ၵူၼ်းဝၢၼ်ႈတွင်ႇထဵၵ်ႈ ၵေႃႉၼိုင်ႈ ဢၼ်လႆႈပၢႆႈၽေးသိုၵ်း မိူဝ်ႈႁူဝ်လိူၼ်ဢွၵ်ႊထူဝ်ႊၿိူဝ်ႊ ပူၼ်ႉမႃးၼၼ်ႉ လႆႈလဵင်ႉလုၵ်ႈ ၵွၼ်ႇလိူၼ်ပႆႇတဵမ်၊ လုၵ်ႈတူၵ်းၽၢၵ်ႈ ယဝ်ႉၵေႃႈ မႄႈတၢၵ်ႇတၢႆၸွမ်း။
ဝၼ်းတီႈ 17/12/2020 ယၢမ်းၵၢင်ၶိုၼ်း တူၵ်းမႅၼ်ႈဝၼ်းၽတ်း ၼၢင်းယိင်းၵေႃႉၼိုင်ႈ (ၸိုဝ်ႈၼၢင်းၵေႃႇ) ပဵၼ်ၵူၼ်း ဝၢၼ်ႈ တွင်ႇထဵၵ်ႈ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ၊ ၽွင်းသိုၵ်းမၢၼ်ႈလေႃႇတိုၵ်း တပ်ႉ RCSS/SSA ၼႂ်းၸႄႈဝဵင်းၵျွၵ်ႉမႄး ၼၼ်ႉ မၼ်းၼၢင်းလႆႈပၢႆႈၽေးသိုၵ်း၊ ယၢမ်းလဵဝ် လုၵ်ႈၼႂ်းတွင်ႉ ဢၼ်ၵိူတ်ႇ ပဵၼ်ၽူႈၸၢႆး လႆႈၵိူတ်ႇလဵင်ႉ ၽွင်းမီး မွၵ်ႈ 8 လိူၼ်သေ တူဝ်ၵေႃႉပဵၼ်မႄႈ လႆႈလူႉတၢႆထင်တီႈ ၼႂ်းႁွင်ႈၵိူတ်ႇ ဝႃႈၼႆ။
ၸဝ်ႈၽူႈဢၼ်ၵႂႃႇၸွႆႈထႅမ် တၢင်းယၢပ်ႇၽိုတ်ႇၼၼ်ႉလၢတ်ႈဝႃႈ – “ၸႂ်ႈၶႃႈဢေႃႈ ပဵၼ်ၵူၼ်းဝၢၼ်ႈတွင်ႇထဵၵ်ႈ၊ မိူဝ်ႈပိူၼ်ႈ ယိုဝ်းၵၼ်ၼၼ်ႉလႆႈပၢႆႈပၢင်တိုၵ်းၼၼ်ႉၼႃႇ။ တေႃႈလဵဝ်ၵိူတ်ႇလုၵ်ႈ လုၵ်ႈတွင်ႉမွၵ်ႈ 8 လိူၼ်ၵူၺ်း။ လုၵ်ႈဢွၼ်ႇတႄႉ လွတ်ႈၽေးယူႇ မႄႈလုၵ်ႈဢွၼ်ႇတႄႉ လူႉသဵင်ႈၵႂႃႇၼႂ်းဝၼ်းၼၼ်ႉ ၵူၺ်းလဵဝ်ယဝ်ႉ”- ဝႃႈၼႆ။
ဝၢၼ်ႈတွင်ႇထဵၵ်ႈၼႆႉ မီးၾၢႆႇၸၢၼ်းဝဵင်းၵျွၵ်ႉမႄး ယၢၼ်ၵႆဝဵင်း မွၵ်ႈ 50 လၵ်း၊ သင်ဝႃႈ ၽူႈမီးၼမ်ႉၸႂ် ၸေႇတႃႇၼ ၶႂ်ႈၸွႆႈထႅမ် ငိုၼ်းတွင်း ၽႃႈႁူမ်ႇ သိူဝ်ႈၼႃ ၶွင်ၸႂ်ႉလုၵ်ႈဢွၼ်ႇၸိုင် ၵပ်းသိုပ်ႇတွင်ႈထၢမ် မၢႆၾူၼ်း 096-95654240 (မၢႆၾူၼ်းမၢၼ်ႈ) ။
မိူဝ်ႈႁူဝ်လိူၼ်ၼူဝ်ႊဝႅမ်ႊၿိူဝ်ႊ ၼႃႈပၢင်လိူၵ်ႈတင်ႈ ပီ 2020 ပူၼ်ႉမႃးၼႆႉ သိုၵ်းလူင်ပွင်ၸိုင်ႈမၢၼ်ႈ လၢႆတပ်ႉၵွင် ႁႅၼ်းသိုၵ်း လေႃႇတိုၵ်း RCSS တၢင်းပွတ်းထုင်ႉၼၼ်ႉသေ ႁဵတ်းႁႂ်ႈၵူၼ်းမိူင်းပိုၼ်ႉတီႈ ၼပ်ႉႁဵင် လႆႈဢွၼ်ၵၼ် ပၢႆႈယၢၼ်ႁိူၼ်းယေး။ တီႈဝၢၼ်ႈတွင်ႇထဵၵ်ႈၼႆႉၵေႃႈ လႆႈၺႃးၸၢၵ်ႇၸွမ်း ၼႂ်းပၢင်တိုၵ်း။ ၵူၼ်းဝၢၼ်ႈလႆႈဢွၼ်ၵၼ်ပၢႆႈပိုင်ႈ ယူႇတီႈ ဝတ်ႉတွင်ႇ ထဵၵ်ႈၵၼ်တင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ