူၼ်းၵူၺ်းလႄႈ ပလိၵ်ႈဢမ်ႇမီးသုၼ်ႇတီႉၺွပ်း- ဝႃႈၼႆဝႆႉ။  

ၵူၼ်းၼုမ်ႇလၢင်းၶိူဝ်း ပွၵ်ႉပၢင်ႁူင်းၵေႃႉၼိုင်ႈၵေႃႈ လၢတ်ႈဝႃႈ – “ ၼႂ်းၶၢဝ်းတၢင်း 3-4 ၶိုၼ်းမႃးၼႆႉ ပေႃးထိုင်ၶၢဝ်း ၵၢင်ၶမ်ႈမွၵ်ႈ 8 မူင်းဢွၼ်ၵၼ်တွႆႇမေႃႈဝၢၼ်ႇ တင်းဝဵင်းဢေႃႈ သဵင်ပေႃး ပၼ်းလူင်ဝႆႉၶႃႈယဝ်ႉ။ ၶႃႈထၢင်ႇတႄႉ ပေႃးဢဝ် ပိူင်မၼ်းဝႃႈတႄႉ ပေႃးႁဝ်းၶႃႈတွႆႇၼႂ်းႁိူၼ်းၼႂ်းယေးႁဝ်း ပေႃးဢမ်ႇဢွၵ်ႇ ၼိူဝ်သဵၼ်ႈတၢင်း မၼ်းတေဢမ်ႇမီးပိူင် ၺွပ်းၵၼ်လႆႈ ႁဝ်းၶႃႈ လဵပ်ႈႁဵၼ်းတူၺ်းယူႇၶႃႈပၵ်းပိူင်ပိူၼ်ႈ”- ဝႃႈၼႆ။

တႄႇဢဝ် ဝၼ်းတီႈ 1/2/2021 ပူၼ်ႉမႃးၼႆႉ သိုၵ်းမၢၼ်ႈ ၶဝ်ႈယိုတ်းဢမ်းၼၢတ်ႈ လူင်ပွင်ၸိုင်ႈ ဢၼ်ၵူၼ်းမိူင်းယုၵ်ႉတၢင်ႇ ဝႆႉၼၼ်ႉသေ ဝၢႆးၼၼ်ႉမႃး ၵူၼ်းမိူင်း ႁူမ်ႈတုမ် ၸဵမ်ၼႂ်းတိူင်းလႄႈ ၸႄႈမိူင်း ဢမ်ႇယွမ်းႁပ်ႉ၊ ဢမ်ႇႁၼ်လီ လွင်ႈသိုၵ်း မၢၼ်ႈယိုတ်းဢမ်းၼၢတ်ႈ။ ၵူၼ်းမိူင်းၵူႈၸႄႊဝဵင်း ၼႄၵၢင်ၸႂ်သၢၼ်ၶတ်း လူၺ်ႈလၢႆးၽႂ်မၼ်း မိူၼ်ၼင်ႇ ၽွမ်ႉၵၼ်တွႆႇမေႃႈဝၢၼ်ႇ  ၊ ၽွမ်ႉၵၼ်မိပ်ႇႁွၼ်းရူတ်ႉႁွၼ်းၵႃး ၊ ၽွမ်ႉၵၼ်ဢွၵ်ႇၼႄၵၢင်ၸႂ်ၵၢင်ဝဵင်း ၸဵမ်ၸိူဝ်းၼႆႉ။