ၽူႈၵမ်ႉထႅမ်ပႃႇတီႇၼူၵ်ႉယုင်း ၼႄၵၢင်ၸႂ်သၢၼ်ၶတ်း လွင်ႈသိုၵ်းမၢၼ်ႈ ယိုတ်းဢႃႇၼႃႇလူင်ပွင်ၸိုင်ႈ တီႈၼႃႈလုမ်းၽွင်း တၢင်မၢၼ်ႈ ဢၼ်ပၵ်းဝႆႉ တီႈၼႂ်းမိူင်းထႆး ။
ဝၼ်းတီႈ 2/2/2021 ယၢမ်းဝၢႆး 4 မူင်းၶိုင်ႈ မိူင်းထႆး ၵူၼ်းမိူင်းႁူမ်ႈတုမ် ၸိူဝ်းႁွတ်ႈၽႅဝ် ၵဵင်းမႆႇၸိုင်ႈထႆး ၼႄၵၢင်ၸႂ်တီႈ ၼႃႈလုမ်းၽွင်းတၢင်မၢၼ်ႈ ဢၼ်ပၵ်းဝႆႉတီႈၼႂ်းဝဵင်းၵဵင်းမႆႇၸိုင်ႈထႆး ဢဵၼ်ႁႅင်း မွၵ်ႈ 50 ၵေႃႉသၢၼ်ၶတ်းလွင်ႈသိုၵ်းမၢၼ်ႈ ယိုတ်းဢႃႇၼႃႇ လူင်ပွင်ၸိုင်ႈၼၼ်ႉ ဝႃႈၼႆ။
ၵူဝ်ႇမဵဝ်း ၽူႈၶဝ်ႈႁူမ်ႈတူင်ႉၼိုင် လၢတ်ႈဝႃႈ – “ႁဝ်းၶႃႈ ၼႄၵၢင်ၸႂ် သၢၼ်ၶတ်းတီႈၼႃႈလုမ်းၽွင်းတၢင်မၢၼ်ႈ ၵဵင်းမႆႇၶႃႈ ဢေႃႈ။ ယိူင်းဢၢၼ်းႁဝ်းတႄႉ လွင်ႈသိုၵ်းမၢၼ်ႈသိမ်းဢႃႇၼႃႇၼၼ်ႉႁဝ်းၶႃႈ ဢမ်ႇယွမ်းႁပ်ႉ၊ ႁႂ်ႈပွႆႇတူဝ်ပၼ် ၼၢင်းဢွင်ႇသၢၼ်းၸူႉၵျီႇတင်း ၽူႈတႅၼ်းတင်းမူတ်း”- ဝႃႈၼႆ။
ဢိင်ၼိူဝ်ၵၢၼ်ၼႄၵၢင်ၸႂ်တီႈၼႃႈလုမ်းၽွင်းတၢင်မၢၼ်ႈတီႈ ၵဵင်းမႆႇၼၼ်ႉ လႆႈၸႂ်ႉၶၢဝ်းယၢမ်း တၢင်းႁိုင် 15 မိၼိတ်ႉသေ ၸတ်းႁဵတ်းၵႂႃႇ ယဝ်ႉတူဝ်ႈလီငၢမ်း ။
“ပလိၵ်ႈထႆးတုၵ်းယွၼ်းတီႈႁဝ်းၶႃႈဝႃႈ ႁႂ်ႈႁဝ်းၶႃႈ ယူႇၼႂ်းပၵ်းပိူင်မၢႆမီႈ ၸႂ်ႉၶၢဝ်းယၢမ်း 15 မိၼိတ်ႉ ႁႂ်ႈၵႅတ်ႇၶႄႁႄႉၵင်ႈ တၢင်းပဵၼ်ၶူဝ်ႊဝိတ်ႉ 19 ၵၼ်ပႃး။ ယဝ်ႉၵေႃႈ ယႃႇပေၶဝ်ႈၵႂႃႇၼႂ်းလုမ်းၽွင်းတၢင်မၢၼ်ႈၼၼ်ႉ” – ၵူဝ်ႇမဵဝ်း သိုပ်ႇလၢတ်ႈၼႄ ၼင်ႇၼႆ။
လိူဝ်ၼၼ်ႉ တီႈလုမ်းၽွင်းတၢင်းမၢၼ်ႈ ဢၼ်ပၵ်းဝႆႉ တီႈမိူင်းၵွၵ်ႇ/ ၵုင်းထဵပ်ႈ၊ လုမ်းၽွင်းတၢင်မၢၼ်ႈ တီႈမိူင်းၵျပၼ်ႊ မိူင်းဢေႃႊသတေႊလျႃႊ ၸိူဝ်းၼၼ်ႉၵေႃႈ ၵူၼ်းမိူင်းႁူမ်ႈတုမ် တင်းၼမ်လၢႆ ႁူမ်ႈၵၼ် ၵႂႃႇၼႄၵၢင်ၸႂ်သၢၼ်ၶတ်း လွင်ႈသိုၵ်းမၢၼ်ႈယိုတ်းဢႃႇၼႃႇလူင်ပွင်ၸိုင်ႈ၊ ႁႂ်ႈပွႆႇပၼ်တူဝ် ဢွင်ႇသၢၼ်းၸူႉၵျီႇၶိုၼ်းၽႂ်းၽႂ်း ၸဵမ်ၸိူဝ်းၼႆႉ။
ၼွၵ်ႈလိူဝ်ၼၼ်ႉ မိူၼ်ၼင်ႇ လူင်ပွင်ၸိုင်ႈၼွၵ်ႈမိူင်းမိူင်းဝၼ်းတူၵ်းၸိူဝ်းၼႆႉၵေႃႈ ဢီးသူၼ်းတုၵ်းယွၼ်း ႁႂ်ႈသိုၵ်းမၢၼ်ႈ ပွႆႇပၼ် လူင်ပွင် ၸိုင်ႈ ဢၼ်ၶဝ်ၵုမ်းထိင်းဝႆႉ ၸိူဝ်းၼၼ်ႉ ဝႃႈၼႆ။
