ဢိင်ၼိူဝ် ၵူၼ်းမိူင်း 2,000 ပၢႆ ႁူမ်ႈၵၼ်လူင်းလၢႆးမိုဝ်း ယိုၼ်ႈလိၵ်ႈသၢၼ်ၶတ်းၾၢႆၼမ်ႉတူႈထိုင်  ၽူႈၵိူဝ်းၵုမ်ၸိုင်ႈမိူင်းၼၼ်ႉသေ ယူႇတီႈၵေႃၵမ်ၵၢၼ်ၾၢႆႇၽွင်းငမ်းၸႄႈဝဵင်း ႁွင်ႉ ၽူႈဢွၼ်လူင်းလႆးမိုဝ်းသၢၼ်ၶတ်းၾၢႆၸိူဝ်းၼၼ်ႉ ၵႂႃႇႁူပ်ႉထူပ်းတွင်ႈထၢမ် ဝႃႈၼႆ။

ဝၼ်းတီႈ 25/1/2021 ပူၼ်ႉမႃးၼႆႉ ယူႇတီႈ ၵေႃၵမ်ၵၢၼ်ၾၢႆႇၽွင်းငမ်းၸႄႈဝဵင်း ႁွင်ႉဢဝ်ၽူႈဢွၼ်လူင်းလၢႆးမိုဝ်း သၢၼ် ၶတ်းၾၢႆ ယိုၼ်ႈလိၵ်ႈထိုင် တေႃႇဢွင်ႇသၢၼ်းသူႉၵျီႇ ၽူႈၵိူဝ်းၵုမ်ၸိုင်ႈမိူင်းၼၼ်ႉ ၵႂႃႇတွင်ႈထၢမ် တီႈလုမ်းၾၢႆႇၽွင်းငမ်း ၵူႈလွင်ႈလွင်ႈၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ  ။

ၽူႈၼမ်းဢွၼ်ႁူဝ်ၵဵပ်းလၢႆးမိုဝ်း 4 ၵေႃႉၼၼ်ႉ ၵႂႃႇႁူပ်ႉၸုမ်းၽွင်းငမ်းဝဵင်းမႃးသေ ဢွၵ်ႇလိၵ်ႈပိုၼ်ၽၢဝ်ႇၽိုၼ်ၼိုင်ႈဝႃႈ – “ ဢိင်ၼိူဝ်လွင်ႈသူင်ႇလိၵ်ႈထိုင် တေႃႇဢွင်ႇ သၢၼ်းသုၵျီႇၼၼ်ႉသေ ဝၼ်းတီႈ 25/1/2021 ၼႆႉ ၵေႃၵမ်ၵၢၼ်ၾၢႆႇၽွင်း ငမ်းၸႄႈဝဵင်းသီႇပေႃႉ လႆႈႁွင်ႉဢဝ်ၽူႈၼမ်း ၵူၼ်းဝၢၼ်ႈသီႇၵေႃႉဢၼ်သူင်ႇလိၵ်ႈထိုင်တေႃႇဢွင်ႇသၢၼ်းသူႉၵျီႇၼၼ်ႉ ၵႂႃႇႁူပ်ႉထူပ်းၶဝ်တီႈ လုမ်းၾၢႆႇၽွင်းငမ်းၵူႈလွင်ႈ လွင်ႈဝဵင်းသီႇပေႃႉသေတွင်ႈထၢမ်။ ၸဝ်ႈၼႃႈတီႈၶဝ်ထၢမ်ထိုင် လွင်ႈလႆႈသူင်ႇလိၵ်ႈၸူးတေႃႇဢွင်ႇသၢၼ်းသူႉၵျီႇ၊ လွင်ႈ သုၼ်ႇတူဝ်ၸဝ်ႈၵဝ်ႇ၊ ႁူဝ်ယွႆႈၶေႃႈမုလ်း လွင်ႈၵေႃႇသၢင်ႈၾၢႆ၊ ၽွၼ်းလီ ၽွၼ်းႁၢႆႉလွင်ႈသၢင်ႈၾၢႆပႃးၸဵမ် လွင်ႈၵူၼ်းဝၢၼ်ႈ ႁၼ်ထိုင်ၵၢၼ်သၢင်ႈၾၢႆၸိူင်ႉႁိုဝ်။  ၶေႃႈမုၼ်း ဢၼ်ၾၢႆႇၽူႈၼမ်း 4 ၵေႃႉတွပ်ႇပၼ်ၼၼ်ႉ ၸဝ်ႈၼႃႈတီႈၶဝ် လၢတ်ႈဝႃႈ တေဢဝ်သူင်ႇထိုင်ႁွင်ႈၵၢၼ် ၸိူဝ်းၵဵဝ်ႇၶွင်ႈၵူႈတီႈတီႈတေႃႇထိုင်လုမ်းၽူႈၵိူဝ်းၵုမ်ၸိုင်ႈမိူင်း”- ဝႃႈၼႆ။

မိူဝ်ႈဝၼ်းတီႈ 27/10/2020 ပူၼ်ႉမႃးၼၼ်ႉ ၵူၼ်းဝၢၼ်ႈၸိူဝ်းတေၺႃးလွင်ႈ တုမ်ႉတိူဝ်ႉ ယွၼ်ႉၾၢႆ ၼႂ်းၸႄႈဝဵင်း သီႇပေႃႉ၊ ၼမ်ႉတူႈ၊ ၵျွၵ်းမႄးလႄႈလႃႈသဵဝ်ႈ ၸိုင်ႈတႆးပွတ်းႁွင်ႇ မွၵ်ႈ 2000 ၵေႃႉ လႆႈႁူမ်ႈၵၼ်လူင်းလၢႆးမိုဝ်းယိုၼ်ႈလိၵ်ႈထိုင်တေႃႇဢွင်ႇ သၢၼ်းသူႉၵျီႇ ၽူႈၵိူဝ်းၵုမ်ၸိုင်ႈမိူင်း ႁႂ်ႈၸွႆႈၵိုတ်းပၼ် ၶူင်းၵၢၼ်သၢင်ႈၾၢႆသၢမ်ဢၼ် ၼိူဝ်မႄႈၼမ်ႉတူႈ  ။

ၾၢႆႇၽူႈၼမ်း 4 ၵေႃႉဢၼ်လႆႈၵႂႃႇႁူပ်ႉထူပ်းၸုမ်းၽွင်းငမ်းၸႄႈဝဵင်းသီႇပေႃႉမႃးၼၼ်ႉ  တိုၵ်းသူၼ်းတုၵ်းယွၼ်းၶိုၼ်း ၶေႃႈ တုၵ်းယွၼ်းၵဝ်ႇၵဝ်ႇ ၼင်ႇဢၼ်ယၢမ်ႈတုၵ်းယွၼ်းမႃး မိူၼ်ၼင်ႇ– ႁဝ်းဢမ်ႇၶႂ်ႈႁႂ်ႈသၢင်ႈၾၢႆၼိူဝ်မႄႈၼမ်ႉတူႈ၊ ႁဝ်းဢမ်ႇ ႁၼ်လီၸွမ်းလွင်ႈတေလႆႈ ၶၢႆႉဝၢၼ်ႈလႄႈ ဢၼ်ႁဝ်းၶႂ်ႈလႆႈၼၼ်ႉပဵၼ်လွင်ႈငမ်းယဵၼ်ၼႂ်းပိုၼ်ႉတီႈႁဝ်းၵူၺ်း ၸဵမ်ၸိူဝ်း ၼႆႉ– ဝႃႈၼႆ။

 တီႈပၢင်ႁူပ်ႉထူပ်းၵၼ်ၼၼ်ႉ ၾၢႆႇၽူႈၼမ်း 4 ၵေႃႉ ထၢမ်ထိုင်လွင်ႈၽိုၼ်လိၵ်ႈဢၼ် လႆႈသူင်ႇထိုင်တေႃႇဢွင်ႇသၢၼ်းသူႉၵျီႇ  ၼၼ်ႉယူႇ ၵူၺ်းၵႃႈ တၢင်းၾၢႆႇၸဝ်ႈၼႃႈတီႈ ဢမ်ႇတွပ်ႇပၼ်သင် ဝႃႈၼႆ။

 ၶွမ်ႊမၼီႊ လႄႈၸဝ်ႈငိုၼ်းသႃးၼွၵ်ႈမိူင်း ဢုပ်ႇၵုမ်လႆႈၸႂ်ၵၼ်တင်းလူင်ပွင်ၸိုင်ႈသေ တေဢၢၼ်းသၢင်ႈၾၢႆယႂ်ႇလူင်ၼိူဝ်ၼမ်ႉတူႈ ၼႂ်းၸိုင်ႈတႆးပွတ်းႁွင်ႇ 3 တီႈ။

1 -ၾၢႆယႄးယႂႃႇတွၼ်ႈၵၢင်  တေဢိတ်ႇဢွၵ်ႇႁႅင်းၾႆးၾႃႉ ႁႅင်း 735 မေႊၵႃႊဝတ်ႊ၊ ၽူႈလူင်း တိုၼ်း ပဵၼ် ၶွမ်ႊပၼီႊ SN Power ဢၼ်ယူႇပႃႈတႂ်ႈလူင်ပွင်ၸိုင်ႈမိူင်းၼေႃႇဝူၺ်း၊ 2- ၽၢႆယႄးယႂႃႇတွၼ်ႈၼိူဝ်  တေ ဢိတ်ႇ ဢွၵ်ႇႁႅင်းၾႆးၾႃႉ 280 မေႊၵႃႊဝတ်ႊ၊ ၽူႈလူင်းတိုၼ်းပဵၼ်ၶွမ်ႊပၼီႊ ၶႄႇ၊ ၵျပၢၼ်ႇ၊ သဝိတ်ႊၸိူဝ်ႊလႅၼ်ႊ လႄႈ ၾရင်ႇ သဵတ်ႈ သေ  3- သမ်ႉပဵၼ်ၾၢႆၼမ်ႉတူႈ (သီႇပေႃႉ) ဢၼ်တေဢိတ်ႇဢွၵ်ႇႁႅင်းၾႆးၾႃႉ 210 မေႊၵႃႊဝတ်ႊ ၽူႈလူင်းတိုၼ်းပဵၼ် ၶွမ်ႊပၼီႊ Natural Current Energy Hydropower Company ၸိူဝ်းၼႆႉ လႆႈႁူႉၼင်ႇၼႆ။