Friday, March 29, 2024

ပျီႇတူႉၸိတ်ႉဢဝ်ႁူမ်ႇလူမ်ႈမိူင် ထၢၼ်ႇႁိၼ် တၢင်ႉယၢၼ်း တီႉၺွပ်းၵူၼ်းဝၢၼ်ႈၵႂႃႇ 3 ၵေႃႉ

Must read

မိူင်းတႆးပွတ်းႁွင်ႇ ၸႄႈတွၼ်ႈလႃႈသဵဝ်ႈ တၢင်းပွတ်း ၸဵင်ႇၸၢၼ်းဝၼ်းတူၵ်း ၸႄႈဝဵင်းတၢင်ႉယၢၼ်းၼၼ်ႉ မီး ပျီႇတူႉၸိတ်ႉ ၼႂ်းပိုၼ်ႉတီႈ ၸုမ်းၼိုင်ႈ ၶဝ်တီႉၺွပ်းၵူၼ်းဝၢၼ်ႈ 3 ၵေႃႉ၊ ဢဝ်ၵႂႃႇၵုမ်းၵမ် ဝႆႉတီႈလႂ် ၵူၼ်းတၢင်းႁိူၼ်း တိတ်းတေႃႇ ဢမ်ႇလႆႈလႄႈ မႆႈၸႂ်ၸွမ်း။

ပၢႆႉၶဝ်ႈဝဵင်းတၢင်ႉယၢၼ်း

ဝၼ်းတီႈ 15/12/2020 ယၢမ်းႁူဝ်ၶမ်ႈ ပျီႇတူႉၸိတ်ႉၸုမ်းၼိုင်ႈ ဢၼ်ပၵ်းပႂ်ႉႁိမ်းဝၢၼ်ႈ တၢၵ်ႇလႅတ်ႇ ဢိူင်ႇၼႃး ႁုၵ်ႇ ၸႄႈဝဵင်းတၢင်ႉယၢၼ်း၊ တၢင်းတူၵ်းဝဵင်း မွၵ်ႈ 9 လၵ်းၼၼ်ႉ ၶဝ်ႈတီႉၵူၼ်းဝၢၼ်ႈ ၺွပ်းၵႂႃႇ 3 ၵေႃႉ၊ ဢဝ်ၵႂႃႇၵုမ်းၵမ်ဝႆႉတီႈလႂ် တေႃႇထိုင်ဝၼ်းမိူဝ်ႈၼႆႉ ၵူၼ်းတၢင်းႁိူၼ်းတိတ်းတေႃႇယင်းပႆႇလႆႈ။

- Subscription -

ၵူၼ်းပိုၼ်ႉတီႈ တၢင်ႉယၢၼ်း လၢတ်ႈဝႃႈ – လႆႈငိၼ်းဝႃႈတႄႉ ပူၼ်ႉမႃး 2 -3 ဝၼ်းၼႆႉ ၵူၼ်းဝၢၼ်ႈတၢၵ်ႇလႅတ်ႇၼႆႉ ၵႂႃႇ ယွၼ်းတၢင်းၸွႆႈထႅမ် တီႈဝၢၼ်ႈႁႆး ယွၼ်ႉၵူၼ်းဝၢၼ်ႈဢမ်ႇၶႂ်ႈၶၢႆႉပၢႆႈယၢၼ်ဝၢၼ်ႈ ပၼ်ၶွမ်ႊပၼီႊၶုတ်းထၢတ်ႇႁိၼ်။ လွင်ႈၼႆႉၸုမ်းပျီႇတူႉၸိတ်ႉ လႆႈၶၢဝ်ႇသေ မႃးတီႉဢဝ်ၶဝ်ၵႂႃႇ။ ၶၢဝ်ႇတႄႉဝႃႈ ဢဝ်ၶဝ်ၵႂႃႇထိုင် မိူင်းႁႃႉ ငဝ်ႈတပ်ႉပျီႇတူႉ ၸိတ်ႉ ၸုမ်းၼၼ်ႉယဝ်ႉ – ဝႃႈၼႆ။

ၵူၼ်းဝၢၼ်ႈ 3 ၵေႃႉ ဢၼ်ထုၵ်ႇၸုမ်းပျီႇတူႉၸိတ်ႉ တီႉၺွပ်းၵႂႃႇၼၼ်ႉ ပဵၼ်လုင်းၸၢႆးၼႃႇလိင်ႇ၊ လုင်းၸၢႆးပီး ႁူဝ် ယႃ လႄႈ ၸၢႆးၸၢမ်ႇလူႇ ၸိူဝ်းၼႆႉ။

ဝၢၼ်ႈတၢၵ်ႇလႅတ်ႇၼႆႉ ၺႃးၶွမ်ႊပၼီႊ တဵၵ်းသၢႆႈတႅၼ်းပၼ်ငိုၼ်း ၼိုင်ႈႁိူၼ်း 150 သႅၼ် တေႃႇ 300 သေ တဵၵ်းၸႂ်ႉၶၢႆႉ ဝၢၼ်ႈ။ သွင်ၾၢႆႇတူၵ်းလူင်းၵၼ်ဝႃႈ ပေႃးဢွၵ်ႇဝႃႇယဝ်ႉတေၶၢႆႉ။ ၵူၼ်းဝၢၼ်ႈ ဢၼ်ႁပ်ႉငိုၼ်းသေ ၶၢႆႉပၢႆႈ မီး 20 လင်ပၢႆ ၸိူဝ်းတိုၵ်ႉၵိုတ်း ၼၼ်ႉ ပႆႇယွမ်းၶၢႆႉ ယွၼ်ႉ ၵူၼ်းသၢမ်ၵေႃႉၼၼ်ႉ ဢွၼ်ႁူဝ်သၢၼ်ၶတ်းဝႆႉ ၼႆလႄႈ ၸိူဝ်းၶဝ်ၺႃးတီႉ ၵူၼ်းပိုၼ်ႉတီႈလၢတ်ႈၼႄ ၼင်ႇၼႆ။

ၶွမ်ႊပၼီႊၶုတ်းထၢၼ်ႇႁိၼ် တီႈႁိမ်းဝၢၼ်ႈတၢၵ်ႇလႅတ်ႇ
Photo by – ၵူၼ်းပိုၼ်ႉတီႈ/ ၶွမ်ႊပၼီႊၶုတ်းထၢၼ်ႇႁိၼ် တီႈႁိမ်းဝၢၼ်ႈတၢၵ်ႇလႅတ်ႇ ဝဵင်းတၢင်ႉယၢၼ်း

လွင်ႈၼႆႉယူႇတီႈၸုမ်းၶၢဝ်ႇၽူႈတွႆႇႁွၵ်ႈ လႆႈၶတ်းၸႂ် ၵပ်းသိုပ်ႇၸူး ၸုမ်းပျီႇတူႉၸိတ်ႉမိူင်းႁႃႉ လၢႆလၢႆၵမ်း ၵေႃႈ ဢမ်ႇႁပ်ႉသၢႆ ။

ၶွမ်ႊပၼီႊမႃးၶုတ်းထၢၼ်ႇႁိၼ်တီႈတၢင်ႉယၢၼ်းၼႆႉ တႄႇဢဝ် မိူဝ်ႈပီ 2000 မႃးတေႃႇထိုင်ယၢမ်းလဵဝ် မီးၶၢဝ်းတၢင်း 20 ပီ ယဝ်ႉ။ ၶွမ်ႊပၼီႊ ၸူင်ၶုတ်းဢဝ်ထၢၼ်ႇႁိၼ် လၼ်ႈပိုၼ်ႉဝၢၼ်ႈတၢၵ်ႇလႅတ်ႇ မႃးၶၢဝ်းတၢင်း 5-6 ပီ၊ ႁဵတ်းႁႂ်ႈ လိၼ်ဝၢၼ်ႈပေႃးတႅၵ်ႇငၢၵ်ႈ။ ၶွမ်ႊပၼီႊဢၼ်မႃးၶုတ်းပဵၼ် ငူၺ်ႇယီႇပလႄး တင်း သူၺ်ႇလိင်ႇၵႃႇ ။ ယၢမ်းလဵဝ် ၶွမ်ႊပၼီႊ သူၺ်ႇလိင်ႇၵႃႇ ၵိုတ်းၵႂႃႇ မိူဝ်ႈ လိူၼ်ႁႃႈ ၼႆသေ တႃႉ ဢၼ်တိုၵ်ႉၶုတ်းယူႇ မီး မီးငူၺ်ႇယီႇပလႄး။ ယင်းမီးၶၢဝ်ႇဝႃႈ တေၶဝ်ႈၶုတ်းၶိုၼ်းယူႇဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း