ၽူႈၸၢႆး 2 ၵေႃႉ ယိုဝ်းသွင်ၽူဝ်မေး တီႈဝဵင်းၼမ်ႉလၼ်ႈ ၵေႃႉပဵၼ်မေး လူႉတၢႆ ၵေႃႉပဵၼ်ၽူဝ်မၢတ်ႇၸဵပ်း လႆႈသူင်ႇယူတ်းယႃတူဝ် တီႈဝဵင်းလႃႈသဵဝ်ႈ ပဵၼ်ယွၼ်ႉသင်ယင်းပႆႇလႆႈႁူႉ ဝႃႈၼႆ။
ဝၼ်းတီႈ 11/1/2021 ယၢမ်းႁူဝ်ၶမ်ႈ မွၵ်ႈ 5 မူင်းၶိုင်ႈ ၵူၼ်း 2 ၵေႃႉၼၼ်ႉယိုဝ်း ၸၢႆးယီႈလႄႈၼၢင်း ဝုၼ်း 2 ၽူဝ်မေးယူႇပွၵ်ႉၵွင်းလၢင်း ဝဵင်းၼမ်ႉလၼ်ႈ ၊ ပဵၼ်ၽႂ်ၵေႃႉယိုဝ်း ယိုဝ်းယွၼ်ႉသင် ယင်းပႆႇႁူႉ။
ၵူၼ်းပွၵ်ႉၵွင်းလၢင်း ၵေႃႉၼိုင်ႈ လၢတ်ႈဝႃႈ – “ ၶႃၽူဝ်မေး ၺႃးယိုဝ်း ၵေႃႉပဵၼ်မေး လႆႈလူႉတၢႆ ၵေႃႉပဵၼ်ၸဝ်ႈၽူဝ်တႄႉ မၢတ်ႇၸဵပ်း။ လႆႈငိၼ်းဝႃႈ ၶႃၽူဝ်မေး လုၵ်ႉၼမ်ႉပွင်ႈလႃႈသဵဝ်ႈမႃး။ ၵူၼ်းယိုဝ်းၼၼ်ႉ လႅပ်ႈတေ ငွႆးပႂ်ႉၶႃပူႇဢွၵ်ႇဝႆႉ။ ၽိူဝ်ႇဝႃႈၶႃႁွတ်ႈၽႅဝ်ႁိူၼ်း ပိုတ်ႇၽၵ်းတူၵႃးလူင်းမႃးၵေႃႈ ၵူၼ်းႁၢႆႉသွင်ၵေႃႉၼႆႉ ၶဝ်ႈယိုဝ်းၵမ်းလဵဝ်”- ဝႃႈၼႆ။
မိူဝ်ႈပီ 2019 ၼၼ်ႉ ၵေႃႈမီးၵူၼ်းမႃးယိုဝ်း တီႈႁိူၼ်းၼၢင်းဝုၼ်းၼႆႉၼင်ႇၵဝ်ႇ။ ၽွင်းၼၼ်ႉ မၢၵ်ႇၵွင်ႈတိူဝ်ႉၺႃးၽူဝ်မၼ်းၼၢင်းတၢႆ ဝႃႈၼႆ။ (ၽူဝ်ၵေႃႉၼႆႉပဵၼ် ၼႃႈႁိူၼ်းမႂ်ႇမၼ်းၼၢင်း)
“လႆႈငိၼ်းဝႃႈတေၵဵဝ်ႇၵပ်းလွင်ႈပၼ်ႁႃငိုၼ်းတွင်းၼႆႉၶႃႈယူဝ်ႉၼေႃ။ မိူဝ်ႈပီ 2019 ၼၼ်ႉ မီးၵူၼ်း မႃးယိုဝ်းတီႈႁိူၼ်းၶဝ်ယဝ်ႉၵမ်းၼိုင်ႈ။ၽွင်းၼၼ်ႉၽူဝ်မၼ်းၵေႃႉဢွၼ်တၢင်းတၢႆ။ မၼ်းသမ်ႉပၢႆႈလွတ်ႈ။ ၽူဝ်မၼ်းၵေႃႉဢၼ်မၢတ်ႇၸဵပ်း ၵမ်းၼႆႉ ပဵၼ်ၽူဝ်မႂ်ႇဢေႃႈ”- ၵူၼ်းပွၵ်ႉၵွင်းလၢင်း သိုပ်ႇလၢတ်ႈၼႄၼင်ႇၼႆ။
ဝၢႆးသေ ၸၢႆးယီႈလႄႈၼၢင်းဝုၼ်း ၺႃးယိုဝ်း ယူႇတီႈၸုမ်းၸွႆႈထႅမ်တူင်ႇဝူင်းၵူၼ်း ၸွႆႈဢဝ်တူဝ်သူင်ႇယူတ်း ယႃတီႈလႃႈသဵဝ်ႈ။ ၼၢင်းဝုၼ်း လႆႈလူႉသဵင်ႈ ၽွင်းၵႂႃႇႁူင်းယႃ။ ၸၢႆးယီႈတႄႉ တၼ်းလႆႈသူင်ႇထိုင်ယူတ်းယႃ လႃႈသဵဝ်ႈ ။
မိူဝ်ႈဝၼ်းတီႈ 10/5/2019 ပူၼ်ႉမႃးၼၼ်ႉၵေႃႈ ၵူၼ်းပွၵ်ႈၵွင်းလၢင်း ၸၢႆးသူဝ်းလၢႆႇ ဢႃယု 45 ပီ ၼၼ်ႉၵေႃႈ ထုၵ်ႇၵူၼ်း ဢမ်ႇႁူႉၾၢႆႇၶဝ်ႈယိုဝ်းၼႂ်းႁိူၼ်းသေ လႆႈလူႉတၢႆ ၼင်ႇၵဝ်ႇ။
မိူဝ်ႈပီ 2018 လိူၼ်ဢေႃႊၵတ်ႊသ်သမ်ႉ မီးၵူၼ်းႁၢႆႉ 2 ၵေႃႉ ၶဝ်ႈယိုဝ်းသင်ၶတႆး တီႈၼမ်ႉလၼ်ႈ ။ ၵူၺ်းၵႃႈၸဝ်ႈၼႃႈတီႈပလိၵ်ႈဢၼ်ႇတွၼ်ႉတီႉၺွပ်းလႆႈတူဝ်ၵူၼ်းႁၢႆႉသေၵမ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ