ဢိင်ၼိူဝ်လွင်ႈသိုၵ်းမၢၼ်ႈ တီႉၺွပ်းၽူႈၼမ်းၸိၵ်းၸွမ်လူင်ပွင်ၸိုင်ႈၼူၵ်ႉယုင်း NLD လၢႆလႆၢၵေႃႉသေ ၼႂ်ၼႆႉ ၵၵ်း/ၵုမ်း ပႃး ၽူႈတႅၼ်းသၽႃး ၸိူဝ်းႁွတ်ႈၽႅဝ်တီႈ ၼေႇပျီႇတေႃႇဝႆႉ ၸူဝ်ႈၶၢဝ်း ဝႃႈၼႆ။  

မိူဝ်ႈၼႆႉ ဝၼ်းတီႈ 1/2/2021 ၽူႈတႅၼ်းသၽႃး ၸိူဝ်းႁွတ်ႈၽႅဝ်ဝႆႉတီႈ ၼေႇပျီႇတေႃႇတႃႇၶဝ်ႈႁူမ်ႈပၢင်ၵုမ်သၽႃးၼၼ်ႉ ၺႃးသိုၵ်းမၢၼ်ႈ ၶဝ်ႈလွမ်ႉႁွပ်ႈ ဢွင်ႈတီႈယူႇသဝ်းၽူႈတႅၼ်းသၽႃး ဢႄႉယဵၵ်ႉတႃႇ မၢႆ 2 ဝႆႉ ဝႃႈၼႆ။

“မိူဝ်ႈၼႆႉ ပၢင်ၵုမ်သၽႃးၵေႃႈ ဢမ်ႇပဵၼ်ၶိုၼ်ႈယဝ်ႉ။ တႄႇၸဵမ်ၵၢင်ၼႂ်ၼႆႉမႃး သိုၵ်းမၢၼ်ႈၶဝ် မႃးလွမ်ႉႁွပ်ႈဝႆႉမူတ်းယဝ်ႉ တီႈႁဝ်းၶႃႈယူႇၼႆႉ။ ငိၼ်းဝႃႈ ၵူၼ်းလူင်ၾၢႆႇၼူၵ်ႉလႅင်ၶဝ်ၵေႃႈ ဢဝ်ၵႂႃႇမူတ်းၼႆ ။ ဢၼ်ပဵၼ်ႁဝ်းတႅၼ်းၽွင်း ၸိူဝ်းၼႆႉ တႄႉ ႁဝ်းၶႃႈယူႇဝႆႉ တီႈႁူင်း ဢႄႉယဵၵ်ႉတႃႇ မၢႆ 2 တၢင်းၼွၵ်ႈၼၼ်ႉတႄႉ ပလိၵ်ႈဝႃႇ၊ သိုၵ်းဝႃႇ လွမ်ႉႁွပ်ႈ ဝႆႉမူတ်း”-  ၽူႈ တႅၼ်းႁွတ်ႈၽႅဝ် ၼေႇပျီႇတေႃႇ ၵေႃႉၼိုင်ႈ လၢတ်ႈၼႄၼင်ႇၼႆ။

ၽွင်းယၢမ်းသိုၵ်းမၢၼ်ႈတီႉၺွပ်းၵုမ်းၵၵ်းတူဝ်ၽူႈၼမ်းၸိုင်ႈမိူင်း ယူႇၼၼ်ႉ တတ်းၼႅင်ႈသၢၼ် လႅင်းၾူၼ်း ဢိၼ်ႊထိူဝ်ႊၼႅတ်ႉဝႆႉလႄႈ ၵူၼ်းမိူင်းမၢင်ထုင်ႉ မၢင်တီႈ ယင်းဢမ်ႇလႆႈႁူႉလွင်ႈၵၢၼ်တီႉၺွပ်းၵၼ်။

ၽူႈတႅၼ်းသၽႃး ၸိူဝ်းပဵၼ်ၽူႈတႅၼ်းပႃႇတီႇၼူၵ်ႉယုင်းဢၼ်ၶဝ်ႈလိူၵ်ႈတင်ႈသေဢွင်ႇပေႉဝႆႉ ၵမ်ႈၼမ်ထုၵ်ႇႁွင်ႉၵႂႃႇၵၵ်းတူဝ်ဝႆႉ။ ၸိူဝ်းဢမ်ႇၸႂ်ႈပႃႇတီႇၼူၵ်ႉယုင်းၵေႃႈ မၢင်ဝဵင်းၼႆႉ ယင်းၺႃးပလိၵ်ႈႁွင်ႉၵႂႃႇထဵတ်ႈထၢမ်။ ပၢင်ၵုမ်သၽႃးၸႄႊမိူင်းမိူင်းတႆး ဢၢၼ်းတေတႄႇၼႂ်းဝၼ်းတီႈ8/2/2021။

ပၢင်ၵုမ်သၽႃးၵူၼ်းမိူင်းလႄႈ မိူင်းႁူမ်ႈတုမ် ၵမ်းထူၼ်ႈ 3 ပွၵ်ႈၵမ်းႁႅၵ်ႈၼႆႉသမ်ႉ တေၸတ်းႁဵတ်းၼႂ်းဝၼ်းတီႈ 1/2/2021 ၼႆႉ ၵူၺ်းၵႃႈ ယၢမ်းၵၢင်ၼႂ်ၸဝ်ႉ သိုၵ်းမၢၼ်ႈ ၸႂ်ႉႁႅင်းသိုၵ်းတင်းၼမ်လၢႆ ၶဝ်ႈတီႉၺွပ်း ၽူႈၼမ်း NLD လႄႈပၢင်ၵုမ်သၽႃးလႆႈၵိုတ်းၶၢတ်ႇပႅတ်ႈမူတ်း ။