ၵူၼ်းထႆး ႁိမ်း 100 ပႃး ၵူၼ်းမိူင်းမၢၼ်ႈ ၵမ်ႈၽွင်ႈ ၶွၼ်ႈႁႅင်းၵၼ် ၵႂႃႇၼႄၵၢင်ၸႂ် တီႈလုမ်းတၢင် မိူင်းမၢၼ်ႈ ဢၼ်ပၵ်းတီႈဝဵင်းၵဵင်းမႆႇ မိူင်းထႆးတွၼ်ႈၼိူဝ်။
မိူဝ်ႈၼႆႉ ဝၼ်းတီႈ 4/2/2021 ယၢမ်းၵၢင်ၶမ်ႈ 8 မူင်း ၵူၼ်းၼုမ်ႇထႆး၊ လုၵ်ႈႁဵၼ်းၸၼ်ႉၸွမ် ၊ ၶူးပူင်သွၼ် ၸၼ်ႉၸွမ်ၵဵင်းမႆႇ ႁူဝ်ၵူၼ်း ႁိမ်း 100 ႁူမ်ႈ တင်း ၵူၼ်းမိူင်းမၢၼ်ႈၵမ်ႈၽွင်ႈ ၵႂႃႇၼႄၵၢင်ၸႂ်သၢၼ်ၶတ်း လွင်ႈသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း၊ တီႈလုမ်းၽွင်း တၢင်မိူင်းမၢၼ်ႈ ဢၼ်ပၵ်းတီႈ ၵၢင်ဝဵင်းၵဵင်းမႆႇ ၊ ပလိၵ်ႈထႆး ၼပ်ႉႁူဝ်သိပ်း ဢဝ်ႁူမ်ႇလူမ်ႈ ၵူဝ်ဝၵ်ႉတိုဝ်းတၢင်း ၼႄၵၢင်ၸႂ်ၵွင်ႉၵၢႆ ၵၢၼ်မိူင်း မိူင်းထႆး ။
ၵူၼ်းထႆး ဢၼ်ၵႂႃႇၼႄၵၢင်ၸႂ် ၵေႃႉၼိုင်ႈ လၢတ်ႈဝႃႈ – “မိူဝ်ႈၼႆႉ ယၢမ်းၵၢင်ၶမ်ႈ 8 မူင်းၼႆႉ ႁဝ်းၶႃႈ ၵူၼ်းၼုမ်ႇ တေႁူမ်ႈၵၼ် တီႈၼႃႈလုမ်းၽွင်း တၢင်မိူင်းမၢၼ်ႈသေ တေတႆႈတဵၼ်း ပိုတ်ႇၾႆးၾူၼ်း တီႈၼႃႈ လုမ်းၽွင်းတၢင်မၢၼ်ႈ၊ ယဝ်ႉၵေႃႈ တေပိုၼ်ၽၢဝ်ႇ လွင်ႈႁဝ်းၶႃႈ ၵမ်ႉထႅမ်ၻီႊမူဝ်ႊၶရေႊသီႊလႄႈ သၢၼ်ၶတ်း လွင်ႈ သိုၵ်းယိုတ်းဢႃႇၼႃႇ ၸိုင်ႈမိူင်း”– ဝႃႈၼႆ။
လိူဝ်ၼၼ်ႉ တီႈလုမ်းၽွင်းတၢင်မၢၼ်ႈ ဢၼ်ပၵ်းဝႆႉတီႈ ၵုင်းထဵပ်ႈ/ မိူင်းၵွၵ်ႇၼၼ်ႉၵေႃႈ ၼႄၵၢင်ၸႂ်ၸိူင်ႉၼႆၼင်ႇၵဝ်ႇ။
မိူဝ်ႈဝၼ်းတီႈ 1/2/2021 ယၢမ်းၵၢင်ၼႂ်ၸဝ်ႉ သိုၵ်းမၢၼ်ႈ ယိုတ်းဢဝ် ဢႃႇၼႃႇၸိုင်ႈမိူင်း၊ ၵုမ်းၶင် ၸွမ်ၸိုင်ႈဢူးဝိၼ်းမိၼ်ႉ၊ ၽူႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းသူႉၵျီႇ ၵိုင်းႁိူၼ်း တီႈၶဝ်ႈယူႇ ဝႆႉ ႁၢၼ်ႉတေႃႇထိုင်ဝၼ်းမိူဝ်ႈၼႆႉ ယင်းပႆႇပွႆႇပၼ်ၶိုၼ်း။ လုမ်ႈၾႃႉၵေႃႈ တုၵ်းယွၼ်းႁႂ်ႈပွႆႇပၼ် ၽူႈၼမ်းၵူၼ်းမိူင်း ၽႂ်းၽႂ်း ။
