ၵူၼ်းပၢႆႈၽေးသိုၵ်းတီႈၼမ်ႉတူႈ ပႆႇၸၢင်ႈပွၵ်ႈႁိူၼ်းယေးၶိုၼ်း ၼႂ်းပိုၼ်ႉတီႈတိုၵ်ႉမီးသိုၵ်းၶဵင်ႈၶႅင် တေႃႇၵၼ် ပႆႇၼိမ်သဝ်း။

မိူဝ်ႈဝႃး ဝၼ်းတီႈ 13/12/2020 ၵူၼ်းဝၢၼ်ႈၼႃးၵႅင်း ဢၼ်ပၢႆႈၽေးသိုၵ်းမႃးသွၼ်ႈဝႆႉ တီႈၵျွင်းမၢၼ်ႈၸၢမ် ၸႄႈဝဵင်း ၼမ်ႉတူႈ ၸိုင်ႈတႆးပွတ်းႁွင်ႇၼၼ်ႉ ဢွၼ်ၵၼ်ပွၵ်ႈၶိုၼ်း ႁိူၼ်းယေးၵၼ်ၵမ်ႈၽွင်ႈယဝ်ႉသေတႃႉ  ၵူၼ်းဝၢၼ်ႈ မၢင်ဝၢၼ်ႈတႄႉ ပႆႇၸၢင်ႈပွၵ်ႈ တိုၵ်ႉၵိုတ်းဝႆႉ ႁူဝ်ၵူၼ်း 200 ပၢႆ  ယွၼ်ႉပိူဝ်ႈၼႂ်းပိုၼ်ႉတီႈပႆႇ ၼိမ်သဝ်း  ။

လုင်းပႃႉၺၢၼ်ႇ ၵႅမ်ၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈဝႃႈ – “လႆႈငိၼ်းဝႃႈ ၵူၼ်းဝၢၼ်ႈၵုၼ်ၵျွင်း၊ ၼႃးၵႅင်း၊ ပဵင်းလူင် ၸိူဝ်းၼႆႉတႄႉ ပွၵ်ႈမိူဝ်းယဝ်ႉ ၼႆဝႃႇ။ ၵူၺ်းၵႃႈ မိူဝ်ႈၼႆႉ ၵၢင်ၼႂ်ၸဝ်ႉသမ်ႉ သိုၵ်းသွင်ၸုမ်း ၶႂ်ႈသုၵ်ႉသၵ်ႉ  ဝႆႉ တၢင်းဝၢၼ်ႈၼႃးၵေးၼႆသေ မီးၵူၼ်းဝၢၼ်ႈပၢႆႈမႃးၶိုၼ်း ယၢမ်းလဵဝ် ၵူၼ်းႁဝ်းၶႃႈတိုၵ်ႉၵဵပ်း သဵၼ်ႈမၢႆမၼ်းယူႇၶႃႈ ဝႃႈမီး ၵႃႈႁိုဝ်”- ဝႃႈၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝၢၼ်ႈပၢင်ၶႅမ်ၼၼ်ႉတႄႉ ၶိုၼ်းဢွၼ်ပွၵ်ႈၶိုၼ်းႁိူၼ်းယေး ၽႂ်မၼ်း မူတ်းယဝ်ႉ ဝႃႈၼႆ။

ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇ RCSS လၢတ်ႈဝႃႈ – “မိူဝ်ႈၼႆႉ တၢင်းပွတ်းၼမ်ႉတူႈ သိုၵ်းႁဝ်းၶႃႈ တင်း ၸုမ်းဢူၺ်းလီ ပွတ်းႁွင်ႇၶဝ် တိုၵ်ႉၶဵင်ႈၶႅင်ၵၢၼ်သိုၵ်း ၵၼ်ယူႇၶႃႈ။ ပၢင်တိုၵ်းတႄႉ ယဵၼ်ဝႆႉပႆႇပဵၼ်” – ဝႃႈၼႆ။

ယၢမ်းလဵဝ် တီႈၵျွင်းမၢၼ်ႈၸၢမ်ၼၼ်ႉတႄႉ တိုၵ်းၵိုတ်းဝႆႉ ၵူၼ်းပၢႆႈၽေး ဝၢၼ်ႈပဵင်းလူင်၊ ဝၢၼ်ႈၼႃးၵေး၊ ဝၢၼ်ႈၵုၼ်ၵျွင်း၊ ဝၢၼ်ႈၼမ်ႉပၢႆႇလႄႈ ဝၢၼ်ႈပဵင်းထွၼ် ႁူဝ်ၵူၼ်း 200 ပၢႆ ၼႆယဝ်ႉ။

“ၵူၼ်းပၢႆႈၽေးသိုၵ်း ဢၼ်ၵိုတ်းတီႈၵျွင်းမၢၼ်ႈၸၢမ်ၼႆႉ ပႆႇၸၢင်ႈပွၵ်ႈႁိူၼ်းယေး ၵၼ်မူတ်းၶႃႈ။ ၼႂ်းပိုၼ်ႉတီႈတိုၵ်ႉမီးလွင်ႈ ၶဵင်ႈၶႅင်ၵၢၼ်သိုၵ်းၵၼ် ၸွမ်းသဵၼ်ႈတၢင်းၵႃး လႃႈသဵဝ်ႈ – ၼမ်ႉတူႈ တေဢဝ်ဝၢၼ်ႈပဵင်းလူင်၊ ၺွင်ႇသွႆႈ၊ ၼႃးမတ်း ၸိူဝ်း ၼႆႉယူႇ။ ပၢင်တိုၵ်းတႄႉ တေဢမ်ႇလႅပ်ႈလွတ်ႈၶႃႈယူဝ်ႉ ထၢင်ႇတႄႉ”-  ၵူၼ်း ပွတ်းမၢၼ်ႈၸၢမ် လၢတ်ႈၼႄၼင်ႇ ၼႆ။

တႄႇဢဝ် ဝၼ်းတီႈ 7 ၼႆႉမႃး သိုၵ်း RCSS တင်း TNLA, SSPP လႆႈပဵၼ်ပၢင်တိုၵ်းၵၼ် တၢင်းပွတ်းဢိူင်ႇၼမ်ႉတွင်ႇၵူင်း၊ ဢိူင်ႇမၢၼ်ႈၸၢမ်သေ ၵူၼ်းဝၢၼ်ႈ ၼပ်ႉႁူဝ်ပၢၵ်ႇ လႆႈပၢႆႈယၢၼ်ႁိူၼ်းယေးၵၼ် ၼႆယဝ်ႉ။

ၼႂ်းၸႄႈဝဵင်းၼမ်ႉတူႈၼႆႉ မီးၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃး မိူၼ်ၼင်ႇ သိုၵ်းလူင်ပွင်ၸိုင်ႈမၢၼ်ႈ TNLA, KIA, SSPP လႄႈ RCSS ၸိူဝ်းၼႆႉ။