ဝၼ်းမိူဝ်ႈၽုၵ်ႈၼႆႉ ပႃႇတီႇၼူၵ်ႉယုင်း NLD တင်း ပႃႇတီႇႁူဝ်သိူဝ် SNLD တေႁူပ်ႉၵၼ် ပဵၼ်တၢင်းၵၢၼ် တီႈဝဵင်းတူၼ်ႈတီး၊ ၵွၼ်ႇပႆႇႁူပ်ႉၵၼ်ၼႆႉ ၼူၵ်ႉယုင်းသူင်ႇတူဝ်တႅၼ်း ၵႂႃႇႁူပ်ႉၽူႈၼမ်းႁူဝ်သိူဝ် တီႈဝဵင်းတႃႈၵုင်ႈယဝ်ႉသွင်ပွၵ်ႈ။
မိူဝ်ႈဝၼ်းတီႈ 7 ပူၼ်ႉမႃးၼၼ်ႉ တူဝ်တႅၼ်းပႃႇတီႇၼူၵ်ႉယုင်း သူင်ႇတူဝ်တႅၼ်းၵႂႃႇႁူပ်ႉ ၸဝ်ႈၶုၼ်ထုၼ်းဢူး ႁူဝ်ပဝ်ႈ ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး တီႈဝဵင်းတႃႈၵုင်ႈ၊ မိူဝ်ႈၼႆႉ ဝၼ်းတီႈ 14 သမ်ႉ တူဝ်တႅၼ်းၼူၵ်ႉယုင်းၵႂႃႇ ႁူပ်ႉ ၵႅမ်ႁူဝ်ပဝ်ႈ ပႃႇတီႇ ႁူဝ်သိူဝ်၊ တူၵ်းလူင်းလႆႈၸႂ်ၵၼ်သေ မိူဝ်ႈၽုၵ်ႈ ယၢမ်းၵၢင်ၼႂ် 10 မူင်း သွင်ၾၢႆႇ တေႁူပ်ႉထူပ်းဢုပ်ႇဢူဝ်းၵၼ်တီႈဝဵင်းတူၼ်ႈတီး။
“ဢၼ်တေႁူပ်ႉၵၼ်မိူဝ်ႈၽုၵ်ႈၼႆႉတႄႉ တေဢုပ်ႇထၢမ် လွင်ႈတေႁဵတ်းႁိုဝ် ၵေႃႇသၢင်ႈ လွင်ႈၽွမ်ႉႁူမ်ႈၼႂ်းၸိူဝ်ႉၸၢတ်ႈ ၸၢဝ်းၶိူဝ်း၊ တေသၢၼ်မိုဝ်းၵၼ်ၵႂႃႇလႆႈၸိူင်ႉႁိုဝ် ပိူင်လူင်ၸိူဝ်းၼႆႉယဝ်ႉ ဢၼ်တေဢုပ်ႇၵၼ်” – ၽူႈၼမ်းၼႂ်းၵူႈ လွင်ႈလွင်ႈ ပႃႇတီႇႁူဝ်သိူဝ် SNLD ၸၢႆးလဵၵ်ႉလၢတ်ႈတီႈၽူႈတွႆႇႁွၵ်ႈ ၼင်ႇၼႆ။
ပႃႇတီႇၼူၵ်ႉယုင်းၼႆႉ သူင်ႇတူဝ်တႅၼ်းပႃႇတီႇ တွၵ်ႇတိူဝ်ႊဢွင်ႇမူဝ်းၺူဝ်ႇ ၸွမ်ၽွင်းလူင်တိူင်းမၵူၺ်း၊ ၼၢင်းၶိၼ်ႇ ထူၺ်းမိၼ်ႉ ၸွမ်ၽွမ်းလူင် ၸႄႈမိူင်းယၢင်းၽိူၵ်ႇ တင်း ၽူႈတႅၼ်းသၽႃး ၸိူဝ်ႉၸၢတ်ႈ ၼႂ်းၸႄႈမိူင်းၶၢင် ၵေႃႉၼိုင်ႈ ဢႅဝ်ႇႁွၼ်ႈလၢႆႈၸႄႈမိူင်းသေ ႁူပ်ႉပႃႇတီႇၸၢဝ်းၶိူဝ်း ၸိူဝ်းဢွင်ႇပေႉပၢင်လိူၵ်ႈတင်ႈ 48 ပႃႇတီႇ။
ၼႂ်းမိူင်းတႆးတႄႉ မိူဝ်ႈဝႃး ဝၼ်းတီႈ 13/1/2021 ႁူပ်ႉပႃႇတီႇ ပဢူဝ်း PNO တင်း ပႃႇတီႇတဢၢင်း TNP ။ ဢွၼ်ၼႃႈၼၼ်ႉ ႁွတ်ႈထိုင်ၵႂႃႇ မိူင်းမွၼ်း ၊ မိူင်းယၢင်းလႅင်(ၵယႃး) သေတႃႉ ယွၼ်ႉဢုပ်ႇဢူဝ်းပိုၼ်ႉတီႈ တႃႇႁူပ်ႉထူပ်း ဢမ်ႇတူၵ်းလူင်းၵၼ်လႆႈလႄႈ ဢမ်ႇပဵၼ်ႁူပ်ႉမႃး။
ဢၼ်ပႃႇတီႇၼူၵ်ႉယုင်း ဢႅဝ်ႇႁွၼ်ႈ ႁႃႁူပ်ႉပႃႇတီႇ ၸၢဝ်းၶိူဝ်း 48 ပႃႇတီႇ ၸိူဝ်းဢွင်ႇပေႉပၢင်လိူၵ်ႈတင်ႈၼႆႉ ပိူင်လူင် တႃႇသၢၼ်မိုဝ်းၵၼ် ၶွတ်ႇၽွတ်ႈ လူင်ပွင်ၸိုင်ႈမႂ်ႇ ဢၼ်တေၽွင်းငမ်းမိူင်းၵႂႃႇၼႂ်းပီ 2021 -2025 ၶၢဝ်းတၢင်း 5 ပီ တေမႃးၼႆႉ လႆႈႁူႉၼင်ႇၼႆ။
