ၵူၼ်းမူႇၸေႊ ၵေႃႉၼိုင်ႈ ထုၵ်ႇလုၵ်ႈၼွင်ႉ/ၵူၼ်းႁဵတ်းၵၢၼ် ၸဝ်ႈၵဝ်ႇ ၶဝ်ႈၸူၼ် ၼႂ်းႁိူၼ်း၊ ၾၼ်းမၼ်းၼၢင်းမၢတ်ႇၸဵပ်း ၊ ယၢမ်းလဵဝ် ၶဝ်ႈယူတ်းယႃတူဝ်ဝႆႉယူႇတီႈႁူင်းယႃမူႇၸေႊ။

မိူဝ်ႈၼႆႉ ဝၼ်းတီႈ 22/1/2021 ယၢမ်းၵၢင်ဝၼ်းမွၵ်ႈ 12 မူင်းၶိုင်ႈၼႆႉ ၼၢင်းလႃႉလႃႉဝိၼ်း ယူႇပွၵ်ႉၸၢၼ်း ဝဵင်းမူႇၸေႊ ၸိုင်ႈတႆးပွတ်းႁွင်ႇ ထုၵ်ႇလုၵ်ႈၼွင်ႉ/ ၵူၼ်းႁဵတ်းၵၢၼ် ၶဝ်ႈၸူၼ်ၼႂ်းႁိူၼ်းယေးၸဝ်ႈၵဝ်ႇသေ ဢဝ်ၽႃႉၾၼ်းသႂ်ႇ တီႈၵွၵ်းႁူဝ်မၼ်းၼၢင်း မၢတ်ႇၸဵပ်း ပဵၼ်လိူတ်ႈပဵၼ်ယၢင်။

ၵႄႇ 100 ႁိူၼ်း (ရာအိမ်မှူး) ပွၵ်ႉၸၢၼ်း လၢတ်ႈဝႃႈ – “ၸဝ်ႈႁိူၼ်း တင်း ၵူၼ်းႁၢႆႉၼၼ်ႉ ၶဝ် မင်ၵၼ်သေ ၵေႃႉပဵၼ်ၸဝ်ႈႁိူၼ်း ၶိုၼ်းၶၢတ်းသေႃး၊ လႅၼ်ႈၶိုၼ်ႈၼိူဝ်ႁိူၼ်းသေႁွင်ႉပယွၼ်းတၢင်းၸွႆႈထႅမ်။ ၽွင်းၼၼ်ႉႁဝ်းၶႃႈသမ်ႉ တိုၵ်ႉလူင်းပၢင်ၽိုၵ်းၽွၼ်ႉ တီႈႁိမ်းၼၼ်ႉၵူၺ်းလႄႈ ၼႅတ်ႈၵႂႃႇၸွႆႈ ၵူၼ်းႁၢႆႉ 2 ၵေႃႉၼၼ်ႉ ပၢႆႈလွတ်ႈၵေႃႉၼိုင်ႈ၊ တီႉလႆႈၵေႃႉၼိုင်ႈ။ ၵူၼ်းႁၢႆႉၼၼ်ႉ ပဵၼ်လုၵ်ႈၼွင်ႉၸဝ်ႈႁိူၼ်းၼၼ်ႉၵူၺ်း ဢႃယု တေမီး 30 ပၢႆၼႆႉ”- ဝႃႈၼႆ။

ၸဝ်ႈႁိူၼ်း ဢၼ်ထုၵ်ႇၾၼ်းၼၼ်ႉ လႆႈတိူဝ်ႉၺႃးမၢတ်ႇၸဵပ်း တီႈၵွၵ်းႁူဝ် 4 ႁွႆး ယဝ်ႉၵေႃႈ ၶဵဝ်ႈႁၢၵ်းလၢႆသိၵ်ႈ၊ ယၢမ်းလဵဝ် သူင်ႇယႃတူဝ်ဝႆႉတီႈႁူင်းယႃမူႇၸေႊ။ ၵူၼ်းၸူၼ်ၵေႃႈ ဢမ်ႇတၼ်းလႆႈ ၶူဝ်းၶွင်သင်ၵႂႃႇ ဝႃႈၼႆ။

ယၢမ်းလဵဝ် တူဝ်ၵူၼ်းႁၢႆႉ ဢၼ်တီႉလႆႈၵေႃႉၼိုင်ႈၼၼ်ႉ လႆႈသူင်ႇမွပ်ႈပၼ် ႁူင်းပလိၵ်ႈၸႄႈဝဵင်းမူႇၸေႊဝႆႉယဝ်ႉ ဝႃႈၼႆ။

ၸဝ်ႈႁိူၼ်း ၼၢင်းလႃႉလႃႉဝိၼ်း တီႈပွၵ်ႉၸၢၼ်းၼၼ်ႉ ပဵၼ်ၵူၼ်းမႃးၶၢတ်ႇယူႇသေ ႁဵတ်းၵၢၼ်ပၢႆးမၢၵ်ႈမီး တေႃႉသူင်ႇၶူဝ်း ၶၢႆ ၾင်ႇ မိူင်းၶႄႇ တင်း မိူင်းတႆး ။