ၵူၼ်းၶီႇလူတ်ႉၶိူင်ႈ 2 ၵေႃႉမႃးယိုဝ်းႁၢၼ်ႉၶၢႆၶဝ်ႈၽၵ်း M2K ၵျွၵ်ႉမႄး ၵူၼ်းၼင်ႈၵိၼ်ၶဝ်ႈၼႂ်းႁၢၼ်ႉ မၢတ်ႇၸဵပ်း 2 ၵေႃႉလႆႈႁၢမ်သူင်ႇႁူင်းယႃ။
ဝၼ်းတီႈ 25/1/2021 ယၢမ်းၵၢင်ၶမ်ႈ မွၵ်ႈ 8 မူင်းၶိုင်ႈ မီးၵူၼ်း/ၸုမ်းဢမ်ႇႁူႉၾၢႆႇ ပဵၼ်ၽူႈၸၢႆး 2 ၵေႃႉ ၶီႈရူတ်ႉၶိူင်ႈမႃးသေ လၢၵ်ႈၵွင်ႈယိုဝ်းၶဝ်ႈၼႂ်းႁၢၼ်ႉၶၢႆၶဝ်ႈၽၵ်း M2K ဢၼ်မီးၼိူဝ်သဵၼ်ႈတၢင်း ဢွင်ႇသၢၼ်း ပွၵ်ႉ 8 ၸႄႈဝဵင်းၵျွၵ်ႉမႄး ၸိုင်ႈတႆးပွတ်း ႁွင်ႇ တိူဝ်ႉၺႃးၵူၼ်းၼုမ်ႇ မၢတ်ႇၸဵပ်းၸွမ်း 2 ၵေႃႉ ။
ၵူၼ်း 2 ၵေႃႉၼၼ်ႉယိုဝ်းၵွင်ႈၶဝ်ႈၼႂ်းႁၢၼ်ႉတၢင်းၵိၼ်ၼၼ်ႉ 7 ၵမ်း ။ တိူဝ်ႉၺႃးၽိူၼ်တင်ႇလႄႈၶူဝ်းၶွင်လူႉၵွႆၽွင်ႈ ။
ၵူၼ်းၸၢႆး 2 ၵေႃႉ ဢၼ်တိူဝ်ႉၺႃးမၢၵ်ႇၵွင်ႈၼၼ်ႉ ၸိုဝ်ႈႁွင်ႉ ၵူဝ်ႇလၢႆးၵျေႃႇထုၼ်း ဢႃယု 20 ပီ တိူဝ်ႉၺႃးတီႈၶႃႈလူင်ၾၢႆႇၶႂႃ ႁွႆးၼိုင်ႈ၊ ၵုမ်ႇၵူၼ်ႈ ႁွႆးၼိုင်ႈ။ ၵူဝ်ႇဢွင်ႇတဵင်းသူဝ်း (ႁွင်ႉ) တဵင်းသူဝ်း တိူဝ်ႉၺႃး တီႈတိၼ်ၾၢႆႇၶႂႃ ႁွႆးၼိုင်ႈ ။လႆႈႁူႉဝႃႈၸိူဝ်းၶဝ်ၼင်ႈၵိၼ်ၶဝ်ႈၶမ်ႈၸွမ်းၵၼ် 4 ၵေႃႉၼၼ်ႉပဵၼ်ၵူၼ်းၶပ်းရူတ်ႉ ၸုမ်းၸွႆႈထႅမ် ၸဵပ်းမႆႈၶႆႈၼၢဝ် မၢတ်ႇၸဵပ်းလူႉတၢႆ- ဝႃႈၼႆ။
ယၢမ်းလဵဝ် ၵူၼ်းၼုမ်ႇ 2 ၵေႃႉၼၼ်ႉ လႆႈသူင်ႇယူတ်းယႃတူဝ်ဝႆႉတီႈႁူင်းယႃလူင် ၵျွၵ်ႉမႄးယဝ်ႉ ။
ဢိင်ၼိူဝ်ၵူၼ်းႁၢႆႉ 2 ၵေႃႉ ဢၼ်ၶဝ်ႈမႃးယိုဝ်းၼႂ်းႁၢၼ်ႉၶၢႆၶဝ်ႈၽၵ်းၼၼ်ႉ ယၢမ်းလဵဝ် ယူႇတီႈပလိၵ်ႈၵျွၵ်ႉမႄး တိုၵ်ႉသိုပ်ႇ သွၵ်ႈႁႃတူဝ်ယူႇ ။
