ႁွင်ႈၵၢၼ်ပၢႆးယူႇလီမိူင်းတႆးပိုတ်ႇႁွင်ႈၵူတ်ႇထတ်းၶူဝ်ႊဝိတ်ႉလူၺ်ႈၸႂ်ႉၶိူင်ႈ RDT Test Kit ၵူတ်ႇထတ်း၊ ႁႂ်ႈၵူၼ်းမိူင်း ၸၢင်ႈၶဝ်ႈၸႂ်ႉၵၢၼ်လႆႈၵူႈၵေႃႉ ဝႃႈၼႆ။
တႄႇဢဝ် ဝၼ်းတီႈ 18/1/2021 ၼႆႉၵႂႃႇ ႁွင်ႈၵၢၼ်ပၢႆးယူႇလီမိူင်းတႆး ပိုတ်ႇႁွင်ႈၵၢၼ်ၵူတ်ႇထတ်းတင်းပဵၼ်ၶူဝ်ႊဝိတ်ႉ-19 တီႈ လုမ်းၵဝ်ႇလူင်ပွင်ၸိုင်ႈမိူင်းတႆး တီႈပွၵ်ႉပႃႇမႆႉ (ပွၵ်ႉတိတ်ႉတေႃး) ဝဵင်းတူၼ်ႈတီး။ ပႂ်ႉၵူတ်ႇထတ်းပၼ်တင်ႈတႄႇ ယၢမ်းၵၢင်ၼႂ် 9 မူင်းၶိုင်ႈ ထိုင် 3 မူင်းၶိုင်ႈဝၢႆးဝၼ်း။
ၼႂ်းလိၵ်ႈပိုၼ်ၽၢဝ်ႇလူင်ပွင်ၸိုင်ႈၼၼ်ႉတႅမ်ႈဝႆႉဝႃႈ ၼိုင်ႈဝၼ်းလႂ် တေႁပ်ႉၵူတ်ႇထတ်းပၼ် တႃႇၵူၼ်း 50 ၵေႃႉ။ ၼိုင်ႈၵေႃႉလႂ် လႆႈ ပၼ်ၵႃႈၵူတ်ႇထတ်း 10,000 ပျႃး။ တေၵူတ်ႇထတ်းပၼ်ၶၢဝ်းယၢမ်းၵၢင်ၼႂ် 9:30 မူင်းထိုင် 12:00 မူင်းၵၢင်ဝၼ်း ၵမ်းၼိုင်ႈ။ တႄႇဢဝ် 1:00 မူင်းဝၢႆးဝၼ်း ထိုင် 3:30 မူင်းဝၢႆးဝၼ်း ၵမ်းၼိုင်ႈ ။ ၽႂ်ၵေႃႉလႂ်ၶႂ်ႈၵူတ်ႇထတ်းၵေႃႈ ၶဝ်ႈမႃးၵူတ်ႇထတ်းလႆႈ ဝႃႈၼႆ။
ယၢမ်းလဵဝ် ၼႂ်းမိူင်းတႆး ပတ်းပိုၼ်ႉ ၸွမ်းၼင်ႇ လူင်ပွင်ၸိုင်ႈ ၵူတ်ႇထတ်းထူပ်းႁၼ် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 သၢမ်ပွတ်းတွၼ်ႈ။ ပွတ်းၸၢၼ်း၊ ပွတ်းႁွင်ႇလႄႈ ပွတ်းဢွၵ်ႇၶူင်း တေႃႇထိုင် ဝၼ်းတီႈ 17/1/2021 ၼႆႉ မီး ၵူၼ်းတိတ်းၸပ်းတၢင်းပဵၼ် 1,134 ၵေႃႉ၊ လူႉတၢႆ 3 ၵေႃႉ ၼႆယဝ်ႉ။
ၼႂ်းမိူင်းႁူမ်ႈတုမ် ပတ်းပိုၼ်ႉသမ်ႉ ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇဝႆႉ မိူဝ်ႈဝၼ်းတီႈ 18/1/2021 ယၢမ်းၵၢင်ၶမ်ႈ 8 မူင်း မီးၵူၼ်းတိတ်း ၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 134,795 ၵေႃႉ၊ ယႃၶႅၼ်း 118,200 ၵေႃႉလႄႈ လူႉတၢႆ 2,973 ၵေႃႉ ။
