သိုၵ်းမၢၼ်ႈ ယိုတ်းဢႃႇၼႃႇ လူင်ပွင်ၸိုင်ႈၼူၵ်ႉယုင်း NLD သေ ပူတ်းပႅတ်ႈ ၽွင်းလူင်ၵဝ်ႇ ဢဝ်ၵူၼ်းၼႂ်းတပ်ႉသိုၵ်းမႃးတၢင်တႅၼ်းၶိုၼ်းတီႈယူႇ တႃႇ 11 ဢွင်ႈတီႈ ဝႃႈၼႆ။
ဝၼ်းတီႈ 1/2/2021 ၽူႈၼမ်းသိုၵ်းသုင်သုတ်း မိၼ်းဢွင်ႇလၢႆႇ ပူတ်းပႅတ်ႈၽွင်းလူင်ၵဝ်ႇ ဢဝ်ၵူၼ်းတပ်ႉသိုၵ်းပုတ်ႈလၢႆႈၶိုၼ်ႈပဵၼ်ၽွင်းလူင် မိူင်း ႁူမ်ႈတုမ် တႃႇ 11 ဢွင်ႈတီႈ ႁွင်ႈၵၢၼ်ၶၢဝ်ႇ မျႃႉဝတီႇ ဢွၵ်ႇဝႆႉၼင်ႇၼႆ။
ၼႂ်းၼၼ်ႉ ၽွင်းလူင် မိူင်းႁူမ်ႈတုမ် ႁွင်ႈၵၢၼ်ၾၢႆႇၼွၵ်ႈမိူင်းပဵၼ် ဢူးဝၼ်ႇၼမွင်ႇလုၼ်ႇ၊ ၽွင်းလူင် လုမ်းလူင်ပွင်ၸိုင်ႈ မိူင်းႁူမ်ႈတုမ် ၸွမ်သိုၵ်းသူဝ်းထုတ်ႉ၊ ၽွင်းလူင် ၾၢႆႇၵႅတ်ႇၶႄ ၸွမ်သိုၵ်းလူင် မျႃႉထုၼ်းဢူး၊ ၽွင်းလူင်ၾၢႆႇႁူမ်ႇလူမ်ႈ ၸွမ်း လႅၼ်လိၼ် ၸွမ်သိုၵ်းထုၼ်းထုၼ်းၼွင်ႇ ၶဝ်လႆႈပုတ်ႈႁပ်ႉႁၢပ်ႇၵၢၼ်ၵႂႃႇ။
လိူဝ်ၼၼ်ႉ ၽွင်းလူင်ၾၢႆႇၸၢၵ်ႈလႄႈ ၶူင်းၵၢၼ် ၾၢႆႇၵၢၼ်ငိုၼ်း ဢူးဝိၼ်းသဵင်ႇ၊ ၽွင်းလူင် ၾၢႆႇတိတ်းတေႃႇၵပ်း သိုပ်ႇ ၼွၵ်ႈမိူင်းလႄႈ လူင်းတိုၼ်း ဢူးဢွင်ႇ ၼၢႆႇဢူး၊ ၽွင်းလူင်ၾၢႆႇ ၼွၵ်ႈမိူင်း ဢူးၵူဝ်ႇၵူဝ်ႇၼၢႆႇ၊ ၽွင်းလူင်ၾၢႆႇ ၵပ်းသိုပ်ႇ ဢူးသိၵ်ႉၼၢႆႇ၊ ၽွင်းလူင် ၾၢႆႇယဵၼ်ႇငႄႈလႄႈ သႃသၼႃ ဢူးၵူဝ်ႇၵူဝ်ႇ၊ ၽွင်းလူင် ၾၢႆႇတူင်ႇဝူင်းၵူၼ်း၊ ၾၢႆႇႁႅင်း ၵၢၼ်လႄႈ ၾၢႆႇႁႅင်းၵူၼ်းမိူင်း ပဵၼ်ဢူးမိၼ်ႉၵျီႇ၊ ၽွင်းလူင်ၾၢႆႇပၢႆးယူႇလီလႄႈ ၾၢႆႇလဵၼ်ႈႁႅင်း တွၵ်ႊတိူဝ်ႊတႅၵ်ႉၶၢႆႇဝိၼ်း ၸိူဝ်း ၼႆႉ ၶဝ်ႈႁပ်ႇၵၢၼ်သေ ၶွတ်ႇၽွတ်ႈပဵၼ်လူင်ပွင်ၸိုင်ႈၸူဝ်ႈၶၢဝ်း ၊ ဢဝ်ဢူးမျိၼ်ႉသူၺ်ႇ (ၵႅမ်ၸွမ်ၸိုင်ႈ)ၶိုၼ်ႈပဵၼ်ၸွမ်ၸိုင်ႈ ၸူဝ်ႈၶၢဝ်း။
ၵူၺ်းၵႃႈမိူဝ်ႈဝႃး ဝၢႆးလင်ယိုတ်းဢမ်းၼၢတ်ႈယဝ်ႉ ၶွမ်ႊမတီႊၾၢႆႇႁူမ်ႇလူမ်ႈလႄႈၵႅတ်ႇၶႄၸိူဝ်ႉၸၢတ်ႈ (သိုၵ်းယိုတ်းဢမ်းၼၢတ်ႈ) ၼၼ်ႉ ၸတ်းပၢင်ၵုမ်သေ ပိုၼ်ၽၢဝ်ႇဝႃႈ ၸွမ်ၸိုင်ႈၸိူဝ်ႈၶၢဝ်း ဢူးမျိၼ်ႉသူၺ်ႇ လႆႈမွပ်ႈဢႃႇၼႃႇၽွင်းငမ်းဝၢၼ်ႈမိူင်းၼႆႉပၼ်ၼႂ်းမိုဝ်းၸွမ်ၸိၵ်းသိုၵ်းလူင်မိၼ်းဢွင်ႇလၢႆႇၵႂႃႇယဝ်ႉဝႃႈၼႆ။