ၾၢႆႇပၢႆးယူႇလီ မေႃယႃ ၼႂ်းၸိုင်ႈတႆးပွတ်းၸၢၼ်း တႃႇ 5,000 ပၢႆ တေလႆႈႁပ်ႉသမ်းယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ယဝ်ႉ ဝႃႈၼႆ။

ပေႃးထိုင်မႃး ဝၼ်းတီႈ 27/1/2021 ၼႆႉ ၸုမ်းၾၢႆႇပၢႆးယူႇလီ မေႃယႃ ၽူႈၸွႆႈမေႃယႃ တႃႇႁူဝ်ၵူၼ်း 5,096 ၵေႃႉ ၼႂ်းၸိုင်ႈ တႆးပွတ်းၸၢၼ်း တေလႆႈႁပ်ႉသမ်းယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 တီႈႁူင်းယႃလူင်ၸဝ်ႈၸၢမ်ႇထုၼ်း တင်း ႁူင်းယႃ မႄႈလုၵ်ႈဢွၼ်ႇ (မိခင်ကလေးဆေးရုံ) ဢွၼ်တၢင်း ၼႂ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း  ။

ၻွၵ်ႊတိူဝ်ႊ သဝၼၵူဝ်ႇ ၵႅမ်ၽူႈၸီႉသင်ႇ ႁွင်ႈၵၢၼ်ပၢႆးယူႇလီၸႄႈမိူင်းတႆး လၢတ်ႈဝႃႈ – “ဢွၼ်တၢင်းသုတ်း တေသမ်းပၼ်  ၾၢႆႇမေႃယႃလႄႈ ၽူႈၸွႆႈမေႃယႃ တီႈႁူင်းယႃ ၸဝ်ႈၸၢမ်ႇထုၼ်း။ တီႈႁူင်းယႃ မႄႈလႄႈ လုၵ်ႈဢွၼ်ႇၼၼ်ႉတႄႉ တိုၵ်ႉႁၢင်ႈႁႅၼ်းဝႆႉယူႇ။ ဢၼ်တေသမ်းပၼ်ၼၼ်ႉ မေႃယႃ၊ ၽူႈၸွႆႈမေႃယႃ တႃႇ 21 ၸႄႈဝဵင်း ၼႂ်းၸိုင်ႈတႆးပွတ်းၸၢၼ်း ႁၢင်ႈႁႅၼ်းတႃႇတေသမ်းယဝ်ႉ”-  ဝႃႈၼႆ။

ၽူႈတေလႆႈႁပ်ႉသမ်းယႃႈယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႆႉ ႞ ၵေႃႉ တေလႆႈႁပ်ႉသမ်း 2 ပွၵ်ႈ ။ ပွၵ်ႈ ႞ လႄႈပွၵ်ႈ ႞ တေလႆႈယၢၼ်ၵၼ် 28 ဝၼ်း  ။ ၵူၺ်းၵႃႈတေႃႇထိုင်ယၢမ်းလဵဝ် ယႃႈယႃပႆႇၽႅဝ်လႄႈ ၸွမ်းၼင်ႇၼတ်ႉမၢႆၵၼ်ဝႆးဝၼ်းတီႈ 27 ၼၼ်ႉ ၸွင်ႇတေလႆႈသမ်း ဢမ်ႇလႆႈသမ်းဢမ်ႇပႆႇႁူႉတႅတ်ႈတေႃး ။

“ႁဝ်းၶႃႈ ႁၢင်ႈႁႅၼ်းဝႆႉ တေသမ်းၼႂ်းဝၼ်းတီႈ 27 ၼႆႉ။ ၵူၺ်းၵႃႈ ယၢမ်းလဵဝ် ယႃႈယႃ ပႆႇႁွတ်ႈၽႅဝ်မႃးမိူင်းတႆး။ ႁဝ်းၶႃႈ တေလႆႈပႂ်ႉတူၺ်းဝႃႈယႃႈယႃတေႁွတ်ႈၽႅဝ်မႃးမိူဝ်ႈလႂ်။ ပေႃးဢမ်ႇထိုင်မႃး  တေၸၢင်ႈမီးလွင်ႈလႅၵ်ႈလၢႆး ဝၼ်းသမ်းယႃႈယႃယူႇၶႃႈ”- ဝႃႈၼႆ။

ယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႆႉ  မိူင်းၵြႃးဢိၼ်ႊတီႊယႃႊ ၸႅၵ်ႇပၼ်မိူင်းႁိမ်းႁွမ်းမၼ်းၸႂ်ႉတူၺ်း။ ၼႂ်းၼၼ်ႉမိူင်းႁူမ်ႈတုမ်မၢၼ်ႈလႆႈတႃႇ 1.5 လၢၼ်ႉမူၵ်ႇ/ တဝ်ႈ ။ ႁွတ်ႈထိုင်မိူင်းမၢၼ်ႈမိူဝ်ႈဝၼ်းတီႈ 22/1/2021 ပူၼ်ႉမႃး။ ယႃႁႄႈၵင်ႈၼႆႉ တေသမ်းပၼ် တႃႇႁူဝ်ၵူၼ်း 7 သႅၼ်ပၢႆ (ၵူၼ်းႁဵတ်းၵၢၼ်လမ်ႇလွင်ႈတွၼ်ႈတႃႇမိူင်းႁူမ်ႈတုမ်) ဢွၼ်တၢင်း။ ၼိုင်ႈ ၵေႃႉလႂ် တေလႆႈႁပ်ႉသမ်း 2 ပွၵ်ႈ ဢွၼ်တၢင်းသုတ်း တေသမ်းပၼ် ၸုမ်းၾၢႆႇပၢႆးယူႇလီလႄႈ ၾၢႆႇလူင်ပွင်ၸိုင်ႈဢွၼ်ႇ တၢင်း ၼႆယဝ်ႉ။

တွၼ်ႈတႃႇၵူၼ်းမိူင်း ၽၵ်းၵႃႇၵေႃႈတေလႆႈသမ်းယူႇဝႃႈၼႆသေတႃႉ  တေပဵၼ်မိူဝ်ႈလႂ်ပႆႇလႆႈႁူႉဝႃႈၼႆ။

ယၢမ်းလဵဝ်ၼႂ်းမိူင်းတႆး ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ -19 ဢၼ်ယူႇတႂ်ႈ ပၢႆးယူႇလီလူင်ပွင်ၸိုင်ႈမိူင်းတႆးတူၺ်းထိုင်မီး 1100 ၵေႃႉပၢႆ။ တၢႆ 4 ၵေႃႉ။ ဢၼ်ယူႇၼႂ်းၼႃႈလိၼ် ဝႃႉ UWSA ၵုမ်းၵမ် သမ်ႉ ၵူၼ်းတိတ်းၸပ်းတၢင်းပဵၼ်မီး 300 ပၢႆ။